შინაგან საქმეთა სამინისტროს არქივში არაერთი სისხლის სამართლის საქმე ინახება, რომელიც გურულების პოლიტიკურ რეპრესიებს აღწერს. 1925 წელს, ანტისაბჭოთა საქმიანობის გამო, დააპატიმრეს და გადაასახლეს 23 წლის ვლასა ლუკას ძე ჟღენტი.
ვლასა ჟღენტი დაიბადა ოზურგეთის მაზრაში, აზნაურის ოჯახში. ჰქონდა 5 კლასის განათლება. 1917 წლიდან იყო ახალგაზრდა მარქსისტთა წევრი, 1918 წელს შევიდა მენშევიკურ პარტიაში. საქართველოს გასაბჭოების შემდეგ მენშევიკური ორგანიზაციის იატაკქვეშა საქმიანობაზე გადასვლის დროსაც არ გაუწყვეტია კავშირი ორგანიზაციის წევრებთან.
1922 წლის 24 მაისს ჟღენტი საბჭოთა ხელისუფლების წინააღმდეგ გამართულ დემონსტრაციაში იღებდა მონაწილეობას. დემონსტრაციაზე მენშევიკების დავალებით ანტისაბჭოთა ხასიათის სიტყვა წარმოსთქვა, რის გამოც ხელისუფლებამ მისი აყვანა განიზრახა, მაგრამ თავს გაქცევით უშველა და 15 დღე იმალებოდა…
ვლასა ჟღენტი 1924 წლის აგვისტოს ავანტიურაში აქტიურ მონაწილეობას იღებდა, რის გამოც დააპატიმრეს, მაგრამ მალევე გაათავისუფლეს. თუმცა არც ამის შემდეგ შეუწყვეტია კონტრრევოლუციური საქმიანობა. გახდა რა წითელარმიელი, მენშევიკურ საქმიანობას მაინც აგრძელებდა, კვლავ დააპატიმრეს და გადაასახლეს, როგორც სოციალურად მავნე და გამოუსწორებელი ელემენტი.
1924 წლის აგვისტოს აჯანყების მონაწილე მირონისე ვარდენის ძე ცინცაძეც ვერ გადაურჩა საბჭოთა ხელისუფლების რეპრესიებს.
მირონისე ცინცაძე ჩოხატაურის რაიონის სოფელ ფარცხმაში დაიბადა. იყო გლეხის ოჯახიდან, საშუალო განათლებით, დაუოჯახებელი, 1921 წლიდან მენშევიკური პარტიის წევრი.
1922-23 წლებში, არალეგალური საბჭოთა საქმიანობის გამო, ორჯერ გახლდათ დაპატიმრებული.
1924 წელს გაათავისუფლეს. მოგვიანებით, კვლავ ჩაერთო ანტისაბჭოთა საქმიანობაში. მენშევიკებმა ცინცაძე სპეციალური დავალებით გაგზავნეს სოფელ ხიდისთავში.
1924 წლის აგვისტოს ავანტიურაში ის აქტიურ მონაწილეობას იღებდა და სოფელ ხიდისთავში მეამბოხეთა ერთ-ერთ პოლიტიკურ ლიდერად ითვლებოდა. აჯანყების ჩახშობის შემდეგ გარკვეული პერიოდი იმალებოდა, შემდეგ მთავრობამ შემოირიგა და გაუშვეს არმიაში. ცინცაძე დეზერტირობის გამო კვლავ იმალებოდა და განაგრძობდა ანტისაბჭოთა საქმიანობას.
იგი ჩოხატაურში მენშევიკური ორგანიზაციის ერთ-ერთი პასუხისმგებელი პირი იყო. რის გამოც მირონისე ცინცაძე 1928 წელს დააპატიმრეს და 5 წლით გადაასახლეს.
