თბილისის ბაგა-ბაღების მართვის სააგენტოს ხელმძღვანელი თემურ თორდინავა საბავშო ბაგა-ბაღებში უვარგისი პროდუქტის არსებობის შესახებ ინფორმაციას უსაფუძვლოს და აბსურდულს უწოდებს. ამის შესახებ მან დღევანდელ პრესკონფერენციაზე განაცხადა.
"ყველა საბავშვო ბაგა-ბაღში შედის მხოლოდ და მხოლოდ შემოწმებული პროდუქცია, რომელსაც თან ახლავს შესაბამისობის სერთიფიკატი, ხოლო ხორცპროდუქტები, სპეციალურ ვეტერინალურ შემოწმებას გადის. აღნიშნული ინფორმაციის გავრცელებისთანავე, მოხდა მყისიერი რეაგირება, ბაგა-ბაღის დირექტორმა მიმართა სურსათის ეროვნულ სააგენტოს, რომელიც ადგილზე მივიდა მითითებულ ბაგა-ბაღში და განახორციელა მონიტორინგი. ჩვენ ხელთ გვაქვს მათი დასკვნა, რომ გავრცელებული ინფორმაცია არ შეესაბამება სიმართლეს.
სააგენტოს ახალი ადმინისტრაციის პირობებში შეიქმნა სპეციალური მონიტორინგის ჯგუფი, რომელიც სურსათის უვნებლობის და ჰიგიენის კუთხით ბაგა-ბაღებში პერმანენტულ მონიტორინგს ახორციელებს და პრევენციის მიზნით, გამოვლენილ დარღვევებზე გასცემს შესაბამის რეკომენდაციებს ახორციელებს სხვადასხვა ღონისძიებებს.
კიდევ ერთ გავრცელებულ ინფორმაციაზე, რომ ბაგა-ბაღები დახურულია დაინტერესებული პირებისთვის, განვმარტავთ, რომ ბაგა-ბაღებში მონიტორინგის და კონტროლის, პროდუქტთან ხელით შეხების უფლება აქვს მხოლოდ შესაბამის მაკონტროლებელ და ზემდგომ ორგანოს (ა(ა)იპ თბილისის საბავშვო ბაგა-ბაღების მართვის სააგენტოსა და სურსათის ეროვნული სააგენტოს). რაც შეეხება არასამთავრობო ორგანიზაციებს, მშობლებს და სხვა დაინტერესებულ მხარეებს, რა თქმა უნდა, აქვთ სამზარეულოსა და საწყობის ვიზუალური დათვალიერების უფლება შესაბამისი სანიტარულ-ჰიგიენური წესების დაცვით.
მივმართავ ჩვენი აღსაზრდელების მშობლებს, რომ იყვნენ მშვიდად და არ აყვნენ ცრუ ინფორმაციას, რომელიც ყოველგვარ საფუძველსაა მოკლებული და არანაირ ფაქტებს არ ეყრდნობა. ამ მიმართულებით ყველაფერი მინიტორინგის და კონტროლის ქვეშაა. მშობლებს ნებისმიერ საკითხთან დაკავშირებით შეუძლიათ მიმართონ ბაგა-ბაღების მართვის სააგენტოს, რომელსაც ყავს შესაბამისი კვალიფიკაციის მქონე სპეციალისტები", _ განაცხადა თემურ თორდინავამ.
შეგახსენებთ, რომ ანტიკორუფციული კავშირის თავმჯდომარემ გიორგი ბურჯანაძემ ბაღებში უხარისხო ხორცპროდუქტების შეტანის კორუფციულ სქემაზე ინფორმაცია გაავრცელა. მისი თქმით, ამის გამო ბავშვების მოწამვლის ფაქტებიც დაფიქსირდა:
"თბილისის მერიის ბაღების მართვის სააგენტო ხელს უწყობს ამ პრობლემის გაღვივებას, საუბარია უხარისხო პროდუქტის შეტანაზე კვების ბლოკში, რაც იწვევს პატარების ჯანმრთელობაზე უარყოფით ასახვას. ბევრი მათგანის მშობელი გარკვეული სახის ფინანსურ და მორალურ ზარალს ღებულობს. აქედან გამომდინარე, მერიის მაღალჩინოსნები, რომლებიც ამ კორუფციულ სქემაში არიან გარეული ნაცვლად იმისა, რომ ბავშვმა მიიღოს უმაღლესი ხარისხის პროდუქტი, ღებულობს 7-ლარიან ხორცს, რითაც წამლავენ ჩვენს პატარებს", _ აღნიშა ბურჯანაძემ.
