ოზურგეთის მუნიციპალიტეტის სოფელ შრომისკენ მიმავალ გზაზე აუცილებლად შეამჩნევთ ერთსართულიან სახლს, სადაც 7 ადამიანი ცხოვრობს _ ვალენტინა ოსიძის ოჯახი სოციალურად გაჭირვებულ კატეგორიას განეკუთვნება, მაგრამ რამდენიმე თვეა, დახმარება არ მიუღია, რადგან აქ მისი რძალი და შვილიშვილი გადმოვიდნენ საცხოვრებლად და სოციალურმა სააგენტომ თავიდან შეისწავლა ოჯახის მდგომარეობა.
_ სახლში, სადაც ავდარში წვიმა ჩამოდის, 7 ადამიანი ვცხოვრობთ. ერთ დროს თხინვალის ჩაის ფაბრიკის ბინებში ვიყავით, მაგრამ ახლა იქ ისეთი მდგომარეობაა, აქ ცხოვრება გვირჩევნია. არ გვაქვს სამუშაო და არც არანაირი შემოსავალი. სოციალური დახმარება გვქონდა და ისიც მოგვიხსნეს. რძალი და შვილიშვილი შემოვიყვანე ოჯახში და ამიტომ. მომემატა სარჩენი, ხომ არ მომკლებია? სამჯერ შევიტანე განცხადება, მაგრამ ყურადღება არ მიუქცევიათ. სოფლის გამგეობაში ვიყავი მისული. სახლთან ახლოს ხეების მოჭრა ვთხოვე და არ შეიძლება, დაგაჯარიმებენო. ხომ ხედავ, როგორი სახურავი აქვს სახლს? აქვე, ახლოს ძველად თონე იყო. მისი სახურავი ვთხოვე სოფლის თავკაცებს, მაგრამ ასეთი პასუხით გამომისტუმრეს _ შენობამ თლიანად უნდა შეისყიდოო. მე არ მომცეს, შემდეგ ვიღაცამ დაშალა და წაიღო, _ გვეუბნება ქალბატონი ვალენტინა.
_ განცხადება მუნიციპალიტეტის გამგეობის სახელზე არ დაგიწერიათ?
_ სამი წლის მანძილზე ოთხი განცხადება მაქვს დაწერილი, მაგრამ ვინ მაქცევს ყურადღებას? ელემენტარულ დახმარებას ვითხოვ, ბევრს ხომ არაფერს? ამდენ პრობლემას ისიც ემატება, რომ შვილიშვილი მყავს ლეიკოზით დაავადებული და თბილისში ონკოლოგიურში გვიხდება ექვს თვეში ერთხელ ჩასვლა, მაგრამ ამის საშუალებაც არ გვაქვს ხანდახან. ბავშვს პენსია აქვს, დედაჩემიც პენსიონერია, მაგრამ სახლში ბევრი ვართ და არ გვყოფნის.
_ თქვენი შვილები თუ მუშაობენ?
_ ერთ-ერთი შვილი, რომელიც ცოლ-შვილიანია, ხანდახან მუშაობს. მე კიდევ მეზობელთან თუ წავალ, ესეც იშვიათად, რადგან ყველას უჭირს _ ხან ტუალეტსაც ვალაგებ, რომ რამდენიმე ლარი შემოვიტანო სახლში და ბავშვებს ვაჭამო. რამდენიმე დღეში ჩემი მეზობლის სახლში მივდივარ აჭარაში _ შაქარს, ბრინჯს და ზეთს დამპირდა. ამასწინათ განცხადება დავწერეთ ოზურგეთის მუნიციპალიტეტის გამგებლის მოვალეობის შემსრულებლის სახელზე, მაგრამ არანაირი სახსრები არ გვაქვსო, ასეთი პასუხით გამომისტუმრეს.
სოციალური მომსახურების სააგენტოში გვითხრეს, რომ როდესაც ოჯახში ახალი წევრი გადადის საცხოვრებლად ან ტოვებს ოჯახს, დროებით წყდება სოციალური დახმარების გაცემა, შემდეგ კი მიდის აგენტი და თავიდან ამოწმებს ოჯახს. ახლანდელი მონაცემებით, ოსიძეების ოჯახი კვლავ მოხვდა 57 000 ქულის ქვემოთ მყოფთა სიაში და სოციალურ დახმარებას აუცილებლად მიიღებს.
სოფელ შრომის ტერიტორიული ერთეულის რწმუნებულმა, დავით ჯაბუამ, ჩვენთან სატელეფონო საუბრის დროს თქვა, რომ ის ტერიტორია, სადაც ოსიძეების ოჯახი ცხოვრობს, სოფელ ნატანებს ეკუთვნის: _ ოსიძეების ოჯახს ჩვენთვის არც მოუმართავს, ჩვენ როგორ დავეხმარებოდით, როდესაც ისინი ნატანების ტერიტორიაზე ცხოვრობენ? _ გვითხრა დავით ჯაბუამ.
სოფელ ნატანების რწმუნებულთან დაკავშირება ტელეფონით რამდენჯერმე ვცადეთ, მაგრამ უშედეგოდ.
