2002 წლის 2 ივნისის ადგილობრივი თვითმმართველობის ორგანოს არჩევნებში, მთელი საქართველოს მასშტაბით, 22 პარტია მონაწილეობდა. გასანაწილებელი მანდატების რაოდენობა 4 801 იყო, არჩეულ იქნა 4 750 დეპუტატი.
გურიაში საარჩევნო კამპანია მაისში დაიწყო. იმჟამინდელი კანონმდებლობით, ოზურგეთსა და ლანჩხუთში მერსაც ირჩევდნენ, ამიტომ, საარჩევნო მარათონი განსაკუთრებულად დაძაბული იყო.
ოზურგეთში საინიციატივო ჯგუფების მიერ წარდგენილი კანდიდატების _ კოტე შარაშენიძის, ივანე ტაბატაძის და ლევან ურუშაძის დაპირისპირება ამ უკანასკნელის გამარჯვებით დასრულდა.
ოზურგეთში გამგებლობაზე კენჭს ხახუტა თოთიბაძე, გიგა ხარაბაძე და ავთანდილ ღელეყვა იყრიდნენ. გამარჯვება ღელეყვამ მოიპოვა, რომელსაც ოპონენტებმა არჩევნების გაყალბებაში დასდეს ბრალი. თუმცა, მანამდე, 30 მაისს, თოთიბაძემ კანდიდატურა მოხსნა, რადგან, მისი თქმით, არჩევნების შედეგები წინასწარ იყო ცნობილი:
_ ვულოცავ ამ ეგრეთ წოდებულ არჩევნებში გამარჯვებას ლევან ურუშაძესა და ავთანდილ ღელეყვას, _ არჩევნებამდე რამდენიმე დღით ადრე დაასახელა გამარჯვებულთა ვინაობა თოთიბაძემ.
ზოგადად, 2002 წლის არჩევნები ამომრჩეველთა მაღალი აქტიურობით გამოირჩეოდა. იყო დარღვევებიც, რომელებსაც "გურია ნიუსის" კორესპოდენტები ოზურგეთში, ჩოხატაურსა და ლანჩხუთში აფიქსირებდნენ.
ლანჩხუთში საკამოდ დაძაბულ ბრძოლაში მერის სავარძელი სოსო ბოლქვაძემ მოიპოვა.
არჩევნებამდე ერთი თვით ადრე "გურია ნიუსი" აქტიურად ატარებდა სოციოლოგიურ გამოკითხვებს. გამოკითხულთა უმრავლესობისთვის უცნობი იყო ის კანონი, რომლის საფუძველზე არჩევნები ტარდებოდა, ასევე უმრავლესობას არ ჰქონდა ინფორმაცია კანდიდატების შესახებ.
ჩოხატაურში ყველაზე აქტიურად "ახალი მემარჯვენები" მუშაობდნენ და საზოგადოებას გადარჩენას სთავაზობდნენ; ქვეყნის აყვავების პირობას "გურია ნიუსის" ფურცლებიდან დამოუკიდებელი კანდიდატებიც დებდნენ.
ჩოხატაურში დაბის გამგებლის პოსტზე 5 კანდიდატი იყრიდა კენჭს. დავით შარაშიძეს, ანტონ ხუნდაძეს, ირაკლი კუჭავას და დიმიტრი კორიფაძეს მამია ბარამიძემ მოუგო და 716 ხმით დაბის გამგებლის პორტფელიც ჩაიბარა, ჩოხატაურის გამგებელი გია ცინცაძე გახდა
საერთო ჯამში, თვითმმართველობის არჩევნები სახელისუფლებო პარტიამ მოიგო. თუმცა, საკრებულოებში ბევრი ახალი სახეც გამოჩნდა. სახეები, რომლებმაც 2002 წლის შემდეგ ბევრი პარტია და თანამდებობა გამოიცვალეს და დღესაც თანამდებობებზე არიან. მათ შესახებ "გურია ნიუსი" უახლოეს მომავალში, რუბრიკაში _ "პოლიტმეხსიერება", გესაუბრებით.
