ლაფანყურის სპეცოპერაციის ერთ-ერთმა მონაწილე ახმედ ჩატაევმა სოციალურ ქსელში ვიდეო მიმართვა გაავრცელა, სადაც ის მოჯაჰიდებსა და დაღესტნელებს მოუწოდებს, ხალიფატისთვის ბრძოლაში ჩაერთონ.
"მოვუწოდებ ჩვენს ძმებს, შემოგვიერთდით, გავზარდოთ ხალიფატის ტერიტორია და ილამის რელიგია."
ჩატაევი ახლა სირიაში, ჩრდილოკავკასიელების რუსეულენოვან ბატალიონს ახმედ შიშანის სახელით მეთაურობს.
შეგახსენებთ, რომ რუსეთის მოქალაქე, ავსტრიაში დევნილის სტატუსის მქონე და პანკისის სოფელ დუისში მცხოვრები ჩატაევი, 2012 წელს ლოპოტას ხეობაში დააკავეს, სამ თვეში კი გირაოს სანაცვლოდ გაათავისუფლეს.
მას ასაფეთქებელი მოწყობილობის შეძენა, შენახვა – ტარებაში ედებოდა ბრალი, თუმცა თავად ჩატაევი ყველა ბრალდებას უარყოფს.
აღსანიშნავია, რომ ჯერ კიდევ გასულ წელს, მთელ ჩრდილო კავკასიასთან ერთად, საქართველო ტერორისტების მიერ შედგენილ იმ რუკაზე აღმოჩნდა, სადაც სირიასა და ერაყში მებრძოლმა ექსტრემისტების ხელმძღვანელმა, შარიათის კანონებით ხალიფატის შექმნა დააანონსა.
ტერორისტული დაჯგუფება "ერაყისა და ლევანტის ისლამური სახელმწიფოს" მიერ დაანონსებული ერთიანი ისლამური სახელმწიფოს შექმნის იდეა, მომდევნო 5 წელიწადზეა გათვლილი. რუკაზე საქართველოსა და ჩრდილოეთ კავკასიასთან ერთად მოხვდა არაბეთის ნახევარკუნძული, თურქეთი, ჩრდილოეთ აფრიკა, აზია, ბალკანეთი, ყირიმი, ესპანეთი და პორტუგალია.
მიუხედავად იმისა, რომ ერაყისა და სირიის კონტროლირებად ტერიტორიაზე ექსტრემისტებმა უკვე გამოაცხადეს ისლამური სახალიფო, ქართველი ექსპერტები იდეის, რომელიც კავკასიის სახალიფოში მოქცევას ითვალისწინებს, რეალიზაციას სკეპტიკურად უყურებენ, თუმცა საფრთხეების არსებობას არ უარყოფენ.
"წმინდა ფსიქოლოგიური, იდეოლოგიური ომი მიმდინარეობს და მსგავსი ტიპის რუკები და წარმოდგენები ადრეც არაერთხელ გავრცელებულა. ეს არის სტრატეგიული მიდგომა, რომ მოსახლეობაზე ზემოქმედება მოახდინონ", _ აღნიშნავდა საქართველოს პარლამენტის თავდაცვის კომიტეტის თავმჯდომარე ირაკლი სესიაშვილი.
კავკასიელ ხალხთა კონფედერაციის პრეზიდენტი ზაალ კასრელიშვილი კი ამბობდა, რომ ამ იდეას განხორციელება არ უწერია, მაგრამ ასეთი ტიპის განცხადებები გარკვეულ საფრთხეებს შეიცავს.
"ის უქმნის კავკასიის მოსახლეობას საფრთხეს იმიტომ, რომ კავკასიაში ძალიან ბევრი რადიკალური ისლამის მიმდევარია და მეორე, ასეთი ტიპის განცხადებები რუსეთის ხელისუფლებას აძლევს თავისი სპეცსამსახურები და ფედერალური არმია გააძლიეროს, გაააქტიუროს და საერთაშორისო საზოგადოების თვალში პასუხი არ აგოს."
თუმცა, ამჯერად, ახმედ ჩატაევის მოწოდებას, ხალიფატისთვის ბროლაში ჩართვის შესახებ, მნიშვნელოვნად აფასებს ტელეკომპანია "მაესტროსთან“ საუბარში კავკასიოლოგი სულხან ბორძიკაშვილი.
მისი თქმით, ჩრდილოკავკასიაში ჩატაევს კარგად იცნობენ. ამიტომაც მისი ვიდეო მიმართვა ადგილობრივებზე მნიშნველოვან გავლენას მოახდენს.
რამდენად შესაძლებელია ხალიფატის საზღვრებში ქრისტიანული ქვეყნების, მოქცევა, ამაზე გასულ წელს ვრცლად ისაუბრა რუსეთის ისლამური კომიტეტის თავმჯდომარე ჰეიდარ ჯემალმა, რომელიც აღნიშნავდა, რომ ისლამის დაბადების პერიოდში მის ირგვლივ მხოლოდ ქრისტიანები იყვნენ, თუმცა ამას მუსლიმანებისთვის ხელი არ შეუძლია ამ ტერიტორიების დაკავებასა და არაერთი ხალიფატის შექმნაში.
ცნობისთვის, ხალიფატი ესაა სახელმწიფო წყობილების სისტემა, არაბების დაპყრობათა შედეგად შექმნილი ფეოდალური სახელმწიფო, რომლის სათავეშიც ხალიფა (ხელმძღვანელი, რომელსაც ყველა ემორჩილება) დგას.
რაც შეეხება შარიათის კანონებს, ესაა ისლამური კანონი, რომელიც ყურანსა და ტრადიციაზეა დაფუძნებული. შარიათის თანახმად, ადამიანთა ქმედებები შემდეგ კლასიფიკაციას ექვემდებარება: სავალდებულო; სასურველი; დაშვებული; გაკიცხული ან დაგმობილი; აკრძალული ქმედებები. სწორედ შარიათის კანონებზე დაყრდნობით ჩაქოლეს უკანასკნელ პერიოდში სირიაში 22 წლის გოგონა FACEBOOK-ის მოხმარებისთვის.
ამავე თემაზე: ევროპა თუ სახალიფო? – სად აღმოჩნდება საქართველო მომდევნო 5 წლის განმავლობაში
