სოციალური პროექტების დაფინანსებას ადმინისტრაციული ხარჯი ექვსჯერ აღემატება!

მძიმე სოციალური ფონი, ათასობით დაუსაქმებელი ადამიანი, მოუწესრიგებელი ინფრასტრუქტურა, უგზოობა, წყლის პრობლემა და სიღარიბის მაღალი მაჩვენებლები სოფლებში _ ასეთია ჩოხატაურის მუნიციპალიტეტის დღევანდელი რეალობა. თუმცა, როგორც 2012 წლის ბიუჯეტის პროექტიდან ირკვევა, მთავარი ფინანსური დოკუმენტიდან 35% ადმინისტრაციული ხარჯისთვის არის გაწერილი. აქედან, ხელფასებზე 23 % დაიხარჯება; სპორტული და კულტურული ღონისძიებების ხელშეწყობისთვის _ 19%, სკოლამდელი განათლების ხელშეწყობისთვის _ 13%, სოციალურ პროგრამებსა და კომუნალური მეურნეობის განვითარებაზე კი _ 5-5 %.

რა პრიორიტეტებია მომავალ წელს მთავარი ფინანსური დოკუმენტით განსაზღვრული, რომელი პრობლემის მოგვარებას გეგმავს ადგილობრივი ხელისუფლება და იგეგმება თუ არა დასაქმების ხელშეწყობა, ამ საკითხებზე “გურია ნიუსი” ჩოხატაურის მუნიციპალიტეტის გამგებელს, ლელა იმედაშვილს ელექტრონული ფოსტით ესაუბრა.

_ ქალბატონო ლელა, რამდენი ლარით გაიზრდება, ან პირიქით, შემცირდება ჩოხატაურის მუნიციპალიტეტის 2012 წლის ბიუჯეტი?

_ ჩოხატაურის მუნიციპალიტეტის 2012 წლის ბიუჯეტი, 2011 წლის დაზუსტებულთან შედარებით, გაზრდილია 396 700 ლარით, დამტკიცებულთან შედარებით კი _ 553 800 ლარით.

_ პროექტის მიხედვით, რამდენი მილიონით განისაზღვრა მომავალი წლის მთავარი ფინანსური დოკუმენტი, მათ შორის გათანაბრებითი ტრანსფერი?

_ პროექტის მიხედვით 2012 წლის ბიუჯეტი სულ განსაზღვრულია 3 242.9 ათასი ლარით, მათ შორის, გათანაბრებითი ტრანსფერია 2 295.4 ათასი და მიზნობრივი _ 155.0 ათასი ლარი. სულ ტრანსფერი შეადგენს 2 450.4 ათას ლარს.

_ რის საფუძველზე შედგა 2012 წლის მთავარი პრიორიტეტები? გთხოვთ, აქვე მიუთითოთ პრიორიტეტების კონკრეტული დაფინანსება.

_ პრიორიტეტები რეალური საჭიროებებიდან და გასული წლის ანალიზის შედეგად ჩამოყალიბდა. 2012 წლის ძირითადი პრიორიტეტებია: სოციალური პროგრამები ჴ 200,0 ათასი ლარი; სკოლამდელი განათლების ხელშეწყობა _ 460.0 ათასი ლარი; მუნიციპალიტეტის კომუნალური მეურნეობის განვითარება _190.0 ათასი ლარი; სპორტული და კულტურული ღონისძიებების ხელშეწყობა _ 690.2 ათასი ლარი. წელს ჩვენ ასევე პრიორიტეტულად მივიჩნიეთ სხვადასხვა სახის უცხოური ინვესტიციებისა და პროექტების თანადაფინასება. აღნიშნული დაფინანსებების მოცულობა გაიზრდება ინფრასტრუქტურის განვითარებისა და სოფლის მხარდაჭერის პროგრამებზე თანხების გამოყოფის შემდეგ, 2012 წლის დასაწყისში.

_ იგეგმება თუ არა დასაქმების ხელშეწყობა და კონკრეტულად, როგორ?

_ დასაქმება მუდმივად ჩვენი პრიორიტეტია. დასაქმებაზე ზრუნვა მხოლოდ საჯარო სამსახურში დასაქმებულთა რაოდენობის ზრდით, რა თქმა უნდა, ვერ მოხდება. წელს ჩვენ, მინიმუმ, ორ სოფელში საბავშვო ბაღს გავხსნით, ოთხ სოფელში ბიბლიოთეკასაც ავამუშავებთ, სადაც ადამიანები დასაქმდებიან, თუმცა, ჩოხატაურში დასაქმებულ ადამიანთა რიცხვს, ინფრასტრუქტურული პროექტების მიმდინარეობა და სხვადასხვა ინვენსტორების მიერ გახორციელებული პროექტებიც გაზრდის. ამას ხელს შეუწყობს საქართველოს მთავრობის მიერ კურორტ ბახმაროში დაგეგმილი მნიშვნელოვანი სარეაბილიტაციო სამუშაოები.

_ რამდენი ლარია ადმინისტრაციული ხარჯი, მათ შორის, ხელფასები?

_ 2012 წლის ბიუჯეტის პროექტით ადმინისტრაციული ხარჯი შეადგენს 1 288.0 ათას ლარს, მათ შორის: ხელფასები _ 844.3 ათასი ლარი, 147 საშტატო ერთეულზე და ხელშეკრულებით დაქირავებულების 9 ერთეულზე _ 38.0 ათასი ლარი;

_ რამდენი ათასი ლარი არის გამოყოფილი პროექტის თანახმად არაკომერციული არამომგებიანი იურიდიული პირების დაფინანსებისთვის, იზრდება თუ მცირდება მათი დაფინანსება, იგეგმება თუ არა აიპი-ბში დასაქმებულ პირთა ოდენობის გაზრდა ან შემცირება?

_ არაკომერციული იურიდიული პირების დაფინანსებაზე გამოყოფილია სუბსიდია _ 1 315.2 ათასი ლარი. მათი დაფინანსება 137.0 ათასი ლარით იზრდება.

_ მთავრობის მიერ შემუშავებულ დოკუმენტში, რომელიც 2010-2013 წლებზეა გათვლილი, გურიის მხარისთვის განსაზღვრულია შემდეგი პრიორიტეტები: სასმელი წყლისა და საკანალიზაციო სისტემების, მუნიციპალიტეტის გზებისა და ხიდების რეაბილიტაცია, მუნიციპალიტეტების ტერიტორიაზე კეთილმოწყობითი სამუშაოები, სტიქიური მოვლენების შედეგების სალიკვიდაციოდ სპეციალური ტექნიკის შეძენა, ტურიზმის განვითარების ხელშეწყობა. რამდენად შეესაბამება თქვენ მიერ განსაზღვრული პრიორიტეტები საქართველოს მთავრობის მიერ განსაზღვრულ პრიორიტეტებს?

_ მთავრობის მიერ გურიის მხარისთვის შემუშავებულ 2010-2013 წლებზე გათვლილი პრიორიტეტები მთლიანად შეესაბამება ჩვენ მიერ განსაზღვრულ პრიორიტეტებს.

_ როგორ ფიქრობთ, ჩოხატაურელი მოქალაქეებისთვის ზემოთ ჩამოთვლილი აქტივობები უფრო პრიორიტეტულია, თუ მაგალითად, დასაქმება, ახალი სამუშაო ადგილების შექმნა, ჯანდაცვის და სოციალური პროგრამების დაფინანსება?

_ დასაქმებაზე უკვე მოგახსენეთ. ჯანდაცვასა და სოციალურ პროგრამებზე გათვალისწინებულია _ 275.0 ათასი ლარი, მათ შორის: საზოგადოებრივი ჯანდაცვა _ 75.0 ათასი და სოციალური დახმარებები _ 200.0 ათასი ლარი. განსაკუთრებული ყურადღებით მოვეკიდეთ სოციალურ პროგრამებს და დაფინანსება ამ მიმართულებით გაზრდილია. როგორც თქვენთვის ცნობილია, სოციალური პაკეტების გაზრდა ცენტრალური ხელისუფლებისთვისაც მნიშვნელოვანი პირორიტეტია. მთელი რიგი პროგრამული დაფინანსებები ცენტრალური ბიუჯეტიდან მოდის. დღეისთვის სოციალური დახმარებასა და სამედიცინო დაზღვევას ჩოხატაურში 1 441 ოჯახი, 4 500 პიროვნება იღებს. დახმარების სახით თვეში 108 000 ათასი ლარი გაიცემა, 6 000 პიროვნება სამედიცინო პოლისს იღებს. ბენეფიციართა სია საჯაროა და ყველას შეუძლია მისი ნახვა სოფლებშიც და დაბაშიც. ასე რომ, მარტო ადგილობრივი ბიუჯეტით არ ხდება ამ დაფინანსების გაცემა. თუმცა, ჩვენ დამატებით ავამუშავებთ სოციალურ პაკეტებს იმ მიმართულებით, რომელსაც პროგრამული დაფინანსება არ ეხება. წელს დამატებით მოვიცავთ 15 სხვადასხვა კატეგორიის ოჯახსა თუ პიროვნებას. ვფიქრობ, ეს ამ ადამიანებისთვის სასიცოცხლოდ მნიშვნელოვანია.

_ რამდენი ლარია განსაზღვრული ინფრასტრუქტურის განვითარებისთვის და რამდენი იყო ამ მიმართულებით გამოყოფილი 2011 წელს?

_ ჯერ ამის დათვლა ნაადრევია, ვინაიდან ინფრასტრუქტურის განვითარებაზე ხარჯების გამოყოფა წლის დასაწყისში, სახელმწიფო ბიუჯეტის დამტკიცების შემდეგ ხდება. შესაბამისად, მისი ასახვა ახლა ჩვენს ბიუჯეტში ვერ მოხდებოდა. ერთი რამ თამამად შემიძლია გითხრათ, რომ წელს გაცილებით მეტი თანხა დაიხარჯება ინფრასტრუქტურის განვითარების მიმართულებით ჩოხატაურის მუნიციპალიტეტში, ვიდრე ეს იყო გასულ წელს. 2011 წელში ინფრასტრუქტურისა და სოფლის მხარდაჭერის პროგრამები შეადგენდა 840.5 ათას ლარს;

_ რამდენიმე წელია აქილევსის ქუსლად რჩება პოლიციის დაფინანსების საკითხი. ბიუჯეტის პროექტის თანახმად, რამდენი ათასი ლარით დაფინანსდება მომავალ წელს სამართალდამცავი ორგანოები და როგორ ფიქრობთ, საჭიროა თუ არა დაფინანსდეს ისეთი ინსტიტუტები, რომლებსაც სახელმწიფო ბიუჯეტიდან საკმაოდ მაღალი დაფინანსება აქვთ და ხომ არ ფიქრობთ, რომ ეს თანხები, სხვა მიმართულებით უნდა გადანაწილდეს?

_ ეს აქილევსის ქუსლი ნამდვილად არ არის. ამ დაფინანსების სამართლებრივი ბაზა არსებობს და ის ჩოხატაურის მუნიციპალიტეტის ბიუჯეტის შესაბამისად, მინიმალურია.

_ მიიღეთ თუ არა შენიშვნები საკრებულოდან ბიუჯეტის პროექტთან დაკავშირებით? და თუ მიიღეთ, რა ხასიათისა იყო და აქედან რომელი გაითვალისწინეთ?

_ ბიუჯეტი განხილვის პროცესშია. მიუხედავად იმისა, რომ შენიშვნები საკრებულოდან პროექტთან დაკავშირებით, ჯერჯერობით, არ შემოსულა, ჩვენ ველოდებით ამ შენიშვნებს არა მარტო საკრებულოს მხრიდან, არამედ მოსახლეობისგანაც.