თვითმმართველობების საშტატო ნუსხაში მომრავლდა მრჩევლის თანამდებობა, რომელთა შრომით ხელშეკრულებებში იგივე ფუნქციებია გაწერილი, რაც, პარალელურად, ადგილობრივ საჯარო მოხელეებს ისედაც ეკისრებათ.
"გურია ნიუსი" დაინტერესდა, რამდენი მრჩეველი ჰყავს გურიის ოთხივე მუნიციპალიტეტის პირველ პირებს. ოზურგეთის მუნიციპალიტეტის გამგებელს მერაბ ჭანუყვაძეს ორი მრჩეველი ჰყავს: დავით ნინიკაშვილი და რამაზ ზოსიაშვილი; ლანჩხუთის მუნიციპალიტეტის გამგებელს ერთი _ თამარ ფირცხალაიშვილი; ჩოხატაურის მუნიციპალიტეტის გამგებელს – არცერთი; ქალაქ ოზურგეთის მერს ორი _ სოფო ჭანტურია და ვასილ ვაშალომიძე.
"გურია ნიუსი" დაინტერესდა, დადიან თუ არა მრჩევლები სამსახურში და რა ვალდებულებები გააჩნიათ მათ.
მერაბ ჭანუყვაძის ერთ-ერთი მრჩეველი, რამაზ ზოსიაშვილი "გურია ნიუსთან" აღნიშნავს, რომ მას კანონი ავალდებულებს იყოს სამსახურში; მეორე მრჩევლის დავით ნინიკაშვილის თქმით კი, მასთან გაფორმებული ხელშეკრულება არ ითვალისწინებს სამსახურში ყოფნას; ლანჩხუთის გამგებელი ამბობს, რომ მრჩეველის გარეშე ფეხს არსად ადგამს; ჩოხტაურის გამგებელს, როგორც აღვნიშნეთ, მრჩეველი საერთოდ არ ჰყავს; ქალაქ ოზურგეთის მერიაში აღნიშნავენ, რომ "…ვასილ ვაშალომიძეს ჯანმრთელობის მდგომარეობის გამო, 2 თებერვლიდან გახსნილი აქვს ბიულეტენი, რის გამოც, ამ ეტაპზე ვერ ახერხებს სამსახურში სიარულს. რაც შეეხება სოფიო ჭანტურიას იგი ჩვეულ გრაფიკში და ხშირ შემთხვევაში, ზეგანაკვეთურადაც მუშაობს."
დავით ნინიკაშვილი თბილისში ცხოვრობს, ის ოზურგეთში არჩევნების დროს ჩამოვიდა და არჩევნების შემდგომ, მრჩევლად დაინიშნა; შესაბამისად, შრომითი ხელშეკრულებაც 2014 წლის 26 აგვისტოდან 2015 წლის 26 აგვისტოს ჩათვლით გაფორმდა.
მიუხედავად იმისა, რომ ნინიკაშვილი სამსახურში სიარულს ვალდებულებად არ თვლის და თანამშრომლებიც არ იცნობენ, წინასაახალწლოდ პრემირებულთა სიაშიც მოხვდა.
საქართველოს ახალგაზრდა იურისტთა ასოციაციის ოზურგეთის ოფისის ხელმძღვანელი თამაზ ტრაპაიძე ამბობს, რომ ოზურგეთის მუნიციპალიტეტის გამგეობის შინაგანაწესის მე-2 მუხლის შესაბამისად: 1. გამგეობაში სამუშაო დრო განისაზღვრება 5- დღიანი სამუშაო კვირით. 2. სამუშაო დრო განისაზღვრება დილის 09.00 სთ-დან 18.00 სთ-მდე.
გამგებლის მრჩეველთა ხელშეკრულებაში ვკითხულობთ: "დასაქმებულის სამუშაო დრო წარმოადგენს კალენდარული დროის ნაწილს, რომლის განმავლობაშიც იგი ვალდებულია განახორციელოს თავისი უფლება-მოვალეობანი". როგორც ხედავთ, ხელშეკრულების ეს ნაწილი საკმაოდ ზოგადია; ამიტომ, დასაქმებულის ვალდებულებებიდან უნდა გამოვიტანოთ დასკვნები, სადაც ვკითხულობთ, რომ იგი ვალდებულია "დაიცვას დაწესებულებაში არსებული შრომის შინაგანაწესით განსაზღვრული მოთხოვნები". ანუ დაქირავებული ამ შემთხვევაში შებოჭილია შინაგანაწესის მოთხოვნებით, რომლის შესახებაც უკვე ვისაუბრეთ და ვალდებულია დაიცვას იგი. ხელშეკრულებაში კონკრეტულად მისი მოვალეობები გაწერილი არაა, მაგრამ ვალდებულებით ნაწილში ვკითხულობთ, რომ მას შინაგანაწესის დაცვა (სამასახურში დროულად მოსვლა და ა.შ.) და სამუშაოს მაღალკვალიფიციურად შესრულება ევალება. თუმცა, რა სამუშაო უნდა შეასრულოს მაღალკვალიფიციურად, ამაზე ხელშეკრულებაში საუბარი არ არის," _ აღნიშნავს ტრაპაიძე.
იურისტი ლევან ალაფიშვილი ამბობს, რომ ამგვარი შტატების არსებობა არჩევნებისშემდგომი ხარკია:
"ეს ნიშნავს, რომ არჩევნების შემდეგ ასე ხელაღებით ვერ დაასაქმებდნენ და, უბრალოდ, შესაძლებელი გახდა სტრუქტურულ ერთეულებში მრჩევლებად მიეყვანათ ეს ადამიანები. ეს ტენდენცია შეიძლება დიდ პრობლემად იქცეს კონკრეტულ საკითხში; მხედველობაში მაქვს ძალიან მარტივი ლეგიტიმური თუნდაც ფინანსური კუთხით დანახული კითხვა, რომელიც აუდიტის სამსახურს ან სამოქალაქო სექტორს გაუჩნდეს: ფინანსები, რომელიც ხმარდება ისეთ სერვისს, რომელსაც თავად სტრუქტურაში დასაქმებული მოხელეები ასრულებენ და პარალელურად, შტატგარეშე თანამშრომლებს ამავე სფეროში მრჩევლების სახით აიყვანენ, ეს რა გამოდის?! ეს, მინიმუმ, სახელმწიფო სახსრების უყაირათო ხარჯვაა. კანონდარღვევა არაა, თუმცა ხარვეზია, რომლის გამოსწორებაზეც მოუწევს თვითმმართველობებს ზრუნვა. წინააღმდეგ შემთხვევაში, ამან შეიძლება კანონთან პრობლემები შექმნას, რაც არავისთვის არაა სასურველი," _ აღნიშნავს ალაფიშვილი.
ოზურგეთს მუნიციპალიტეტის გამგებლის მერაბ ჭანუყვაძის კომენტარი ასეთია:
"დავით ნინიკაშვილი ოზურგეთის მუნიციპალიტეტის გამგეობაში შრომითი ხელშეკრულების საფუძველზე საინფორმაციო-ანალიტიკურ საკითხებში გამგებლის მრჩევლის პოზიციაზე მუშაობს… გამომდინარე იქედან, რომ ნინიკაშვილი არის შტატგარეშე მოსამსახურე და გამგეობაში დასაქმებულია არამუდმივ ამოცანათა შესასრულებლად, შინაგანაწესი არ ითვალისწინებს იმას, რომ მუდმივად იმყოფებოდეს სამსახურში. რაც მთავარია, ის პროფესიონალი კადრია და მოვალეობას პირნათლად ასრულებს. საინფორმაციო-ანალიტიკური მიმართულებით დავით ნინიკაშვილი თავისი კომპეტენციის ფარგლებში სამუშაო აღწერილობით გათვალისწინებულ უფლებამოსილებებს სრულად ახორციელებს."
თავად დავით ნინიკაშვილი ამბობს, რომ შრომითი ხელშეკრულება არ ითვალისწინებს მის მუდმივად ყოფნას სამსახურში: "შეთანხმების საფუძველზე, უფლებამოსილებს ვახორციელებ სრულად, ეს არის საინფორმაციო-ანალიტიკური მიმართულება. ჩემი ფუნქცია არის გამგებელს, მერაბ ჭანუყვაძეს მივაწოდო რეკომენდაციები ცენტრალურ მედიასაშუალებებთან ურთიერთობებში; ასევე, მუდმივი კონტაქტი მაქვს მუნიციპალიტეტის გამგეობის პრესსამსახურთან. როცა გარემოება მოითხოვს, ოზურგეთში ჩამოვდივარ.
რაც შეეხეება ხელფასს და პრემიას, კიდევ ერთხელ აღვნიშნავ, რომ ჩემზე დაკისრებულ უფლებამოსილებებს ვასრულებ და ანაზღაურებას ვიღებ ხელშეკრულებით გათვალისწინებული შესრულებული სამუშაოების მიხედვით. არ არის სავალდებულო ყველა თანამშრომელი მიცნობდეს. მიცნობს ის, ვისთანაც სამსახურეობრივი ურთიერთობა მაკავშირებს".
ოზურგეთს მუნიციპალიტეტის გამგებლის მეორე მრჩეველი რამაზ ზოსიაშვილი:
"მე ჩემი ხელშეკრულება მავალდებულებს შევასრულო ყველა ის პუნქტი, რაც არის გაწერილი ხელშეკრულებაში, მევალება ინვესტიციების მოზიდვა და საერთაშორისო პარტნიორების მოძებნა, ფული რომ ჩაიდოს ინვესტიციებში, რა თქმა უნდა ხელშეკრულებაში გაწერილი არ არის რომ მე ზუსტად 9 საათიდან საღამოს 6 საათამდე ვიყო სამსახურში, თუმცა ჩემი პოზიცია მავალდებულებს, რომ ვიყო სამსახურში და ვიცნობდე აქაურ გარემოს, დავეხმარო გამგებელს პროდუქტების შექმნაში. ამ ეტაპისთვის, აქ რომ ვარ და დილიდან 6 საათამდე, მავალდებულებს და მოითხოვს კანონი. ჩემი ხელშეკრულება ალბათ ერთ წლიანია."
"გურია ნიუსის" კითხვამ, დადის თუ არა მისი მრჩეველი სამსახურში ყოველდღე, ლანჩხუთის მუნიციპალიტეტის გამგებელი ზაზა ურუშაძე გააღიზიანა:
"რას ჰქვია არ დადის სამსახურში? რანაირად შეიძლება სამსახურში არ დადიოდეს ? არ დადის კი არა, იმდენი საქმე და დავალება მაქვს მიცემული, თავის ასაწევად არ სცალია: მას შემოაქვს ყველა წერილი და ფაქტობრივად, ჩემი მრჩევლის გარეშე არაფერს ვშვები. ორი მრჩეველი მყავდა, მაგრამ ერთი გადავიყვანე სხვა სამხახურში. ახლა ჩემი მრჩეველი თამარ ფირცხალაიშვილია," – გვითხრა ლანჩხუთის გამგებელმა.
"გურია ნიუსი" დაუკავშირდა ჩოხატაურის მუნიციპალიტეტის გამგებელს ირაკლი კუჭავას, რომელმაც განაცხადა, რომ მას მრჩეველი არ ჰყავს.
"როგორც ასეთი მრჩეველი, ჩვენთან საშტატო ნუსხაში ნამდვილად არ არის. არც ხელშეკრულებით მყავს ვინმე აყვანილი მრჩეველის სახით, მყავს მხოლოდ თანაშემწე," _ გვითხრაჩოხტაურის გამგებელმა.
ქალაქ ოზურგეთის მერიის პრესსსამსახურის მიერ მოწოდებულ ინფორმაციაში ნათქვამია:" 2015 წლის 6 თებერვლის მდგომარეობით, ქალაქის მერს ჰყავს ორი მრჩეველი: ვასილ ვაშალომიძე და სოფიო ჭანტურია.
ვასილ ვაშალომიძეს ხელშეკრულების თანახმად ევალება, მერის დავალებითა და უშუალო მონაწილეობით განიხილოს კონკრეტული საკითხი და გააცნოს მას საკუთარი ხედვა დასმულ საკითხთან დაკავშირებით.
სოფიო ჭანტურია, მერიაში საზოგადოებასთან და მედიასთან ურთიერთობის საკითხებში, მრჩევლის თანამდებობაზე მუშაობს.
ვასილ ვაშალომიძეს ჯანმრთელობის მდგომარეობის გამო, 2 თებერვლიდან გახსნილი აქვს ბიულეტენი, რის გამოც, ამ ეტაპზე, ვერ ახერხებს სამსახურში სიარულს. რაც შეეხება სოფიო ჭანტურიას, იგი ჩვეულ გრაფიკში და ხშირ შემთხვევაში, ზეგანაკვეთურადაც მუშაობს."
