1991-1992 წლების სახელმწიფო გადატრიალების შემდეგ, ძალაუფლება ხელში აიღო დროებით შექმნილმა საქართველოს რესპუბლიკის სამხედრო საბჭომ. სახელმწიფო საბჭოს არსებობისთვის სამართლებრივი საფუძვლის არარსებობის გამო, საჭირო იყო ხელისუფლების ლეგიტიმაცია, რისთვისაც 1992 წლის 1 მაისს მიიღეს გადაწყვეტილება და 11 ოქტომბერს არჩევნები დანიშნეს.
1992 წლის 11 ოქტომბერი საპარლამენტო არჩევნები შერეული სისტემით გაიმართა. მისი ჩატარების წესი მნიშვნელოვნად განსხვავდებოდა სხვა არჩევნებისაგან. მაჟორიტარული საარჩევნო სისტემის საფუძველზე აირჩიეს 75 დეპუტატი (ერთმანდატიანი ოლქებიდან), პროპორციული სისტემით კი (მრავალმანდატიანი ოლქები) 150 დეპუტატი. 1992 წლის არჩევნების დროს მაჟორიტარული და პროპორციული არჩევნებისათვის სხვადა სხვა ოლქები იყო გამოყოფილი.
პროპორციული არჩევნებისათვის შეიქმნა 10 მსხვილი მრავალმანდატიანი საარჩევო ოლქი. თითოეულში ამომრჩევლთა რაოდენობა 230 ათასიდან 250 ათასამდე მერყეობდა. პროპორციულ სისტემაში კენჭისყრა ხდებოდა სამბალიანი სისტემით (თითოეულ ამომრჩეველს ჰქონდა 3 ხმა). კვოტების დადგენა და ხმების დათვლა ხდებოდა მრავალმანდატიანი ოლქების დონეზე, დარჩენილი ხმები პრეფენციის წესით ნაწილდებოდა საერთო ეროვნულ დონეზე.
არჩევნებში მონაწილეობას იღებდა 36 პოლიტიკური პარტია და ბლოკი და მათი 4 ათასი კანდიდატი. არჩევნებში რეგისტრირებული 3,466,677 ამომრჩევლიდან 2,592,117 -მა (74.77%) მიიღო მონაწილეობა.
პარლამენტში 24 პარტია მოხვდა: ბლოკი "მშვიდობა" _ 29 მანდატი; ბლოკი "11 ოქტომბერი" _ 18 მანდატი;. ბლოკი "ერთობა" _ 14 მანდატი;. ეროვნულ–დემოკრატიული პარტია _ 12 მანდატი;. საქართველოს მწვანეთა პარტია _ 11 მანდატი; დემოკრატიული პარტია _ 10 მანდატი;. "ქარტია 91" _ 9 მანდატი; ქართველ ტრადიციონალისტთა კავშირი _ 7 მანდატი; ილია ჭავჭავაძის საზოგადოება _ 7 მანდატი; სრულიად საქართველოს მერაბ კოსტავას საზოგადოება _ 5 მანდატი;. საქართველოს ეროვნული თანხმობისა და აღორძინების კავშირი _ 4 მანდატი; საქართველოს მშრომელთა სოციალისტური პარტია _ 4 მანდატი; ხალხთა მეგობრობისა და სამართლიანობის პარტია – 2 მანდატი; საქართველოს ღვთიშვილთა კავშირი _ 2 მანდატი; საქართველოს სოციალური სამართლიანობის კავშირი _ 2 მანდატი; საქართველოს სრულიად დემოკრატიული პარტია _ 2 მანდატი; სრულიად საქართველოს მიწადმოქმედთა კავშირი _ 2 მანდატი; საქართველოს ეროვნული დამოუკიდებლობის პარტია _ 4 მანდატი; საქართველოს მთიელთა კავშირი _ 1 მანდატი; მამულის აღორძინების საზოგადოება – 1 მანდატი;. ბლოკი "საქართველოს ეროვნული ერთიანობის პარტია და მთიელთა პოლიტიკური კავშირი" _ 1 მანდატი; საქართველოს სახელმწიფოებრივ ეროვნული პარტია _ 1 მანდატი; საქართველოს რადიკალური მონარქისტული კავშირი _ 1 მანდატი; საქართველოს კონსტიტუციურ დემოკრატიული პარტია _ 1 მანდატი.
გურიაში ხმების ყველაზე დიდი რაოდენობა "მწვანეებმა" მიიღეს, რომელსაც მხარეში ია მამალაძე წარმოდგენდა.
ვლადიმერ სიხარულიძე 1992 წელს ჩოხატაურის საარჩევნო კომისიის თავმჯდომარე იყო. შენობაში, სადაც დღეს ნაციონალური მოძრაობის ოფისია განთავსებული, როგორც თვითონ ამბობს, ბიულეტენებს იარაღით იცავდნენ.
_ მძიმე ტექნიკა, ბეტერიიც კი გვყავდა ჩამოყვანილი, რაიმე რომ არ მომხდარიყო. ბიულეტენებს იარაღის თანხლებით ვარიგებდით. მაშინ საკმაოდ ცუდი დრო იყო, თუმცა შემიძლია ვთქვა, რომ ეს იყო ერთ-ერთი საუკეთესო არჩევნები საქართველოს ისტორიაში. არჩევნები, სადაც არც გაყალბება იყო და არც სხვა მსგავსი რამ. შედეგად მივიღეთ მრავალპარტიული და კარგი პარლამენტი, რომელმაც 1995 წელს მიიღო კონსტიტუცია, _ იხსენებს ჩვენთან საუბრისას სიხარულიძე.
ამომრჩევლები, რომლებიც 1992 წლის არჩევნებში იღებდნენ მონაწილეობას ამბობენ, რომ მაშინდელმა მაჟორიტარმა კანდიდატმა გასამარჯვებელი ხმები რამდენიმე გრამი კარაქის ფასად მოიპოვა.
იმ პერიოდის პოლიტიკოსების და კანდიდატების ნაწილს დღეს წარსულზე საუბარი არ სურთ. მათ შორის, ჩოხატაურის მუნიციპალიტეტის მოქმედ გამგებელს ირაკლი კუჭავას, რომელიც 1992 წლის არჩევნებში კენჭს იყრიდა. კუჭავა ამბობს, რომ 1992 წელს განვითარებული მოვლენები დღეს საინტერესო არ არის.
აღნიშნულ თემაზე მომზადებული სიუჟეტი _ "პოლიტმეხსიერება" შეგიძლიათ ნახოთ G-News TV-ის ყოველკვირეულ გადაცემაში "კვირის თემა" მოცემულ ლინკზე
