საგარეო საქმეთა ყოფილი მინისტრი და პარტია "საქართველოს გზის" საპატიო თავმჯდომარე სალომე ზურაბიშვილი მიიჩნევს, რომ ქართული პოლიტიკიდან დაბალანსებული პროდასავლური ნიშა უკვე გამქრალი არის. ამ თემაზე იგი "გურია ნიუსთან" ინტერვიუში საუბრობს, სადაც საქართველო-რუსეთის ურთიერთობებს, მთავრობის საგარეო თუ საშინაო პოლიტიკას, ქვეყნის წინაშე მდგარ გამოწვევებსა და სხვა საკითხებს ეხება. ამასთან, იგი "ნაციონალურ მოძრაობასთან" თანამშრომლობას, გარკვეული პირობებით, არ გამორიცხავს.
კითხვაზე – ხომ არ ვიმყოფებით რუსული ჰიბრიდული ომის სტადიაში, – ზურაბიშვილი ამბობს, რომ რუსეთი ჩვენთან პირდაპირ ომს აწარმოებს ტერიტორიების დაპყრობით და ძალიან ღიად გაცხადებული მიზნებით. რაც შეეხება, ამავე კონტექსტში საინფორმაციო ომისა და ამ მიმართულებით ანტიდასავლური კამპანიის გაძლიერების საკითხს, იგი აღნიშნავს, რომ ეს უფრო მეტად "ჩვენი ბრალია" და ამ პროცესში ხაზს "ნაციონალური მოძრაობის" როლს უსვამს.
სალომე ზურაბიშვილი: _ ის, რომ საქართველოში პროდასავლური მიმართულებები შესუსტდა, პირდაპირ კავშირშია "ნაციონალებთან", რომელთაც საკუთარი თავი რაც მეტად პროდასავლურ ნიშასთან გაიგივებით გამოიჩინეს, უფრო გაიზარდა ანტიდასავლური ფონიც.
ჩვენ პროდასავლური ერი ვართ, რადგან ქართველები ვართ, მორჩა, ამას არ სჭირდება მტკიცება. ხელისუფლებაც პროდასავლურია, მაგრამ პასიური. ანუ ასოცირებაზე ხელს აწერს, მაგრამ ამ საკითხით დიდად დატვირთული არაა. "ნაციონალები" ამ დროშას ატარებენ, მაგრამ ოდიოზურებად რჩებიან. ქართული პოლიტიკიდან დაბალანსებული პროდასავლური ნიშა უკვე გამქრალი არის, თუ მისი დაკავება ალასანიამ ვერ შეძლო. მცდელობა, რომ მას "ნაციონალებთან" აიგივებენ, (ანუ თუ პროდასავლური ხარ, მაინცდამაინც მათთან უნდა იყო) პროდასავლურობას ძირავს.
_ როგორ შეაფასებთ მთავრობის პოლიტიკას რუსეთთან მიმართებაში და რას ფიქრობთ, რა გზა უნდა აირჩიოს საქართველომ მასთან ურთიერთობაში?
_ დღეს რუსეთთან პოლიტიკის წარმოების არავითარი გზა არ არსებობს, რადგან ის მთელ გარე მსოფლიოსთან პირდაპირ კონფრონტაციაზეა გადასული. ამ შემთხვევაში კი, რუსეთთან პატარა საქართველოს ცალკე პოლიტიკა აბსურდია. რუსეთს არ აქვს უნარი ნამდვილი სტრატეგია აწარმოოს. მას თავისი ძველი იმპერიალისტური ინსტინქტების ინერცია აქვს. ეს კი, პოლიტიკა და სტრატეგია არ არის. ამიტომ, რა პრეტენზიები გვაქვს, რა პოლიტიკას უნდა აწარმოებდეს ხელისუფლება, მე არ მესმის. აბაშიძე-კარასინის კომისიაც რომ არსებობს, მისი აზრი და დანიშნულება რა არის, არ ვიცი.
ეს არ ნიშნავს, რომ ყველა გზა სამუდამოდ გადაკეტილია და რუსეთთან დიალოგი არასდროს არ უნდა იყოს. თუმცა, დღეს პუტინი ცხენზეა შემჯდარი და დიალოგის რეალური საშუალება არ არსებობს. ამიტომ, დაველოდოთ.
შემდეგ სავაჭრო ურთიერთობები ბუნებრივად იქნება, რამდენადაც ორივე ქვეყნის ინტერესებშია. ჩვენი პრობლემა რუსეთთან ურთიერთობაში ცხინვალი და აფხაზეთია. ამის მიმართ უნდა გვქონდეს ხედვა და პოლიტიკა. თორემ, დანარჩენს არც კარასინი სჭირდება და არც აბაშიძე.
ჩვენი მთავარი დაცვა ჩვენივე პერპექტივების კარგად დანახვაა. არც რაღაც ყალბ ფსევდოპროდასავლურობაში გადავვარდეთ და არც ყველა საშუალება გავუხსნათ რუსეთს. ამისთვის უნდა ვიცოდეთ, საითკენ მივდივართ, რა ქვეყანას ვაშენებთ, რა ინსტიტუტებს ვაძლიერებთ.
_ რა ძირითად გამოწევებს გამოყოფდით, რაც დღეს საქართველოს წინაშე დგას?
_ განვითარების ხედვა არ ჩანს. "ნაციონალების" პერიოდში ბიზნესზე ზეწოლის გამო ეკონომიკა გაჩერებული იყო. აქედან გამოვედით, მაგრამ სხვა პრობლემა დგას – ბიზნესი ისევ შეჩერებულია, რადგან ვერ ხედავს საითკენ მიდის ქვეყანა. როგორც საგარეო პოლიტიკაში გვაკლია სამოქმედო გეგმა, ასევე შიგნითაც არ ჩანს ეს. ხელისუფლების სამოქმედო გეგმა ქაღალდზე, ალბათ, არსებობს, მაგრამ საზოგადოებისთვის ახსნილი არაა არც მთლიანობაში მთავრობის და კონკრეტულად სხვადასხვა სამინისტროების სტრატეგია.
კულტურის მინისტრი ისე დაინიშნა, არ ვიცით, რატომ გათავისუფლდა წინა და ახალი რა სამოქმედო გეგმით შემოვიდა, რა არის მისი პრიორიტეტები და ა.შ. ერთადერთი მინისტრი, რომლის სამოქმედო გეგმაც მეტ-ნაკლებად ჩანს, ჯანდაცვის მინისტრია. დანარჩენების არაფერი არ ვიცით და ეს ძალიან დიდი ნაკლია, რადგან ქვეყანაში რომ დინამიკა და საზოგადოების ჩართულობა შემოიტანო, გჭირდება ხედავდე საითკენ მიდიხარ.
_ მომავალ პარლამენტში ძალთა შესაძლო გადანაწილებაზე რას ფიქრობთ?
_ ფაქტია, რომ "ქართულ ოცნებას" აღარ ექნება მაღალი მაჩვენებლი. ხელისუფლება, მეტადრე ნაციონალების პერიოდიდან, ძალიან მაღალი რეიტინგით მოდის და ვერასდროს ვერ აკმაყოფილებს ამომრჩევლის იმ მოლოდინებს, რასაც თავიდან ქმნის. შესაბამისად, ნელ-ნელა მისი რეიტინგი მცირდება. ეს ნორმალური პოლიტიკური პროცესია.
არ ვიცი, როგორ გადანაწილდება. ვიტყვი, რომ პარლამენტში ეს ხელისუფლება 4 წლით ავირჩიეთ და მოვითხოვოთ, თავისი საქმე უკეთ აკეთოს. ამ პროცესში ოპოზიციის როლი დიდია. სამწუხაროდ, "ნაციონალებმა" პარლამენტში ოპოზიციის მონოპოლიზაცია მოახდინეს, რაც ხელისუფლებას კომფორტს უქმნის. ვერ მიხვდნენ, რომ ხელისუფლებას სერიოზული ოპოზიცია სჭირდება და არა – ჩასაფრებული. რეალური ოპოზიციის როლი შესაძლოა, ალასანიას პარტიამ იკისროს და ვნახოთ, რამდენად შეძლებენ.
_ ივანიშვილი მუდმივად აკრიტიკებს "რესპუბლიკელებს", რომ ისინი ვერ მალავენ სიმპატიას ალასანიას მიმართ…
_ დღეს აუცილებელია ვინმემ ოპოზიციის როლი იკისროს, რათა ხელისუფლება თავის კომფორტსა და მიძინებას არ მიეცეს. ამისთვის, ხელისუფლებაც უნდა მიხვდეს, რომ მას ასეთი ოპოზიცია სჭირდება. წინააღმდეგ შემთხვევაში, ასეთი ხელისუფლების პერიოდი ძალიან ცუდად დასრულდება. ის, რომ ვიღაც ოპოზიციაში გადადის ან მის შენიშვნებს უსმენს და ითვალისწინებს, რასაც ივანიშვილი, როგორც წესი, აკრიტიკებს, არ მესმის. კრიტიკის მოსმენა არ ნიშნავს, რომ ხელისუფლების წინააღმდეგ რაღაც ახალ ალიანსს ქმნი. "რესპუბლიკელები" უფრო მზად არიან ახალი ოპოზიციის კრიტიკა მოისმინონ და ეს კარგია.
_ როგორ ფიქრობთ, ივანიშვილი გავს სამოქალაო სექტორის წარმომადგენელს?
_ არა, ივანიშვილს რომ მეტი გავლენა აქვს დღევანდელ ხელისუფლებაზე, რომელიც მისი დანიშნულია, ეს ფაქტია. ამას არ სჭირდება დიდი გამოკვლევის ჩატარება. ეს იმის გავლენა არაა, რომ რაღაც არასამთავრობო ორგანიზაცია აქვს, რომელიც არანაირი აქტივობით არ გამოირჩევა. ეს უფრო ბიძინა ივანიშვილის პიროვნული გავლენაა იმ ადამიანებზე, რომლებიც მის ყოფილ გუნდს წარმოადგენენ.
_ სამომავლოდ ქართულ პოლიტიკაში თქვენს ადგილს სად ხედავთ და რომელიმე პოლიტიკურ პარტიასთან, თუნდაც "ნაციონალურ მოძრაობასთან", თანამშრომლობის შესაძლებლობას თუ უშვებთ?
_ თუ საჭირო ვიქნები, რატომაც არა. იმის მიხედვით გადავწყვეტ, თუ რა გამოწვევები იდგება ქვეყანაში. პარტიებთან თანამშრომლობის აუცილებლობას ვერ ვხედავ. "ნაციონალურ მოძრაობას" რაც შეეხება, იქ ძალიან სერიოზული კითხვის ნიშნებია. ჯერ ერთი, მათი პროდასავლურობის არ მჯერა, ფილოსოფიური მიდგომით, მეორეც – სანამ ეს სასამართლოები არ დასრულდება და სიმართლე არ გაირკვევა, ვინ იყო კრიმინალი, მანამდე მათთან რამე ურთიერთობა გამორიცხულია. ეს მათთვისაც მაქვს ნათქვამი.
