ოზურგეთის მუნიციპალიტეტის სოფელ ასკანაში მცხოვრები 24 წლის ირაკლი მელუა ქუთაისში, გეგუთის ციხეში, უკვე ერთი წელია, სასჯელს იხდის. მას კიდევ ექვსწელიწადნახევარი დარჩა მოსახდელი და ასევე, 5 000 ლარის ოდენობის გირაოს გადახდა ეკისრება. როგორც პატიმრის დედა, ადვოკატი და ბაბუა “გურია ნიუსთან” ამბობენ, ირაკლი არასწორი მუხლით არის გასამართლებული და ის უკანონო პატიმარია. ირაკლი არც პრეზიდენტის მიერ შესაწყალებელთა სიაში მოხვდა.
მელუას დედა, თამარ ჯინჭარაძე ჰყვება, რომ მისი შვილი მახინჯაურში საზღვაო კოლეჯში სწავლობდა.
“მოაკითხა მეგობარმა და სთხოვა, სამარშრუტო ტაქსით საქმეზე მივდივარ და გამყევიო. თურმე, გოგოს მოტაცება უნდოდა. ჩემი შვილი ხუთი წუთით იჯდა მანქანაში მხოლოდ. მოტაცებულ გოგონას თავისი და ახლდა, რომელიც სკოლაში დატოვა და თვითონაც მალევე სასწავლებელში დარჩა. მეტი საერთო ამ საქმესთან ირაკლის არ ჰქონია. მოტაცებული გოგო მეგობარმა სად წაიყვანა და რა მოხდა, ამის შესახებ ირაკლიმ არაფერი იცის. გამოძიებაში არ არის ნაჩვენები, ვინ იყო მძღოლი და სად ჰყავდათ მიყვანილი გოგონა. დაუდგენელია მძღოლის ვინაობა, სახლის მდებარეობა. როგორ შეიძლება, მარტო ჩემმა შვილმა აგოს პასუხი? რატომ არ დასაჯეს სხვა? ორი წლის განმავლობაში იდებოდა სასამართლო, გვაწვალებდნენ, გვატყუებდნენ. სულ 2 0000 ლარზე იყო საუბარი, რომ საპროცესო გაეფორმებინათ. ვერ გადავიხადეთ და ამდენ წელი ასე უსამართლოდ ჩემმა შვილმა ციხეში უნდა გაატაროს”,_ გვითხრა მსჯავრდებულის დედამ და დასძინა, რომ რამდენჯერმე ითხოვა შეწყალება, თუმცა _ უშედეგოდ. “საპატრიარქომ საერთოდ არ მიიღო თხოვნა, მძიმე მუხლითაა და ვერაფერს ვუშველითო. სასჯელაღსრულების დეპარტამენტში რომ მივედით, იქ გვითხრეს, ეს მუხლი 7-დან 20-წლამდე სასჯელს ითვალისწინებსო. მერე იუსტიციის სამინისტროში მივედით. პროკურორმა მკითხა, ვინ განიხილა საქმე და ვინ გამოიტანა განაჩენიო. რამდენიმე ხნის მერე დავურეკე მას. მითხრა, ვერაფერს გიშველით, განაჩენი ძალაში ასე უნდა დავტოვოთო. თვითონ გოგომაც მოხსენებითი ბარათი დაწერა და პატრიარქს მიმართა, რომ ირაკლის ჩემს გატაცებასთან არანაირი შეხება არ აქვს, გთხოვთ, დაუბრუნოთ თავის ოჯახს და მის მცირეწლოვან შვილსო, მაგრამ არც საპატრიარქომ მოახდინა რეაგირება. უმძიმეს პირობებშია ჩემი შვილი _ თმები გასცვივდა, კბილები ჩაუცვივდა, თირკმელები კი თავიდანვე კენჭებით ჰქონდა სავსე, ჩიყვიც აწუხებს, ძალიან სუსტადაა. საპატრიარქოში მითხრეს, რომ ექსპერტი უნდა წაიყვანოო, რასაც, თურმე, 1 000 ლარი უნდა. სად მაქვს ამდენი ფული? ან ვიცი, ექსპერტი რას ჩამიწერს დასკვნაში? ოჯახის ყველა წევრი უმუშევარია, მცირეწლოვან ბავშვსაც უმამოდ ვზრდით. ირაკლის ექვს წელიწადნახევარი დარჩა და 5 000 ლარი აქვს გადასახდელი”.
ირაკლი მელუას ბაბუა, მურმან ჯინჭარაძე “გურია ნიუსთან” საუბარში ამბობს, რომ არაფრის იმედი აღარ აქვს:
_ რა უნდა ვქნა, აღარ ვიცი, ან სად გინდა სამართალი იპოვო? ასეთი უსამართლობა სხვაგან ხდება? დამეღუპა სტუდენტი ბავშვი. რანაირად გინდა, ასეთ ქვეყანაში იცხოვრო? მე, კარგი, დავბერდი, მაგრამ ამ ახალგაზრდებს რა ეშველებათ, ცხოვრებას რომ უფუჭებენ და ამწარებენ?
სკოლის დირექტორმა მიმიღო სკოლის დარაჯად, ღამეებს ვათევდი, პასუხისმგებლობით ვასრულებდი ჩემზე დაკისრებულს საქმეს. 3 წელი ოფიციალურად გაფორმებული ვიყავი, წელს კი, მომივიდა უწყება, რომ არ შეიძლება პენსიონერის დასაქმება, თქვენ გათავისუფლებული ბრძანდებით ამ სამსახურიდანო. თან, რაც ფული აიღე ამ პერიოდში, ყველა უკან უნდა დააბრუნოო და პენსიიდან მიქვითავენ 20 ლარს!
სისხლის სამართლის საქმე #1710888078
“საქმეზე შეკრებილ მტკიცებულებათა ერთობლიობა საკმარისია დასაბუთებული ვარაუდისთვის, რომ 1986 წლის 27 დეკემბერს დაბადებულმა, ოზურგეთის რ-ის სოფელ ასკანაში მცხოვრებმა ირაკლი მიხეილის ძე მელუამ ჩაიდინა თავისუფლების უკანონო აღკვეთა, წინასწარი შეთანხმებით, ჯგუფის მიერ, დანაშაული გათვალისწინებულია საქართველოს სსკ-ის 143 მუხლის III ნაწილის ქვეპუნქტით”, _ წერია ბრალდებულის სახით სისხლის სამართლის პასუხისგებაში მიცემის შესახებ დადგენილებაში, რომელიც 2008 წლის I ივნისით თარიღდება.
დადგენილებაში ასევე წერია, რომ მელუას დანაშაული შემდეგში გამოიხატება: “2008 წლის 16 აპრილს, აბელ წილოსანმა განიზრახა არასრულწლოვნის მოტაცება ცოლად შერთვის მიზნით. განზრახვის სისრულეში მოყვანისთვის, იგი ირაკლი მელუასთან და გამოძიებით დაუდგენელ პირებთან წინასწარი შეთანხმებით და მათთან ერთად, გამოძიებით დაუდგენელი მარკის ავტომანქანით, რომელსაც განზრახ გაკეთებული ჰქონდა სამარშრუტო ტაქსის აბრა, დაელოდა ს.-ს, რომელიც სკოლაში მიდიოდა თავის დასთან ერთად და ჩაჯდა მიკროავტობუსში. ისარგებლეს ამით აბელ წილოსანმა და მისმა თანმხლებმა პირებმა და ს.-ს უკანონოდ აღუკვეთეს თავისუფლება.
ბრალდებულ ირაკლი მელუას ბრალდება წარედგინა საქართველოს ს.ს.კ-ს 283-ე, 284-ე მუხლებით გათვალისწინებული წესებისა და ვადების დაცვით”.
დადგენილებას ხელს პოლიციის I განყოფილების დეტექტივის თანაშემწე-გამომძიებელი ზ. თურმანიძე აწერს, მას “ეთანხმება” ბათუმის რაიონული პროკურატურის პროკურორი გ. კვარაკვახიძე.
ირაკლი მელუას სააპელაციო საჩივარი ქუთაისის სააპელაციო სასამართლომ არ დააკმაყოფილა. განაჩენი კი, 2011 წლის 12 იანვარს ქუთაისის სააპელაციო სასამართლოს სისხლის სამართლის საქმეთა პალატის მოსამართლემ, მარინე იმერლიშვილმა გამოიტანა: “ოზურგეთის რაიონის სოფელ ასკანაში მცხოვრებ ირაკლი მელუას საქართველოს სისხლის სამართლის კოდექსის 143-მე მუხლის მესამე ნაწილის “ა” ქვეპუნქტით გათვალისწინებული დანაშაულისთვის სასჯელის სახედ და ზომად შეფარდებული აქვს თავისუფლების აღკვეთა 07 (შვიდი) წლითა და 06 (ექვსი) თვის ვადით. ასევე, საქართველოს სისხლის სამართლის კოდექსის 41-ე, 42-ე მუხლების საფუძველზე დამატებითი სასჯელის სახით დანიშნული აქვს ჯარიმა 5 000 ლარის ოდენობით, სახელმწიფო ბიუჯეტის სასარგებლოდ”, _ წერია განაჩენში.
პატიმრის ერთ-ერთი ადვოკატი გელა ნაცვალაძე “გურია ნიუსთან” საუბარში აღნიშნავს, რომ ირაკლი მელუა თავს დამნაშავედ არ სცნობდა და არც დადასტურებული იყო, რომ მან იცოდა, მის მეგობარს გოგოს მოტაცება თუ უნდოდა: _ დანაშაული არანაირი ფაქტობრივი გარემოებებით არ მტკიცდებოდა და ვერც ახლა დაამტკიცებენ. ეს მათივე პასუხისგებაში მიცემის დადგენილებაშიც ჩანს და ასევე განაჩენიდანაც, რომ ის ჩამოვიდა მანქანიდან და სასწავლებელში დაბრუნდა. ირაკლი მათ არ გაჰყოლია და ისინი ერთად ათი წუთიც კი არ ყოფილან.
_ რას ითხოვდით?
_ გამამართლებელი განაჩენის დადგენას. ბოლო სასამართლო პროცესზე, რომელიც ქუთაისში ჩატარდა, მოტაცებული გოგოც კი თავს იკლავდა, მისი მშობლებიც ამბობდნენ _ არ დაიჭიროთ, ირაკლი არაფერ შუაშიაო, მაგრამ მათ არავინ მოუსმინა.
_ თქვენი აზრით, რა ხდება?
_ კანონის უკუღმართობა, უსამართლობა. რადგან პროკურორმა აღძრა საქმე, რქებით უნდა რომ გაიტანოს და გაიტანა კიდეც, როგორც საერთოდ ხდება. ადრე იყო ასეთი მუხლი _ ქალის მოტაცება ცოლად შერთვის მიზნით, რომელიც 3-წლამდე თავისუფლების აღკვეთას ითვალისწინებდა. ახლა კი ეს მუხლი გაუქმებულია და შემოიღეს ადამიანის უკანონო თავისუფლების აღკვეთა.
ოჯახის წევრების თქმით, ირაკლის ჯანმრთელობა საფრთხეშია, მათ კი არც პატიმრის შენახვის, არც სამართლის პოვნის არც გირაოს გადახდის სახსარი არ აქვთ.
