მთავრობის სტრატეგიული განვითარების გეგმაში, როგორც ხელისუფლების წარმომადგენლები ირწმუნებიან, დეტალურად არის გაწერილი 2011-2015 წლების სამოქმედო გეგმა. ე.წ. 10-პუნქტიან გეგმას ექსპერტები და არასამთავრობო ორგანიზაციების წარმომადგენლები არაერთგვაროვნად აფასებენ.
“სოციალური და საპენსიო პოლიტიკის ოპტიმიზაციასთან დაკავშირებით, ხელისუფლების მიერ წარმოდგენილი შემოთავაზებები და “სტრატეგიული განვითარების 10-პუნქტიან გეგმაში” წარმოდგენილი პრიორიტეტები ნაკლებად ეფექტურია და რეალურად ვერ უზრუნველყოფს ჯანდაცვის ხელმისაწვდომობას ქვეყანაში”, _ ამბობს ეკონომიკური ექსპერტი ლევან კალანდაძე. თუმცა, ფინანსთა მინისტრი დიმიტრი გვინდაძე 2012 წლის პირველი სექტემბრიდან პენსიების გაზრდას “რაციონალურ გადაწყვეტილებად” მიიჩნევს.
ექსპერტის თქმით, ქვეყანას საერთოდ არ გააჩნია საპენსიო სისტემა და რაიმე სახის საპენსიო მოდელი. არსებული პენსიები, რეალურად მხოლოდ სოციალური დახმარების, სოციალური შემწეობის ფუნქციას ატარებს და მას საპენსიო უზრუნველყოფასთან და საპენსიო სისტემასთან საერთო არაფერი აქვს: “ახალი შემოთავაზების მიხედვით, 67 წელს ზემოთ ასაკის პენსიონერებისთვის, განსხვავებული საპენსიო დანამატებით უზრუნველყოფა არის გათვალისწინებული. ცხადია, მთავრობა ამ გადაწყვეტილების მიღებისას ხელმძღვანელობდა პრინციპით _ ნაკლები დანახარჯები ჰქონოდა ბიუჯეტში, მაგრამ ის ფაქტი, რომ ქვეყანაში საპენსიო ასაკი 60 წელია, ხოლო საპენსიო დანამატები 67 წლის ასაკიდან დაენიშნებათ პენსიონერებს, მკვეთრად დისკრიმინაციული ხასიათისაა და ყოველგვარ ეკონომიკურ თუ სოციალური სამართლიანობის პრინციპს არის მოკლებული”, _ ამბობს ლევან კალანდაძე.
კალანდაძე, რომელიც “ახალი მემარჯვენეების” ეკონომიკური მიმართულების ხელმძღვანელიცაა, აღნიშნავს, რომ “მემარჯვენეებმა” წარადგინეს პროგრამა მოსახლეობის დაზღვევასთან დაკავშირებით, ხელისუფლებამ კი საკუთარი პროგრამა წარმოადგინა. კალანდაძეს მიაჩნია, რომ მთავრობის შემოთავაზებებში ბევრი რამ არ არის გათვალისწინებული: “დაზღვევის სახელმწიფო პროგრამის ფარგლებში, პენსიონერების მედიკამენტებით უზრუნველყოფის შემოთავაზებული სისტემა არასაკმარისია. ესენციური მედიკამენტები უმწეოებს უნდა აუნაზღაურდეთ არა 50 პროცენტით, არამედ 100%-ით. ასევე, უფასო უნდა იყოს ექიმის მიერ დანიშნული მედიკამენტები; მთავრობის მიერ შემოთავაზებული სქემა არ ითვალისწინებს მოსახლეობის იმ კატეგორიას, რომლებიც არ არიან არც უმწეოები და არც პენსიონერები. ასეთი დაუზღვეველი ადამიანები მთელი მოსახლეობის 60%-ზე მეტს შეადგენენ და ისინი საერთოდ მოკლებულნი არიან სამედიცინო პოლისების შეძენის შესაძლებლობას. სადაზღვევო ინდუსტრიას დღეს არანაირი მოტივაცია და სტიმული არ გააჩნია, რომ სახელმწიფო სამედიცინო დაზღვევის პროგრამით გათვალისწინებული სადაზღვევო პოლისები მოსახლეობის ამ კატეგორიას შესთავაზოს”, _ ამბობს კალანდაძე.
“ახალ მემარჯვენეებს” მიაჩნიათ, რომ “სამედიცინო სადაზღვევო პროდუქტების ხელმისაწვდომობის და მოსახლეობის მასობრივი დაზღვევის ხელშემწყობი გარემოს უზრუნველყოფის მიზნით, მთავრობამ უნდა შეიმუშაოს სპეციალური სისტემა და რიგი შეღავათები, რაც საშუალებას მისცემს სადაზღვევო კომპანიებს უმწეოთა სახელმწიფო სადაზღვევო პროგრამით გათვალისწინებული სადაზღვევო პოლისების ტიპის სადაზღვევო პროდუქტი, ანუ ხელმისაწვდომი სადაზღვევო პროდუქტი მასობრივად შესთავაზონ მოსახლეობის, პრაქტიკულად, ყველა კატეგორიას. პოლისების შემძენი პირები საკუთარი მოხმარებისთვის, თანამშრომლობისთვის, ან ოჯახის წევრებისთვის სადაზღვევო პოლისის შეძენის შემთხვევაში, ისარგებლებენ დაზღვევაში გადახდილი თანხების გამოქვითვის უფლებით.
კალანდაძე განმარტავს, რომ “ასეთი მიდგომა მნიშვნელოვნად გაზრდის როგორც ორგანიზაციების, ასევე მოსახლეობის ინტერესს და მოტივაციას, ჩაერთონ სამედიცინო დაზღვევის პროგრამებში და საზოგადოებაში გაჩნდება დამატებითი ეფექტური სოციალური გარანტიების მოქნილი და შედეგზე ორიენტირებული მექანიზმი”.
