გურიის გუბერნატორობის ორი კანდიდატის _ გოჩა მეგრელიშვილისა და ვლადიმერ არობელიძის ოფიციალური ბიოგრაფიების უკან საზოგადოებისთვის საინტერესო ბევრი დეტალია.
www.gurianews.com-ზე წერილის _ „გურიის გუბერნატორობის კანდიდატები _ პრემიერის “იანვარი“ მარტშიც არ დადგა!“, გამოქვეყნების შემდეგ, სოციალური ქსელებით რამდენიმე მოქალაქე დაგვიკავშირდა და კანდიდატების წარსულის შესახებ გვესაუბრა.
როგორც გავარკვიეთ, ვლადიმერ არობელიძე ნასამართლევია _ იგი სისხლის სამართლის კოდექსის 180-ე მუხლით გაასამართლეს. არობელიძე ჩვენთან საუბრისას ამბობს, რომ ეს 2006 წელს მოხდა:
_ 8 თვე ვიჯექი ციხეში. იმ პერიოდში კოდუასთან ვიყავი დაპირისპირებული. როგორც ყველა ბიზნესმენი, იმ პერიოდში მეც 180-ე მუხლით (თაღლითობა) 
დამაკავეს. მოდაში იყო მაშინ ეს მუხლი. საპროცესოთი გამომიშვეს. ჩემი სურვილით მაჩუქებინეს ავტომანქანა BMW X5, 50 000 ლარი გადამახდევინეს და 3 წელი პირობითი სასჯელი მომცეს. მერე შემიწყალეს და ნასამართლეობა მომიხსნეს ორი წლის წინ, _ გვითხრა არობელიძემ.
არობელიძის ოპონენტები აღნიშნავენ, რომ გურიის გუბერნატორობის კანდიდატს ბანკის ვალები აქვს, რომელსაც არ იხდის და გადახდას სასამართლო აიძულებს.
"თბილისის სააპელაციო სასამართლოს სამოქალაქო საქმეთა პალატამ 2013 წლის 08 აპრილს განიხილა სს ,, ვითიბი ბანკი ჯორჯიას“ განცხადება საარბიტრაჟო გადაწყვეტილების ცნობისა და აღსრულების შესახებ. გვერდი 1 / 3თბილისის სააპელაციო სასამართლოს სამოქალაქო საქმეთა პალატის 2013 წლის 08 აპრილის განჩინების სარეზოლუციო ნაწილის მე-2 პუნქტი და მე-2 პუნქტის ,,ა“, ,,ბ“ ქვეპუნქტები, ასევე მე-3 პუნქტი: საქართველოს საარბიტრაჟო პალატის მუდმივმოქმედი არბიტრაჟის მიერ 2013 წლის 20 მარტის საარბიტრაჟო გადაწყვეტილება ცნობილ იქნეს და დაექვემდებაროს აღსრულებას შემდეგი სახით: ა) ა(ა) იპ სტუდია „ჯი ენ ეს _ დამოუკიდებელი ჟურნალისტები დამოუკიდებელი მედიისათვის“, ნანა ლეჟავა, ვლადიმერ არობელიძეს, გრიგოლ ლომიძეს და თენგიზ მეზურნიშვილის სს ,, ვი თი ბი ბანკი ჯორჯიას“ სასარგებლოდ სოლიდარულად დაეკისროთ 181054.46 ლარის გადახდა საიდანაც ძირი თანხაა 173 321.04 ლარი, საპროცენტო სარგებელია 4 232,28 ლარი, ხოლო პირგასამტეხლო 3 501.14 ლარი. მათვე სოლიდარულად დაეკისროთ საარბიტრაჟო მოსაკრებლის 5721.07ლარის გადახდა სს ,,ვი თი ბი ბანკი ჯორჯიას„ სასარგებლოდ. დაეკისროს ა(ა) იპ სტუდია „ჯი ენ ეს _ დამოუკიდებელი ჟურნალისტები დამოუკიდებელი მედიისათვის“, ნანა ლეჟავა, ვლადიმერ არობელიძეს, გრიგოლ ლომიძეს და თენგიზ მეზურნიშვილს სს ,,ვი თი ბი ბანკი ჯორჯიას“ სასარგებლოდ გადაწყვეტილების ცნობა-აღსრულების განცხადებაზე გადახდილი სახელმწიფო ბაჟის 5.431.63 ლარის ანაზღაურება,“ _ აღნიშნულია სასამრთლოს გადაწყვეტილებაში.
არობელიძე ამბობს, რომ ეს თანხა უკვე გადახდილია (ეს ინფორმაცია "გურია ნიუსს“ "ვითიბიბანკშიც“ დაუდასტურეს):
_ თანხა ბანკიდან სესხად აიღო სტუდია „ჯი ენ ეს“-მა და არა კონკრეტულად მე. ნანა ლეჟავა (ვლადიმერ არობელიძის მეუღლე. ნ. გ.), მე და კიდევ რამდენიმე ადამიანი ვიყავით თავდები. იმ პერიოდში „ქართუსთან“ ხელშეკრულების დადება გართულდა, ამიტომ, სანამ ხელშეკრულება დაიდებოდა, სესხი ავიღეთ. ვიცოდით, რომ ხელშეკრულება გაგრძელდებოდა 5-6 თვით, თუმცა, სხვადასხვა მიზეზით არ გაგრძელდა და დაგვრჩა ეს ვალი. „ვი თი ბის“ დავალიანება უკვე გაუსტუმრა ჩემმა მეგობარმა, „მედიქალკლაბის“ ხელმძღვანელმა თენგიზ მეზურნიშვილმა, რომელიც ერთ-ერთი თავდები იყო. ახლა, „ჯი ენ ეს“-ს აქვს მეზურნიშვილის ვალი, _ ამბობს არობელიძე და დასძენს, რომ ვალები სხვა ბანკებშიც აქვს:
_ მაგალითად, „პროკრედიტბანკში“. იქაც თავდებობის გამოა. ვიყავი ჩემი მენეჯერის _ ირაკლი ქობლიანიძის თავდები. როცა დაიხურა „ჯი ენ ესი“, ვერ შეძლო ქობლიანიძემ გადახდა და მე, როგორც პირველ თავდებს, დამეკისრა სესხის დაფარვა. პირადი ვალიც მაქვს 10 000 ლარის ოდენობით „ვი თი ბი“-ში. იმის გამო, რომ ყადაღა ადევს ანგარიშებს, გადახდას ვერ ვახერხებ და სხვადასხვა ბანკებთან მოლაპარაკება მაქვს. „ქართუშიც“ მქონდა ვალი, ახლახან დავფარე, _ დასძენს არობელიძე.
რაც შეეხება გოჩა მეგრელიშვილს, მისი მოწინააღმდეგეები იხსენებენ, რომ ბაჩო ახალიას სასჯელაღსრულების მინისტრობისას მეგრელიშვილი ახალაიას მოადგილედ მუშაობდა:
_ მე, როგორც პროფესიონალი, სხვა და სხვა დროს ვმუშაობდი სხვა და სხვა თანამდებობებზე _ თარგამაძის, ნარჩემაშვილის, მერაბიშვილის და ახალაიას 
დროსაც. ამ უკანასკნელთან მუშაობა მომიხდა წელიწადი და 3 თვე. აქედან, 4 თვე მის მოადგილედ, მაგრამ ეს აბსოლუტურად არ ნიშნავს იმას, რომ მე მისი კადრი ვიყავი. აღნიშნული პერიოდში მიხვდი რა, ჩემს უფუნქციობას და ჩემი ბრმა იარაღად გამოყენების საშიშროებას, პირადი პატაკის საფუძველზე, პროტესტის ნიშნად დავტოვე თანამდებობა და წამოვედი 2007 წელს, _ გვითხრა მეგრელიშვილმა.
_ ბატონო გოჩა, ახალაია მოადგილედ სხვის კადრებს ნიშნავდა?
_ არა, კადრები მასაც მოჰყავდა, მაგრამ ძველ, გამოცდილ პროფესიონალებსაც ეყრდნობოდა. თუმცა, ჩემი და მისი შეხედულებების თანხვედრა ვერ მოხდა. მომაშორეს ოპერატიულ საქმიანობას და დამნიშნეს ზურგის სამსახურში. მაგაზე გიპასუხეთ, რომ უფუნქციოდ დავრჩი.
_ ციხის უფროსად მუშაობდით იმ პერიოდში, როცა პატიმრებს აწამებდნენ, სხვადასხვა გზით იღებდნენ აღიარებით ჩვენებებს. ამ პროცესებში მონაწილეობა არ მიგიღიათ?
_ თუ რომ მსგავს საქმეებში მონაწილეობა მქონოდა მიღებული, მერწმუნეთ, ამაზე დიდი ხნის წინ მომთხოვდნენ პასუხს. ვერ მომიყვანენ ჩემი მუშაობის პერიოდში ვინმეს წამება-დამცირების ერთ ფაქტსაც კი. ყოველივე შეგიძლიათ მარტივად გადაამოწმოთ _ იმდროინდელ მსჯავრდებულთა 80 პროცენტი ისევ იხდის სასჯელს და ჰკითხოთ, თუ რა პირობები ჰქონდათ ციხეში იმ პერიოდისათვის. პირიქით _ როცა 2 პატიმარს პირადი ინიციატივით დავეხმარე წიგნების გამოცემაში, მისაყვედურეს, შენ სტამბის დირექტორი ხარ თუ ციხისო, _ აღნიშნა მეგრელიშვილმა.
