ოზურგეთის მუნიციპალიტეტში სოფლის მხარდამჭერი პროგრამით გათვალისწინებული სამუშაოები ჯერაც არ დასრულებულა. “გურია ნიუსი” შეეცადა აღნიშნული პროგრამის მიმდინარეობის შესახებ მოსახლეობის აზრი მოესმინა. _ რა იცით თქვენს სოფელში გახორციელებული პროექტების შესახებ? შესრულდა თუ არა სამუშაოები თქვენ მიერ დასახელებული პრიორიტეტების თანახმად და რამდენად კმაყოფილი ხართ გახორციელებული აქტივობებით?
ამ და სხვა კითხვებით “გურია ნიუსმა” სხვადასხვა სოფლის მცხოვრებლებს მიმართა. მათმა უმრავლესობამ ინკოგნიტოდ დარჩენა ისურვა.
ნატანებელი შ. გურგენაძე ამბობს, რომ მის სოფელში არაფერი გაკეთებულა, არც შარშან და არც წელს, ნატანებელი დ. უჯმაჯურიძე კი აქეთ გვეკითხება: _ ჯერ ერთი ის მითხარით, სოფლის განვითარებისთვის რა კეთდება საერთოდ? ჩვენთვის უმთავრესი სოფლის მეურნეობაა და ისიც ჩამკვდარია. სოფლის მეურნეობის მინისტრი გაათავისუფლეს, მაგრამ თუ დაადგინა, ძროხა დედალი იყო თუ მამალი, ანდა, ახალმა მინისტრმა თუ იცის რომელი _ რომელია? როგორ უნდა მასწავლოს ექიმმა სოფლის მეურნეობა? ჩვენთან რომ ამერიკის ელჩი იყო ჩამოსული, რა უნდოდა? ჩვენ შეგვხვდა, გლეხებს? ჩვენი აზრი აინტერესებდა? რა გააკეთეს? ძველი დაანგრიეს და ახალი არაფერი გაუკეთებიათ, შეღებეს შენობები. ერთი ის არის, რომ დენი მოგვეწოდება სოფელს და ისიც ძალიან ძვირია. სხვა განვითარება და სიახლე არაფერი შეინიშნება, პირიქით, რაც იყო, ისიც დაანგრიეს და მოიპარეს.
_ რა დაანგრიეს?
_ ყველაფერი. ხალხმა მოიპარა, უფროსმა გაყიდა. ხალხი იმიტომ ქურდობს, რომ სახლში მიიტანოს, ამიტომაა დანგრეული ქვეყანა. კი, ბატონო, მე, სააკაშვილს ბევრ რამეში ვემხრობი, მაგრამ ბევრი ეშლება. ჩვენი სოფელი ერთ-ერთი ყველაზე ძლიერი იყო გურიაში საკუთარი შემოსავლებით, მაგრამ დღეს არაფერი აღარ ფუნქციონირებს. 20 წელია ნატანებში ხალხს სახლზე ლურსმანი არ მიუჭედებია. კიდევ კარგი, უმრავლესობა ივანიშვილმა დაასაქმა. საქართველო საცოდავ დღეში იქნება მანამ, სანამ სოფელს თავისი ბიუჯეტი არ ექნება.
ოზურგეთის მუნიციპალიტეტის სოფელ ნატანების რწმუნებული “გურია ნიუსთან” საუბარში აღნიშნავს, რომ სოფელში სოფლის მხარდამჭერი პროგრამით გათვალისწინებული პროექტების შესრულება ჯერ არ დამთავრებულა:
_ მიდის მუშაობა, ჩვენ გვიან დავიწყეთ, თუმცა, ვადები გვაქვს და ამ ვადებში მოვაგვარებთ.
_ რა იყო სამუშაოების გვიან დაწყების მიზეზი?
_ მიზეზები არ ვიცი.
_ რა სამუშაოებს ახორციელებთ?
_ ჩვენს სოფელში, ძირითადად, წყლის ჭაბურღილების აღდგენა მიმდინარეობს. რამდენიმე უბანში სამუშაო დამთავრდა, რამდენიმეში _ გრძელდება.
_ როგორც თქვენი სოფლის ერთ-ერთი მცხოვრები ამბობს, სოფელში არაფერი გაკეთებულა. პირიქით, დანგრეულია ყველაფერი და არც სოფლის პროექტების შესახებ სმენია.
_ შეიძლება თქვან, არიან მასეთი ადამიანები, ვინც არ იცის ამის შესახებ და არც კრებებში მიუღიათ მონაწილეობა.
სოფელ დვაბზუს მკვიდრი ე. ლომინაძეს აღნიშნული პროგრამის შესახებ საერთოდ არ სმენია: _ სოფლის მხარდამჭერი პროგრამა? ასეთი არსებობს? არ ვიცოდი, ასეთი პროგრამა თუ არსებობდა საერთოდ.
სოფელ ბახვში მცხოვრები მ. გაბედავა ამბობს, რომ მის სოფელში გზები დააგეს, სკოლა გაარემონტეს, ახლა გაზი შეჰყავთ და საერთოდ, მისი თქმით, ყველაფერს აკეთებენ.
სოფელ ბოხვაურის რწმუნებულის მოვალეობის შემსრულებლის ზურაბ კილაძის თქმით, სოფლის მხარდამჭერი პროგრამით გათვალისწინებული პროექტების გახორციელება ჯერ არ დასრულებულა.
_ ბატონო ზურაბ, სულ რა თანხა გქონდათ გადმორიცხული, რისი გაკეთება იყო ამ თანხით გათვალისწინებული და რა ეტაპზეა სამუშაოები?
_ სულ არის 36 ათას ლარამდე, თუ არ ვცდები. უნდა გაკეთებულიყო ბაღი, გარემონტებულიყო სოფლის ადმინისტრაციული შენობა. ორ ადგილზე გაკეთდა ჭაბურღილი, რადგან წყლის პრობლემა ჰქონდა სოფელს; გავარემონტეთ ხიდი. ბაღის რემონტი ჯერ არ დასრულებულა, არც ადმინისტრაციული შენობის რემონტია დასრულებული. ისე, მალე დასრულდება.
სოფელ ცხემლისხიდში მცხოვრები ერთ-ერთი ქალბატონისთვისაც უცნობია, რა გაკეთდა მის სოფელში: _ რა უნდა გაკეთებულიყო? თქვენ მითხარით და გაგცემთ პასუხს. ჩვენთან არავინ არ მოსულა და არაფერი უკითხავს. ახლა არჩევნები რომ მოვა, დატრიალდებიან ათი დღით ადრე, რა გინდათო. ხალხს აქვს სიტყვის თქმის უფლება? ხალხი სჭირდებათ წინასაარჩევნოდ, თორემ ისე ძაღლად არ აგდებენ. წამოგვიგდებენ “მეშოკით” პურის ფქვილს და ამით უნდათ ხალხის გულის მოგება. ისე, რა გვჭირდება, ამის მკითხველიც არავინაა, _ გვითხრა მან.
_ გაკეთებულს ვერაფერს ვხედავ და არც გამიგონია, რომ გაკეთებულიყოს რამე. აგი ხელისუფლება ცოცხლად გვატყავებს. რაც დაგვიტოვეს კომუნისტებმა, ისიც დანგრეულია, ამშენებელი არის ვინმე? _ გვითხრა ცხელმლისხიდში მცხოვრებმა 80 წლის დ. ელიაძემ.
სოფელ მელექედურში მცხოვრები მამაკაცი აღნიშნავს, რომ მის სოფელში არც გაზია, არც წყალი და არც გზა, სოფელ მშვიდობაურის მკვიდრი გ. მუქბანიანი კი ამბობს, რომ მის სოფელში ჯერ არაფერი გაკეთებულა: _ დაგვპირდნენ და ველოდებით, როდის გავახსენდებით. შარშან უნდა მოეტანათ 5 მანქანა ხრეში და მოიტანეს ორი მანქანა. სამაგიეროდ, აწი რომ მოვლენ საარჩევნოდ ხელმოსაწერად, უარს მიიღებენ. შარშან დეპუტატს წინასაარჩევნოდ დიდი დაპირებები ჰქონდა. თავი მოგვიყარა ცენტრში და არაფერი რომ არ გაგვიკეთა, წელს ჩვენს სიახლოვეს არავის გავიკარებთ.
სოფელ ნაგომრის ერთ-ერთი მცხოვრები იმ პრობლემაზე გვესაუბრება, რაც თანასოფლელებს აწუხებთ: _ რომ უჭირს ხალხს, იმიტომ არ ლაპარაკობს. რა აზრი აქვს ლაპარაკს? ვინმე გვაქცევს ყურადღებას? არც უთქვამთ, არც დაუძახიათ, რა გავაკეთოთო. არც არაფერი ვიცი მაგის შესახებ. რას მიზამენ, სიმართლე რომ ვთქვა, ჯვარზე გამაკრავენ? ან მაინც დაჭერილი არ ვარ? სამხედრო ინვალიდი ვარ. მარტოხელა, წამლის ფულიც კი არ მაქვს! _ თქვა ჩვენთან საუბარში გ. დიაკონიძემ.
“გურია ნიუსის” კითხვებს ოზურგეთის მუნიციპალიტეტის გამგეობის ინფრასტრუქტურისა და საინვესტიციო გარემოს განვითარების სამსახურის უფროსმა კონსტანტინე სარიშვილმა მხოლოდ წერილობითი ფორმით უპასუხა.
_ რა ეტაპზეა სოფლის პროგრამის ფარგლებში გასახორციელებელი სამუშაოები? დასრულდა თუ არა პროექტებზე მუშაობა, და თუ არა, რატომ?
_ სოფლის პროგრამის ფარგლებში გასახორციელებელი სამუშაოები დასრულებულ სახეს მალე მიიღებს. უამინდობამ და ცალკეულ ადმინისტრაციულ ერთეულში ცვლილებების აუცილებლობამ განაპირობა ის, რომ რამდენიმე სოფელში ინფრასტრუქტურული სამუშაოები დღესაც მიმდინარეობს, თუმცა, სამუშაოების ძირითადი ნაწილი სოფლებში დასრულებულია. მაგალითად, სამუშაო 100%-ითაა შესრულებული შემდეგ ადმინისტრაციულ ერთეულში: ლაითური, ნარუჯა, ურეკი, ნასაკირალი, ასკანა, ბაილეთი, გურიანთა, ვაკიჯვარი, თხინვალი, კონჭკათი, მელექედური, მერია, მთისპირი, ნაგომარი, სილაური, ჭანიეთი, ჯუმათი, ლიხაური, მაკვანეთი; სამუშაოების 80% დასრულებულია სოფლებში: ბოხვაურში, დვაბზუში, შემოქმედში, ძიმითში, ცხემლისხიდში; ნაწილობრივ შესრულებულია სამუშაოები შრომაში, ნატანებში, ბახვში, სოფელ ოზურგეთში. ამასთან, პროექტის მსვლელობისას წარმოშობილი ეკონომიებით დამატებით დაიგეგმა ახალი პროექტები, რაც სოფლის პროგრამით არ იყო გათვალისწინებული და მიმდინარეობს სახარჯთაღრიცხვო დოკუმენტაციის დაზუსტება.
_ წინასწარ იყო თუ არა შესწავლილი სოფლის პრობლემები?
_ რა თქმა უნდა, ოზურგეთის მუნიციპალიტეტის გამგეობა და საკრებულო დროდადრო მართავდა შეხვედრებს სოფლის მოსახლეობასთან. ადგილზე ხდებოდა პრობლემათა შესწავლა და ანალიზი. მოსახლეობა გამოყოფდა იმ პრიორიტეტულ საკითხებს, რომლის მოგვარებასაც სოფლისათვის მნიშვნელოვნად მიიჩნევდა.
_ რა ვადებში უნდა დაწყებულიყო და დასრულებულიყო?
_ კონკრეტული პროექტის სირთულისა და მოცულობის გათვალისწინების შესაბამისად, ხდებოდა სახელშეკრულებო ვადების განსაზღვრა.
_ მიმდინარეობდა თუ არა მონიტორინგი პერიოდულად და თუ ხდებოდა მიმდინარე სამუშაოების ანალიზი?
_ ადგილობრივი ხელისუფლების წარმომადგენლები ტერიტორიული ორგანოების რწმუნებულებთან და ინსპექტირების ჯგუფთან ერთად, პერიოდულად ახორციელებდნენ მონიტორინგს. ხდებოდა მიმდინარე სამუშაოების კონტროლი და ანალიზი. აწყდებოდნენ გარკვეულ ხარვეზებსაც, რომელზედაც რეაგირება დროულად კეთდებოდა.
