კარტოფილის თესვის საუკეთესო თვედ თებერვალია მიჩნეული. ამ კულტურას მარტშიც ხშირად თესავენ, თუმცა, თესვის პერიოდებს შორის მცირე სხვაობას და უფრო ნაადრევ დათესვას მეურნეები ძირითადად ერთი მოსაზრებით ამჯობინებენ _ ადრე დათესილს ნაკლებად უჩნდება კოლორადოს ხოჭო და ამასთანავე გაზაფხულის დასრულებამდე პირველი მოსავალი აღებულია.
კარტოფილის კიბოს, ამ საშიში დაავადების გავრცელება უკვე აღინიშნა აჭარაში. თუმცა, როგორც აჭარის სოფლის მეურნეობის სამინისტროდან გვატყობინებენ, დროულად იქნა გამოყენებული ბრძოლის კომპლექსური ღონისძიებები, საკარანტინო, აგროტექნიკური და ქიმიური, რამაც შესაძლებელი გახადა წელს თესვის სეზონის წარმატებით დაწყება.
აგრონომი აკაკი ღლონტი განმარტავს, რომ კარტოფილის კიბო ახალი დაავადება არ არის:
_ კარტოფილის კიბო მეცხრამეტე საუკუნიდან არის ცნობილი, თუმცა, ჩვენში იყო გახმაურებული ფაქტები, როცა თურქეთიდან შემოიტანეს. როგორც მახსოვს, ამას ხელისუფლებისგან ქმედითი ნაბიჯი მოჰყვა და მინისტრის ბრძანებით, უკან გააბრუნეს. თუ კვლავ იქნება გამოვლენილი, აუცილებელია საკარანტინო ღონისძიებები ფიტოსანიტარული რეჟიმით. კიბოთი დაავადება კარტოფილის ყველა ორგანოს ედება. ყველაზე მეტად კი ტუბერი ავადდება. უჩნდება კორძები. აუცილებლად უნდა შეირჩეს ამ დაავადების მიმართ გამძლე ჯიშები. ვფიქრობ, წელს საგანგაშო ამ მხრივ არაფერია, თუმცა, უდიდესი სიფრთხილე გვმართებს. არავინ იცის, სად გაჩნდა პირველად ეს დაავადება. ამიტომ სულაც არ არის გასაკვირი, მოულოდნელად ვიხილოთ იქ, სადაც საერთოდ არ არის, _ ამბობს აკაკი ღლონტი.
თებერვლის შუა რიცხვებისთვის, აჭარის უმეტეს რაიონებსა და გურიაში ბევრმა უკვე დათესა კარტოფილი და თვის ბოლომდე ეს პროცესი დასრულდება. არა ერთი გამოკითხვა ცხადყოფს, რომ დღესდღეობით, კარტოფილის კიბოს საგანგაშო საფრთხე არ არსებობს, თუმცა, ყურადღება თითოეულ ფერმერს მართებს, ვისაც კი საკარმიდამო ნაკვეთში კარტოფილის კულტურა მოჰყავს.
