ევროპის უშიშროებისა და თანამშრომლობის ორგანიზაციის საპარლამენტო ასამბლეის ბოლო სხდომა უკრაინის კრიზისი თემას დაეთმო. ვენაში, ჰოფბურგის კონგრეს ცენტრში, სამი კომიტეტის გაერთიანებულ სხდომაზე სხვადასხვა ქვეყნის 60-მდე პარლამენტის წევრმა, საკუთარი სახელმწიფოების პოლიტიკური შეფასებები და კრიზისის დაძლევის ხედვები წარმოადგინეს.
საქართველოს დელეგაციიდან, ზამთრის სესიის გაერთიანებული კომიტეტების სხდომაზე, დელეგაციის ხელმძღვანელი, საგარეო ურთიერთობათა კომიტეტის თავმჯდომარე, თედო ჯაფარიძე და დელეგაციის წევრი, საპარლამენტო ასამბლეის ვიცე-პრეზიდენტი, გიორგი წერეთელი წარდგნენ.
საქართველოს საპარლამენტო დელეგაციის წევრებმა ეუთო-ს საპარლამენტო ასამბლეაზე უკრაინის კრიზისის თაობაზე მოხსენებები წაიკითხეს.
"გამოსვლის დასაწყისში კიდევ ერთხელ მსურს ხაზი გავუსვა საქართველოს პოზიციას უკრაინის ტრაგიკულ კრიზისთან მიმართებით – ჩვენ ვართ ამ სახელმწიფოს სუვერენიტეტისა და ტერიტორიული მთლიანობის მყარი მხარდამჭერები! უკრაინული ქალაქის, დებალცევოს დაცემის შესახებ მიღებული ინფორმაცია არა მხოლოდ აკნინებს, არამედ მნიშვნელობას უკარგავს მინსკის მეორე შეთანხმებას ცეცხლის შეწყვეტის თაობაზე. ევროპას გულწრფელად სჯეროდა, რომ ეს შეთანხმება იქნებოდა უფრო ფართომასშტაბიანი საბოლოო გადაწყვეტილების საფუძველი. თუმცაღა, ცეცხლის შეწყვეტის შესახებ შეთანხმების დარღვევის ძირითად მიზეზს წარმოადგენს ის, რომ რუსეთის ფედერაცია უარზეა აღიაროს საკუთარი პასუხისმგებლობა კონფლიქტში მონაწილეობაზე და ამგვარად შეასრულოს მინსკის შეთანხმებით, ან რაიმე სხვა შეთანხმებით გათვალისწინებული ვალდებულება.
ამგვარი არაგულწრფელი დამოკიდებულება ნაცნობია საქართველოსთვის – ჩვენც გამოგვიცდია მსგავსი ტიპის მოქმედებები, როცა სეპარატისტულ ძალებს იხსნიდნენ ხოლმე ე.წ. „მოხალისეები“, გაურკვეველი „მწვანე კაცუნები“. ახლა იგივე „მოხალისეებმა“ შეცვალეს სუვერენული ქვეყნის მთელი სივრცე. ვერც გაერომ და ვერც ეუთომ ვერ მოახერხეს გაურკვეველი ნიშნის მატარებელი შეიარაღებული ნაწილების მონიტორინგი, აღარაფერს ვამბობთ მათ შეჩერებაზე. მშვიდობისმყოფელობა, ცეცხლის შეწყვეტის შეთანხმება, დიპლომატია, როგორც ასეთი, შეუძლებელია ისეთი სახელმწიფოების პირობებში, რომლებიც არ იღებენ პასუხისმგებლობას საკუთარ ქმედებებზე. ასეთი სიტუაციის დროს ვიღებთ არა მშვიდობის დამყარების მცდელობას, არამედ მიწისა და ტერიტორიების დაქუცმაცების ძალისხმევას.
უნდა გვახოვდეს, რომ წესების დაცვა დიპლომატიის აუცილებელ წინაპირობას წარმოადგენს. თუ არ იქნება გათვალისწინებული სამართლებრივი პრინციპები, მსოფლიო ამას აღიქვამს როგორც რუსეთთან კონფლიქტის დიპლომატიის გზით მოგვარების უპერსპექტივობას. ეს სახიფათო გაკვეთილია! ამ გაკვეთილის დავიწყებას ცდილობს ევროპა 40 წლის განმავლობაში, ასეთ გაკვეთილებს პატივს საბჭოთა კავშირი სცემდა, ცივი ომის დროსაც კი. ეს გაკვეთილი უნდა გაითვალისწინოს რუსეთმა საკუთარი ინტერესებიდან გამომდინარე.
ჩვენ გვჯერა, რომ დიპლომატიას შანსი უნდა მიეცეს. ამაში ჩვენ ფინანსურ და ადამიანურ რესურსებს ვდებთ. თუ არ მოხდება ამ მოსაზრებების შენარჩუნება და ლეგიტიმაცია, ჩვენ მოგვიწევს ცხოვრება უფრო სახიფათო დროს ვიდრე ცივი ომის ეპოქაში – ტომას ჰობსის სამყაროში, რომელიც ყველა ჩვენთაგანის წინააღმდეგ იქნება მიმართული“, – განაცხადა თავის გამოსვლაში თედო ჯაფარიძემ.
ასევე მწვავე და რადიკალური ზომების გატარების მოთხოვნით გამოვიდა თავის გამოსვლაში გიორგი წერეთელი. მან კიდევ ერთხელ მოუწოდა ევროპას და ცივილიზებულ სამყაროს რუსეთის აგრესიული ქმედებების დაგმობისკენ და მინსკის შეთანხმებების შესრულების აუცილებლობაზე ისაუბრა.
უკრაინის კრიზისზე მსჯელობით საპარლამენტო ასამბლეის ზამთრის სესია დასრულდა. აღნიშნული ფორმატის მომდევნო საერთაშორისო ფორუმი 6-10 ივლისს ფინეთის დედაქალაქ ჰელსინკში გაიმართება.
