გურიაში ფურის ხელოვნური დანერგვა იმდენად წარმატებული გახდა, ბუნებრივად დაბადებული ტყუპიც უკვე ვეტექიმ თამაზ კილაძის მიერ დანერგვის შედეგი ჰგონიათ. თუმცა, როგორც ოზურგეთის სოფელ გურიანთის მკვიდრი ილია ტოტოჩავა გვეუბნება, მიუხედავად იმისა, რომ ძალიან მოსწონს აღნიშნული მეთოდი, არასოდეს მიუმართავს ვეტექიმისთვის, რადგან შინ ისეთი ჯიშის ძროხა ჰყავს, ტყუპების ნაკლებობას არ განიცდის.
ამჯერად ტოტოჩავების მეურნეობაში ტყუპი ნიკორა დაიბადა. როგორც ილია ტოტოჩავას მეუღლე, ქალბატონი ციალა გვეუბნება, მათ ოჯახში ეს უკვე მესამე შემთხვევაა, თან წარმატებული. თუმცა, ნიკორა ტყუპი, თან ერთი მოზვერი, მეორე კი დეკეული პირველად დაიბადა და ორივე საოცრად ენერგიული და ძლიერია. სახელებიც შეურჩევიათ, ბუღია და ნიკორა (დეკეულს თანდაყოლილი ნიშანი სახელად დაუტოვეს).
დედა ძროხა, რომლის მეცამეტე ხბოობაც არის ტყუპი ნიკორა, სულ ცოტა, ათ ლიტრს იწველება. როგორც ბატონი ილია ამბობს, ის გამომდგარი ჯიშია, თუმცა, გამორჩეული მზრუნველობითაც უვლიან.
_ საყოლს (როგორც გურიაში ეძახიან პირუტყვს), შვილივით მოვლა სჭირდება. აუცილებელია საუკეთესო კვება, ვეტერინარული ღონისძიებების დროული გატარება და არა ისე, მაინცდამაინც ხველა რომ დაახრჩობს და წამლისთვის მერე დავფაცურდებით. სისუფთავე, სათავსის განიავება თუ დათბუნება, როგორც წესი, ჩვენს უპირველეს საქმედ უნდა ვაქციოთ. თუ გვინდა, რომ რეალური შედეგი გვქონდეს. თუ ამ ყველაფერს გავითვალისწინებთ, შედეგი არ დააყოვნებს, _ გვეუბნება ქალბატონი ციალა და შენიშნავს, რომ ძროხები მარტო ქატოს ამარა არასდროს დაუტოვებია. სჯობს, თავად მიიკლო რაიმე, პირუტყვი კი არ დაამშიო, თორემ დაჩაჩანაკდება და მერე წამოდგომა გაუჭირდებაო.
სიმინდის ღერღილი, შავი პურის ფქვილი, ქატო, ასევე, სიმინდის ტაროსა და ჩალის დაქუცმაცებული კომბინირებული ნარევი, თივა და გაზაფხულზე კი ნოყიერი მწვანე ბალახის მასა _ აი, საკვები, რითაც ტოტოჩავების პირუტყვი ლაღად გამოიყურება და პატრონისთვის უდიდესი სიკეთე მოაქვს.
მასპინძელთა თქმით, მათ არა ერთი კლიენტი ჰყავთ, რომლებსაც ამ ჯიშის პირუტყვის გამრავლება სურთ.
_ ჩვეულებრივი, ჩვენებური ჯიშია. თუმცა, მოვლა გადამწყვეტ როლს თამაშობს. ფერმის მოვლის თავი ნამდვილად არ გვაქვს და ორი ძროხაც საკმარისია, რომ ოჯახს ეყოს. თუ სათანადოდ ვერ მოუვლი, უმჯობესია, სხვის ხელში გადაინაცვლოს. ახლა, ზამთრის პერიოდში ზოგ ისეთ ძროხას ვხედავ, მებრალება. თუ ვერ გამოკვებავ, უნდა გაყიდო _ ის ადამიანივითაა ოჯახში, უტყვია და შენ ამიტომ არ უნდა დაჩაგრო. მას თვალებით ბევრი რამის თქმა შეუძლია, ტირის კიდეც, _ ამბობენ ტოტოჩავები და მართლაც შვილებივით ეფერებიან ტყუპ ნიკორას. ხბოებს გამომეტყველებაზე ეტყობათ, რომ მართლაც პატივში არიან.
ციალა ტოტოჩავა ამბობს, რომ ხბოებს სამი ლიტრი რძე ჰყოფნით და დანარჩენ შვიდ ლიტრს საოჯახო საჭიროებისამებრ მოიხმარს.
ვეტექიმი თამაზ კილაძე მიიჩნევს, რომ ეს არის საუკეთესო შემთხვევა და ჩვენებური ჯიშის გამრავლების მიზნით, საუკეთესო ვარიანტი იქნება ამ პირუტყვისგან აღებული სპერმის დანერგვა:
_ სხვათა შორის, გურიანთაში მცხოვრები იური ტოტოჩავას ბუღა ჩემი დანერგილია. სწორედ ამ ბუღისგან ბუნებრივად ჩასახულია ეს ტყუპი ნიკორა, რომელიც ახლა ილია ტოტოჩავას ოჯახში დაიბადა _ ჩემი ხელი მანდაც ურევია, _ ღიმილით გვითხრა თამაზ კილაძემ.
