გასული კვირას, ოზურგეთში, ორი საპროტესტო აქცია გაიმართა – უმიწაწყლოდ დარჩენილმა დაბა ლაითურელებმა მიწის დაკანონება მოითხოვეს, ხოლო ოზურგეთის საზოგადოების გარკვეულმა ნაწილმა კი, გურიის ერთ-ერთი მთავარი ისტორიული ღირებულების – "ვაშნარის ნაქალაქარის" გურიანთის ჩაის ფაბრიკისთვის მიყიდვა გააპროტესტა.
ქალაქ ოზურგეთის მუნიციპალიტეტის საკრებულოს დეპუტატი, "გაერთიანებული დემოკრატების" ერთ-ერთი ლიდერი, თამარ ნადირიძე აღნიშნულთან დაკავშირებით განცხადება გაავრცელა.
თამარ ნადირიძეს მიაჩნია, რომ ეს პრობლემები დღეს არ წარმოშობილა და მათ ხანგრძლივი ისტორია აქვთ.
"გასულ "საპროტესტო კვირაში" სულაც არ წარმოშობილა მიწის გაყიდვის პრობლემები. ლაითურელი გლეხები ამ მოთხოვნას ადრეც ახმოვანებდნენ, ხოლო "ვაშნარის ნაქალაქარი" გურიანთის ჩაის ფაბრიკისთვის 15 წლის წინ მიუყიდიათ.
აღმოჩნდა, რომ "ვაშნარის ნაქალაქარს" არ აქვს ისტორიული ძეგლის სტატუსი და არ არის დაცული სახელმწიფოს მიერ სათანადო წესით. ვინ წარმოიდგენდა, რომ 2009 წელს, როდესაც ოზურგეთის ისტორიული მუზეუმი და საქართველო-ბრიტანეთის ერთობლივი ექსპედიცია საერთაშორისო სამეცნიერო კონფერენციას მართავდა ვაშნარის ნაქალაქევის აღდგენაზე, ეს ძეგლი უკვე გურიანთის ჩაის ფაბრიკას ბალანსზე ჰყავდა აყვანილი.
სამწუხაროდ, დღევანდელ ხელისუფლებას, თავისი წინამორბედების მსგავსად, ამ დროისთვის ვაშნარის საკითხის შესწავლისა და მასზე ეფექტური რეაგირების სურვილი არ გასჩენია და არც უმიწოდ დარჩენილი ლაითურელების პრობლემა მიაჩნია ყურადღების ღირსად.
კარგად მოფიქრებული წინასაარჩევნო ლოზუნგი ,,სამართლიანობის აღდგენა,, დღეს უკვე ხელისუფლების თავის ტკივილად იქცა და დამნაშავეთა დასჯას კი არა, ჩაის ფაბრიკაზე მიყიდული ისტორიული ძეგლის დახსნასაც კი ვერ ახერხებს.
ლაითურელების გასაჭირი ოზურგეთში აჭარიდან ჩამოსახლებული ეკომიგრანტების საერთო პრობლემაა და იგი ასევე აწუხებს ნასაკირალისა და ნარუჯის მოსახლეობას.
ყველა წინა ხელისუფლება – შევარდნაძის თუ სააკაშვილის, ამ სოფლების მაცხოვრებლებს წინასაარჩევნოდ მტკიცედ ჰპირდებოდა მიწებს ხმების სანაცვლოდ და ყოველთვის აღწევდა კიდევაც მიზანს – იღებდა ამომრჩეველთა ხმებს და თანაც იმ ოდენობით, რომ ეს საკმარისი იყო მრავალი საარჩევნო უბნის მონაცემების დასაბალანსებლად. არცერთ ხელისუფლებას "ვაშნარის" ისტორიული ღირებულება საერთოდ არ აინტერესებდა, მაგრამ ძალიან აინტერესებდა ლაითულერების ხმები.
ეს იყო, ფაქტიურად, საარჩევნო ხმების "ბეღელი", საიდანაც შემოსული ხმათა რაოდენობა ყოველთვის ანეიტრალებდა ოპოზიციის ძალისხმევას. ოცდაორი წლის განმავლობაში ატყუებდნენ ლაითურლებს ასეთი მეთოდებით.
დღესაც, სამწუხაროდ, არაფერი შეცვლილა ამ მხრივ. ამ პრობლემების გადაწყვეტას იგივე პერსპექტივა აქვს, რადგანაც შეწუხებული ადამიანებისათვის, როგორც აღმასრულებელი ისე საკანონმდებლო ხელისუფლების წარმომადგენლთა კაბინეტების და ბიუროების კარები შიგნიდანაა ჩაკეტილი (თანაც არამარტო გადატანითი მნიშვნელობით).
ნათლად ჩანს, რომ ისტორიულ ღირებულებებზე წაყრუებული, მაგრამ საარჩევნო ხმებით დაინტერესებული დღევანდელი ხელისუფლება უახლოეს არჩევნებამდე სულაც არ აპირებს ყველაზე მთავარი კოზირის დახარჯვას და ლაითურელებისთვის მიწის პრობლემის მოგვარებას. ჩვენ, "დემოკრატიული მოძრაობა" ვთვლით, რომ ეს საკითხი დაუყოვნებლივ უნდა გახდეს ადგილობრივი ხელისუფლების განხილვის საგანი და კონკრეტული ქმედითი ნაბიჯები უნდა გადაიდგას მის მოსაგვარებლად. ჩვენ ვაფრთხილებთ დღევანდელ ხელისუფლებას, რომ თუ აპრილის ბოლომდე ვერ ან არ გადაჭრის თითოეული გლეხისთვის ასეთ სასიცოცხლო პრობლემას, მაშინ ადგილობრივ არჩევნებზე ნუ ექნება ლაითურლების ხმების იმედი. ხალხი აღარ მოტყუვდება და სწორ არჩევანს გააკეთებს იმ ძალის სასარგებლოდ, რომელსაც ხელეწიფება მსგავსი პრობლემების მოგვარება.
რაც შეეხება "ვაშნარის ნაქალაქარის" საკითხს, ეს თემა სერიოზულად უნდა იქნეს შესწავლილი და სწორი და დროული გადაწყვეტილებები უნდა იქნეს მიღებული ხელისუფლების მხრიდან, წინააღმდეგ შემთხვევაში საზოგადოების ის ნაწილი, ვისთვისაც ეროვნული სიწმინდეები ძვირფასია, ნდობას აღარ გამოუცხადებს ამ მთავრობას და ეს ყველაფერი არჩევნების შედეგებზე აისახება.
მოვუწოდებ საზოგადოებას, გავერთიანდეთ ვაშნარის და უმიწოდ დარჩენილი გლეხების დასაცავად, მანამ სანამ ახალი ხელისუფლებასა და ძველს შორის ჯერ კიდევ არის რაღაც სხვაობა, თორემ ხვალ უკვე გვიან იქნება და გაცილებით დიდი და სერიოზული პრობლემების წინაშე აღმოვჩნდებით" _აღნიშნული თამარ ნადირიძის განცხადებაში.
