ვარდების რევოლუციის მთავარ მიღწევად პოლიციაში გატარებული რეფორმა ითვლება. ნაციონალური მაუწყებლები ხშირად გვამცნობენ, რომ სხვადასხვა ქვეყნის დელეგაცია საქართველოში პოლიციის რეფორმის შესასწავლად ჩამოდის. გვარწმუნებენ იმასაც, რომ პოლიციის დამსახურებით, ოჯახებში მშვიდად გვძინავს.
თუმცა, ჩოხატაურში მშვიდად კარგა ხანია, აღარავის სძინავს _ გახშირებულმა ყაჩაღობებმა, რომელთა გახსნა ვერა და ვერ მოახერხეს ძალოვნებმა, ადგილობრივებს დიდი ხანია მოსვენება დაუკარგა. სამხარეო პოლიციის მთავარი სამმართველოს უფროსი დავით ცირეკიძე გვარწმუნებს, რომ დასვენებული არც პოლიციაა და დღედაღამ მუშაობენ, მაგრამ ამ მუშაობის შედეგი ჯერჯერობით არ ჩანს. დროებითი მოთავსების იზოლატორში კი, ადამიანები იმ უბრალო მიზეზით ხვდებიან, რომ პოლიციელებს “თვალში” უადგილო დროს და ადგილას “გაეჩხირნენ”. ჩოხატაურში აღარავინ მალავს, რომ ძალოვნები უფლებამოსილებას ამეტებენ _ რედაქციაში დღის განმავლობაში რამდენიმე ათეული ადამიანი მოდის, რომლებიც ამბობენ, პოლიციელთა ქმედება ყოველ საზღვარს სცდება:
_ არ ვიცით, ვინ არის ეს ავტომატგადაკიდებული ხალხი, რომლებიც დღედაღამ ჩოხატაურში პოლიციის მანქანებით დარბიან. არც ვინაობას ამხელენ და არც რაიმე ისეთი ნიშანი აქვთ, რომლის საშუალებით შემდგომში მათი ამოცნობა იქნება შესაძლებელი. იჭერენ ყველას, ვისაც კი გზაზე წააწყდებიან. ეგ კიდევ არაფერი _ ადამიანებს სახლში უვარდებიან, ახალგაზრდები პოლიციაში ყოველგვარი ახსნა-განმარტების გარეშე მიჰყავთ და იქ რამდენიმე საათით აჩერებენ, _ გვითხრა ერთ-ერთმა ჩოხატაურელმა.
პოლიციელებს განსაკუთრებით, თურმე, სოფლების _ გოგოლესუბნის და გუთურის ახალგაზრდობა აინტერესებთ. როგორც გოგოლესუბნის მოსახლეობა ამბობს, დღე არ გავა, ვინმე არ დააკავონ:
_ რამდენიმე დღის წინ, ღამის ორ საათზე მომივარდნენ სახლში და ჩემი შვილი წაიყვანეს. მთელი ღამე პოლიციაში ჰყავდათ დაკითხვაზე. ეუბნებოდნენ, გინდა თუ არა თქვი, ვინ დააყაჩაღა სიხარულიძეების ოჯახიო, _ გვითხრა ერთ-ერთმა გოგოლესუბნელმა, რომლის ვინაობას ჩვენ შეგნებულად არ ვასახელებთ.
მსგავს ისტორიებს გვიყვებიან გოგოლესუბნის სხვა მცხოვრებლებიც. ყველას ერთი და იგივე პრობლემა აქვს _ მათი ოჯახის წევრები პოლიციას ღამით მიჰყავს და მათთან თანამშრომლობას აიძულებენ.
ანალოგიური მდგომარეობაა სოფელ გუთურშიც. როგორც ერთ-ერთმა რესპონდენტმა გვითხრა, პოლიცია ბინძური ხერხებით და ფსიქოლოგიური მეთოდების გამოყენებით ცდილობს ადამიანები თანამშრომლობაზე დაიყოლიოს:
_ გასულ კვირას, ერთი ახალგაზრდა დააკავეს. მაგიდის ერთ მხარეს ფული დაუდეს, მეორე მხარეს ნარკოტიკები და არჩევანი შესთაზეს: ფული თანამშრომლობის სანაცვლოდ ან ციხე _ “ბარიგობისთვის”.
ბოლო დღეებში მსგავს ისტორიებს ბევრი ჩოხატაურელი ჰყვება. ახალგაზრდები შიშისგან ეზოშიც კი ვერ გამოდიან, თუმცა, როგორც ჩანს, ძალოვნებისთვის ეს ხელისშემშლელი სულაც არ არის. მათ აქვთ ბერკეტი, რომელსაც შესანიშნავად იყენებენ _ ადამიანებს სახლში უვარდებიან და აშანტაჟებენ.
პოლიციის შენობის წინ ნახავთ მოქალაქეების რიგს, რომლებიც დაკავებული ახლობლების გამოშვებას ელოდებიან. დაკავების მიზეზი არავინ იცის და პრესასთან ჩუმად საუბრობენ.
აღსანიშნავია, რომ ჩოხატაურში ბოლო დროს ისეთი პოლიციელები მოავლინეს, რომლებსაც ნარკოტიკების ჩადების და მსგავსი ბინძური მეთოდების გამოყენების დიდი გამოცდილება აქვთ. ისინი პოლიციაში ჯერ კიდევ შევარდნაძის დროიდან მუშაობენ და ძალიან კარგად იციან, როგორ მიიღონ სასურველი ჩვენება და როგორ აიძულონ ადამიანები, პოლიციასთან ითანამშრომლონ. სხვათაშორის, ერთ-ერთ პოლიციელს, რომელიც ახლა ჩოხატაურში ავტომატგადაკიდებული ეძებს ყაჩაღებს, რამდენიმე წლის წინ, ნარკოტიკის ჩადების გამო, სერიოზული პრობლემა შეექმნა და რამდენიმე ხნით მან ორგანოებიც კი დატოვა. უფრო მეტიც, როგორც ვიცით, არსებობს ჩანაწერი, სადაც ეს პოლიციელი ერთ-ერთ დაკავებულს თანამშრომლობას სთხოვს, წინააღმდეგ შემთხვევაში კი ციხეში გაგზავნით ემუქრება.
ასეთი ადამიანების ჩოხატაურში ყოფნა კიდევ უფრო აშინებს მოსახლეობას. ნაწილი იმასაც ფიქრობს, რომ ეს ყველაფერი არჩევნებს უკავშირდება და ხელისუფლებას ხალხის ტერორში ყოფნა “აწყობს”.
ჩოხატაურის მოსახლეობა ხელისუფლებისგან დახმარებას და ძალოვნების აგრესიული ქმედების აღკვეთას ითხოვს.
გურიის გუბერნატორი, ვალერი ჩიტაიშვილი ჩვენთან საუბრისას ამბობს, რომ პოლიციის გადამეტებული ქმედებების შესახებ მას ინფორმაცია არ აქვს:
_ მსგავსი ინფორმაცია მე არ გამაჩნია და არა მგონია, რეალური იყოს, რომ პოლიცია ვინმეს ნარკოტიკის ჩადებით ემუქრებოდეს. რაც შეეხება გაუხსნელ დანაშაულობებს, ესეც მოგვარებადია და მალე ყველა დანაშაული გაიხსნება, _ გვითხრა გუბერნატორმა.
დანაშაულის გახსნამდე კი, პოლიციელები, გარდა ზემოთ აღნიშნული ქმედებებისა, მაღაზია-მაღაზია დადიან და გამყიდველებისგან ცდილობენ მიიღონ ინფორმაცია, თუ ვინ იყიდა ბოლო ერთი თვის განმავლობაში ყვითელი ხელთათმანები, რომელიც, როგორც ამბობენ, ერთ-ერთ დამნაშავეს ეკეთა გოგოლესუბანში ჩადენილი ყაჩაღობის დროს. აღსანიშნავია ისიც, რომ რამდენიმე ადამიანი, რომლებმაც ყვითელი ხელთათმანი შეიძინა, უკვე ჰყავდა პოლიციას დაკითხვაზე.
P.S. ჩოხატაურში პოლიციელების ასეთი მოქმედების გამო, ხუმრობით ერთი კვირის წინ მომხდარ ამბავს ყვებიან: გუთურში დედამ შვილს სთხოვა, შეშა დამიჩეხეო.
_ გაგიჟდი? ნაჯახს დავიჭერ ახლა მე ხელში და შარს ავიკიდებ? არც ცეცხლი მინდა და არც სითბო. პოლიციამ რომ ნაჯახით ხელში დამინახოს, ყაჩაღი ვეგონები და ციხეს ყველაფერი მირჩევნია, _ უპასუხია შვილს.
