FactCheck.ge პოლიტიკოსების განცხადებებში ფაქტობრივი სიზუსტის დადგენის ყოველკვირეულ მიმოხილვას აქვეყნებს. 24-დან 31 მარტამდე ფაქტ-მეტრმა სხვადასხვა გადამოწმებულ ფაქტზე რამდენიმე კვლევა გამოაქვეყნა.
ყველაზე პოპულარული სტატია, ვებგვერდზე მნახველთა რაოდენობის მიხედვით, ფინანსთა მინისტრის, ნოდარ ხადურის განცხადებას ეხებოდა. ხადურის თქმით, "საქართველო ერთადერთი ქვეყანაა რეგიონში სადაც ეკონომიკა იზრდება".
ამ განცხადების გადამოწმებისას ფაქტ-მეტრმა ოთხი საერთაშორისო ორგანიზაციის – ევროპის ბანკის, მსოფლიო ბანკის, სავალუტო ფონდის და გაეროს პროგნოზები შეისწავლა, თუმცა ნოდარ ხადურის განცხადებას არცერთი მათგანი არ ადასტურებს. 2015 წლის ეკონომიკურ ზრდასთან დაკავშირებით ფაქტ-მეტრმა რეგიონის ქვეყნების მთავრობების და ცენტრალური ბანკების მიერ გაკეთებული პროგნოზებიც მოიძია. საქართველოს მეზობელ ქვეყნებში მხოლოდ რუსეთია, სადაც უარყოფითი ეკონომიკური ზრდაა მოსალოდნელი, დანარჩენ ქვეყნებში კი დადებითი ზრდის ტემპია ნავარაუდევი.
ამ მონაცემების გათვალისწინებით, ნოდარ ხადურის განცხადება მცდარად შეფასდა.
გასულ კვირას ფაქტ-მეტრმა ჭიათურის მაჟორიტარი დეპუტატის, მალხაზ წერეთელის განცხადებაც გადაამოწმა. პარლამენტში სიტყვით გამოსვლისას დეპუტატმა აღნიშნა, რომ ჭიათურაში უმძიმესი ეკოლოგიური მდგომარეობაა.
გარემოს ეროვნული სააგენტოს მონაცემებით, 2014 წლის ნოემბრის მდგომარეობით, მდინარე ყვირილაში, ქ. ჭიათურას ზედა კვეთში მანგანუმის დიოქსიდის შემცველობა 5.9-ჯერ, ხოლო ქვედა კვეთში კი, 1.3-ჯერ აღემატებოდა ზღვრულად დასაშვებ ნორმას. რაც შეეხება ჭიათურაში გარემოსადმი მიყენებული ზიანის ოდენობას, 2013 წელს მან 2 246 955 ლარი შეადგინა, რაც საქართველოს მასშტაბით გარემოსადმი მიყენებული ზიანის 35%-ს შეადგენს. 2014 წელს ეს მაჩვენებელი კიდევ უფრო გაიზარდა და ჭიათურაზე გარემოსადმი მიყენებული ზიანის 89% მოდიოდა.
აღნიშნული ზიანი გამოწვეულია ისეთი ქმედებებით, როგორიცაა: ტყით უკანონო სარგებლობა, ხე-ტყის ტრანსპორტირების წესების დარღვევა, სასარგებლო წიაღისეულის მოპოვების ლიცენზიის პირობების დარღვევა, წიაღის უკანონო მოპოვება, მიწის ნაყოფიერი ფენის მოხსნა/მიწის გაუვარგისება, ნარჩენებით გარემოს დაბინძურება, ატმოსფერული კანონმდებლობის კანონის დარღვევა, უკანონო ნადირობა და ა.შ. თუმცა, როგორც გარემოს დაცვისა და ბუნებრივი რესურსების სამინისტროში განმარტეს, გარემოსადმი მიყენებული ზიანის უდიდესი ნაწილი (300 მილიონ ლარზე მეტი) მანგანუმის მოპოვებით საქმიანობასთან არის დაკავშირებული.
ფაქტ-მეტრის დასკვნით, მალხაზ წერეთელის განცხადება სიმართლეა.
ფაქტ-მეტრის მიერ გადამოწმებული კიდევ ერთი ფაქტი საპარლამენტო უმრავლესობის დეპუტატის, გოგი თოფაძის განცხადებას ეხებოდა. ერთ-ერთ ინტერვიუში თოფაძემ აღნიშნა: "ვინც იმაზე საუბრობს, რომ NATO-ში გველოდებიან, ის ატყუებს ხალხს. არ მიგვიღებენ NATO-ში და ამ საუბრებით, ტყუილად, ჩვენს ჩრდილოელ აგრესიულ მეზობელს ვაღიზიანებთ. "ოცნება” არ გვატყუებს. "ოცნების” პრიორიტეტი NATO არ არის”.
ფაქტ-მეტრი გოგი თოფაძის განცხადების სიზუსტით დაინტერესდა. რადგანაც გოგი თოფაძე საუბრობს "პრიორიტეტზე”, ჩვენ გავაანალიზეთ მხოლოდ ის, თუ რამდენად არის წარმოდგენილი "ქართული ოცნების” ოფიციალურ დოკუმენტებში NATO-ში ინტეგრაციის თემატიკა. შესაბამისად, ჩვენ არ შევდივართ პოლიტიკურ დისკურსში იმ თემასთან დაკავშირებით, რეალურად ახორციელებს თუ არა "ქართული ოცნება” NATO-ში ინტეგრაციის პოლიტიკას.
გოგი თოფაძეს, როგორც პოლიტიკურ გაერთიანება "ქართულ ოცნებაში” შემავალი ერთ-ერთი პოლიტიკური პარტიის თავმჯდომარეს, ნამდვილად აქვს ხელი მოწერილი დეკლარაციაზე, რომელიც NATO-ში და ევროკავშირში ინტეგრაციის პროცესის გაღრმავებას გულისხმობს. სწორედ ამ დეკლარაციით განისაზღვრა კოალიციის საგარეო პოლიტიკური კურსი და ევროატლანტიკურ სტრუქტურებში ინტეგრაციის გაცხადებული მიზანი. შესაბამისად, გოგი თოფაძის განცხადება წინააღმდეგობაში მოდის როგორც კოალიციის სადამფუძნებლო დეკლარაციასთან, ისე პარლამენტის მიერ მიღებულ საგარეო პოლიტიკური კურსის დოკუმენტთან, ასევე კოალიციიდან და პარტიიდან მისივე კოლეგების, ყოველ შემთხვევაში, საჯაროდ დეკლარირებულ პოზიციასთან.
ამ გარემოებებზე დაყრდნობით ფაქტ-მეტრმა დაასკვნა, რომ გოგი თოფაძის განცხადება ტყუილია.
გასულ კვირას ფაქტ-მეტრმა საპარლამენტო უმცირესობის წევრის, ზურაბ ჩილინგარაშვილის განცხადებაც გადაამოწმა. ჩილინგარაშვილის თქმით, "მთლიანად სამცხე-ჯავახეთში და კონკრეტულად რაბათის ციხეში ტურისტთა რაოდენობა გამეოთხედდა".
ფაქტ-მეტრმა ეს საკითხი გამოიკვლია.
2014 წელს სამცხე-ჯავახეთში ჩასულ ვიზიტორთა რაოდენობა ამ ეტაპზე ცნობილი არ არის. ერთადერთი ოფიციალური წყარო, რაც სამცხე-ჯავახეთში არსებულ მდგომარეობაზე ზოგად წარმოდგენას გვიქმნის, ეს საზღვრის კვეთის მონაცემებია. 2014 წელს სასაზღვრო-გამშვებ პუნქტ ვალედან შემოსულ ვიზიტორთა რაოდენობა წინა წლის მაჩვენებელთან შედარებით 32%-ით შემცირდა. რაც შეეხება რაბათის ციხეს, რაბათის საინფორმაციო ცენტრის ინფორმაციით, 2014 წელს ტურისტთა რაოდენობამ წინა წლების ანალოგიურ პერიოდებთან შედარებით იკლო. გასული წლის დეკემბერში ტურისტების რიცხვი 59%-ით, ხოლო 2015 წლის იანვარში კი 30%-ით შემცირდა. მართალია, ეს მონაცემები გამეოთხედებული არ არის, როგორც ამას დეპუტატი აღნიშნავს, თუმცა, მნიშვნელოვანი კლება სახეზეა.
განცხადების სრული კონტექსტის გათვალისწინებით, ფაქტ-მეტრმა დაასკვნა, რომ ზურაბ ჩილინგარაშვილის განცხადება მეტწილად სიმართლეა.
