საგადასახადო ომბუდსმენის უფლებამოსილება, მისი საქმიანობის ძირითადი პრინციპები და ფორმები, საქართველოს საგადასახადო კოდექსს გამოეყოფა და ცალკე საკანონმდებლო აქტით დარეგულირდება. აგრეთვე, ზუსტდება ომბუდსმენის უფლებები და მოვალეობები, ხოლო ომბუდსმენის სახელწოდება შესაბამისობაში მოდის მის ფუნქციებთან.
კანონპროექტი „საქართველოს ბიზნეს ომბუდსმენის შესახებ“ დღეს საფინანსო-საბიუჯეტო კომიტეტის სხდომაზე განიხილეს.
როგორვც სხდომაზე აღინიშნა, „საქართველოს ბიზნეს ომბუდსმენის შესახებ“ კანონპროექტში სრულად არის ასახული საქართველოს საგადასახადო კოდექსის 42-ე მუხლითა და საქართველოს მთავრობის 2011 წლის 23 თებერვლის N92 დადგენილებით განსაზღვრული საგადასახადო ომბუდსმენის უფლებამოსილება, მისი საქმიანობის ძირითადი პრინციპები და ფორმები.
მთავრობის საპარლამენტო მდივნის, შალვა თადუმაძის განმარტებით, ბიზნეს ომბუდსმენი უფლებამოსილების განხორციელებისას დამოუკიდებელია. მასზე რაიმე ზემოქმედება ან მის საქმიანობაში ჩარევა აკრძალულია.
უფლებამოსილების შეწყვეტის შემთხვევაში, მის მოვალეობას ასრულებს ბიზნეს ომბუდსმენის მოადგილე. თადუმაძის განცხადებით, ბიზნეს ომბუდსმენი უფლებამოსილი ხდება ადმინისტრაციულ ორგანოსთან გააფორმოს შეთანხმება ინფორმაციის ან დოკუმენტების გაცვლისა და ურთიერთთანამშრომლობის შესახებ.
როგორც მთავრობის საპარლამენტო მდივანმა განაცხადა, ზუსტდება ბიზნეს ომბუდსმენის აპარატის მიერ განცხადების განხილვის წესი.
"კანონპროექტი აზუსტებს განმცხადებლისთვის ხარვეზის დადგენის საფუძვლებს, ასევე, ადმინისტრაციული ორგანოდან და განმცხადებლისგან ინფორმაციის გამოთხოვის, აგრეთვე განცხადების განხილვაზე უარის თქმის საფუძვლებს“, – განაცხადა შალვა თადუმაძემ.
მისივე თქმით, ადმინისტრაციული ორგანოები ომბუდსმენის რეკომენდაციის სრულად ან ნაწილობრივ გაუთვალისწინებლობის შემთხვევაში, რეკომენდაციის მიღებიდან 30 კალენდარული დღის ვადაში, წერილობით აცნობებენ ბიზნეს ომბუდსმენს რეკომენდაციის გათვალისწინებაზე უარის თქმის შესახებ, შესაბამისი დასაბუთებით. თადუმაძის განმარტებით, ბიზნეს ომბუდსმენი უფლებამოსილი ხდება საქართველოს მთავრობას ან სხვა ადმინისტრაციულ ორგანოს წარუდგინოს წინადადებები კანონმდებლობის ან ადმინისტრაციული პრაქტიკის სრულყოფის თაობაზე, ასევე შუამდგომლობით მიმართოს შესაბამის ადმინისტრაციულ ორგანოს, კომპეტენციის ფარგლებში, კანონმდებლობით გათვალისწინებული ღონისძიებების განხორციელების თაობაზე.
აღნიშნული კანონპროექტით, ცალკე მუხლით რეგულირდება ბიზნეს ომბუდსმენის აპარატის ფინანსური და ქონებრივი უზრუნველყოფის საკითხები.
კომიტეტმა მხარი დაუჭირა კანონპროექტის პლენარულ სხდომაზე განხილვას.
