შინაგან საქმეთა სამინისტრო "ინფორმაციის თავისუფლების განვითარების ინსტიტუტისთვის" (IDFI) გაუმჭვირვალობის სერტიფიკატის უკან მიბრუნებას აპირებს; ეს სერტიფიკატი უწყებას 2014 წლის მანძილზე საჯარო ინფორმაციის ხელმისაწვდომობის შეზღუდვისათვის გადაეცა.
შს მინისტრის მოადგილემ არჩილ თალაკვაძემ, რომელიც დღეს ოზურგეთში, დემოკრატიული ჩართულობის ცენტრში ადგილობრივ სამოქალაქო საზოგადოებას და მედიას ხვდებოდა, "გურია ნიუსთან" დაადასტურა, რომ მართლაც აპირებენ სერტიფიკატს სათანადო ტექსტი წააწერონ და უკან დააბრუნონ.
"კრიტიკა ჩვენი სამინისტროსთვის საუკეთესო მეგობარია და ნამდვილად არ გვეშინია კრიტიკის; თუმცა, ამ შეფასებას არ ვეთანხმებით მარტივი მიზეზების გამო: როცა ორგანიზაცია გაუმჭვირვალობას მიგვითითებს, საპირისპიროდ შემიძლია გითხრათ, რომ მხოლოდ 2014 წელს, 15 000 საჯარო ინფორმაციის მოთხოვნიდან, 14 000 -ზე მეტს ვუპასუხეთ და ამოვწურეთ. დანარჩენ შემთხვევაში, პერსონალური მონაცემების დაცვის საკითხი იყო და უბრალოდ, ვერ გავცემდით ინფორმაციას. მხოლოდ 10-მდე შემთხვევაა, რომელიც სასამართლოშია გასაჩივრებული მთელი წლის განმავლობაში. აქედან, ორი – დაუშვებლად სცნო სასამართლომ, 7 -ზე დავა მიდის, ერთი კი გავასაჩივრეთ ზემდგომ ინსტანციაში.
ამის გარდა, მედიამ წლის განმავლობაში 65 000-ზე მეტჯერ გააშუქა შსს-თან დაკავშირებული ამბები, პოზიტივიც და ნეგატივიც. საჯაროობაც, მე მგონია, იმას ნიშნავს, რომ მედიისთვის იყოს გახსნილი სამინისტრო.
ამასთან, ბოლო პერიოდში ორი დებულება გავასაჯაროეთ, რომელიც საზოგადოებისთვის ამ დებულების დამტკიცების დღიდან იყო დახურული და სამინისტრო ცოცხალი თავით არ აქვეყნებდა. მინისტრმა კი, თავად მიიღო გადაწყვეტილება და გამოაქვეყნა. ჩვენ საჯაროობის კუთხით პრობლემა არ გვაქვს და ამიტომ, ვთვლით, რომ ამ პრიზის მონიჭება იყო ძალიან სუბიექტური. რაც ახლა გითხარით, ამას სერტიფიკატს წავაწერთ და უკანვე დავუბრუნებთ ორგანიზაციას, რომ მომავალ წელს გადახედონ ამ შეფასებას. ჩვენც გადავხედავთ ჩვენს ხარვეზებს… ასე, რომ ამ ჯილდოს უკან ვუბრუნებთ – ეს ცალსახაა!" _ განუცხადა შს მინისტრის მოადგილემ "გურია ნიუსს".
როგორც "ინფორმაციის თავისუფლების განვითარების ინსტიტუტის" (IDFI) წარმომადგენელი გიორგი კლდიაშვილი აცხადებს, ორგანიზაცია ყოველწლიურად იკვლევს საჯარო დაწესებულებებს, ითხოვს ინფორმაციას და შემდგომ აფასებს – წერილზე პასუხობენ თუ – არა.
"მოთხოვნები 300-ზე მეტ საჯარო დაწესებულებას გავუგზავნეთ, მათ შორის შსს-ს, საიდანაც წერილების უმეტესობაზე პასუხები არ მიგვიღია. რაც მივიღეთ, არასრულყოფილი იყო და შემდეგ ვედავეთ სასამართლოში; თბილისის საქალაქო სასამართლომ თქვა, რომ ეს ინფორმაცია შსს-მ უნდა გასცესო და შსს-მ წააგო ეს პროცესი.
ამის შემდეგ, სამინისტრომ პასუხი კი არ მოგვცა, არამედ გაგვისაჩივრა სააპელაციო სასამართლოში…. ბატონი არჩილი თუ თვლის, რომ ესაა გამჭვირვალობა, კი ბატონო, ეს მისი ხედვაა და ღმერთმა ხელი მოუმართოს! ჩვენ ამას გამჭვირვალობად ნამდვილად ვერ ჩავთვლით….
თალაკვაძე თანამდებობაზე დეკემბერში დაინიშნა. მან ნამდვილად არ იცოდა, რა ხდებოდა სამინისტროში 2014 წლის განმავლობაში, რაც მე ძალიან კარგად ვიცი _ ტრენინგებს ვუტარებდი მათ თანამშრომლებს, თუ რა არის ღია მმართველობა. ახლა, გინდ ისე უქნიათ, გინდ – ასე!" _ უთხრა კლდიაშვილმა "გურია ნიუსს".
