"ისე გამამწარეს, რომ გადაწყვეტილი მაქვს გამოვიდე ჩემს მცირეწლოვან შვილებთან ერთად და შიმშილობა გამოვაცხადო. როგორ და რატომ უნდა გადავიხადო 1700 ლარი, როცა მართალი ვარ და კანონი არ დამირღვევია?"_ ამ სიტყვებით მიმართა "გურია ნიუსს" მოქალაქემ, რომელიც საპატრულო პოლიციის მიერ უკანონოდ დაჯარიმებაზე საუბრობს.
ოზურგეთის მუნიციპალიტეტის სოფელ შრომაში მცხოვრებმა 34 წლის ამირან დევაძემ, შსს-ს საპატრულო პოლიციის დეპარტამენტის გურიის მთავარ სამმართველოს 11 თებერვალს საჩივრით მიმართა.
ამირან დევაძის საჩივარში აღნიშნულია, რომ 2015 წლის 1 თებერვალს დაახლოებით 21:30 წუთზე საპატრულო პოლიციამ დააჯარიმა ა.ს.კ.-ს 116 -ე მუხლის მე-4{2} ნაწილისა და 125 -ე მუხლის მე-6 ნაწილის საფუძველზე.
პატრულის მიერ დაჯარიმებას უკანონოდ მიიჩნევს ამირან დევაძე და ავტომანქანის მეპატრონე ძმა რაინდი ჭკუასელი, მათი განმარტებით, დევაძე საჭეს არ მართავდა, რადგან იმყოფებოდა ნასვამ მდგომარეობაში. ამ მიზნით მან სთხოვა თავის ახლობელს როინ ჭკუასელს, სოფელ შრომიდან თხინვალის გადასახვევამდე გადაეზიდა ციტრუსი. დევაძის თქმით, როცა ერთი რეისი ჩამოტანეს, ის დარჩა ციტრუსით დატვირთულ მანქანასათნ, ხოლო ჭკუასელი კი წავიდა მეორე რეისის გასაკეთებლად. დაახლოებით 21:30 წუთზე გაჩერებულ ავტომანქანასთან, მივიდა საპატრულო ეკიპაჟი, მათ დევაძეს, რომელიც ავტომანქანასთან დაახლოებით 6 მეტრის მოშორებით იდგა და ტელეფონზე საუბრობდა ალკოჰოლური სიმთვრალის მდგომარეობა დაუფიქსირეს და 1000 ლარიანი ჯარიმაც ამოუწერეს, ხოლო ავტომანქანა საჯარიმოზე გადაიყვანეს.
"პატრულის თანამშრომლებმა აიღეს იქვე ონკანიდან წყალი, ჩადეს მანქანაში და მითხრეს ჩაჯექი შენც მანქანაშიო, მე ვუთხარი, რომ ვარ ნასვამი, მაგრამ არ ვზივარ საჭესთან, ეს ჩემი მეგობრის მანქანაა, უბრალოდ ვდგავარ აქ, ვერ გავაგებინე, რომ მანქანას არ ვმართავდი. ახლავე ჩაბერე აპარატშიო, ამასობაში ჩემი მეგობარიც მოვიდა აჩვენა მათ მანქანის საბუთები, მაგრამ ამომიწერეს ჯარიმა 1000 ლარიანი, ჩემს მეგობარს კი უთხრეს ან 700 ლარიანს ამოგიწერ ან მანქანას წავიყვანთო."
ამის შემდეგ დევაძე საპატრულო პოლიციას საჩივრით მიმართავს, თუმცა როგორც თავად ამბობს, საპატრულოში განუმარტეს, რომ გაეტანა საჩივარი და პირდაპირ სასამართლოსთვის მიემართა, რადგან იქ მოიგებდა. დევაძეც ასე მოიქცა, თუმცა მოგვიანებით მეგობრების დახმარებით მიმართა იურიდიულ დახმარების სამსახურს, სადაც განუმარტეს, რომ აღნიშნული ფაქტით, ამოეწურებოდა ვადები, რის შემდეგადაც ვეღარ მოხდებოდა სასამართლოსთვის მიმართვა. ამის შემდეგ დევაძე კვლავ მიმართავს საჩივრით საპატრულო პოლიციას საიდანაც უარყოფითი პასუხი გუშინ მიიღო.
"თქვენი საჩივრის საფუძველზე ახსნა განმარტება ჩამოერთვა შსს საპატრულო პოლიციის დეპარტამენტის გურიის მთავარი სამმართველოს 1 სამმართველოს სახაზო-საპატრულო განყოფილების პატრულ ინსპექტორს პოლიციის ლეიტენანტ ლევან ირემაძეს. რომელმაც განმარტა, რომ 1 თებერვალს, სამსახურებრივ მოვალეობას ასრულებდა საპატრულო ეკიპაჟში "შკოდა -ოქტავია" ნომრით KCK -696 , საბორტე ნომრით "0108" თავის მეწყვილე პატრულ -ინსპეტორ მირზა კილაძესთან ერთად" _აღნიშნულია საპატრულო პოლიციიდან მოსულ პასუხში, რომელსაც ხელს შსს საპატრულო პოლიციის დეპარტამენტის გურიის მთავარი სამმართველოს უფროსი დავით ჭანტურია აწერს.
აქვე განმარტებულია, რომ საჭეს მართავდა ალკოჰოლურ მდგომარეობაში მყოფი ამირან დევაძე, რომელსაც არ ჰქონდა თან საბუთებიც, მანქანა დატვირთული იყო ციტრუსით. დევაძის განმარტებით კი ის საჭეს არ მართავდა, მხოლოდ იდგა და ელოდებოდა ციტრუსის მყიდველს.
ფიქსირდება თუ არა საპატრულო პოლიციის, ან დაჯარიმებულის სიმართე ვიდეოთვალით, იურიდიული დახმარების ხელმძღვანელისია მემარნიშვილი ამბობს, რომ ადმინისტრაციული საქმის წარმოება ვიდეო თვალის გახსნის გარეშე მოხდა.
"მე როგორც იურისტი, ამ ეტაპზე გამოვიყენებ უდანაშაულობის პრეზუმფიას. მიმაჩნია, რომ საპატრულო პოლიციამ მოქალაქეს თავდაპირველად არასწორი განმარტება მისცა, რომ გაეტანა დაწერილი საჩივარი, შემდეგ ხელმეორედ დაწერის შემთხვევაში კი ადმინისტრაციული საქმის წარმოება მოხდა ისე, რომ არ გაიხსნა ვიდეო თვალები, ვაპირებთ რომ აღნიშნულ გადაწყვეტილებას გავასაჩივრებთ სასამართლოში და ვფიქრობთ, რომ სასამართლო პროცესს აუცილებლად მოვიგებთ"_ აღნიშნავს მემარნიშვილი.
