სოციალურ ქსელში ვრცელდება ფოტო, სადაც მონადირე ახალგაზრდა მამაკაცი თავს იწონებს ათზე მეტ მოკლულ ირაოსთან.
როგორც ჩვენთვის გახდა ცნობილი, ირაოს (კრაზანაჭამია) მოკვლა კანონით ისჯება.
გარემოს დაცვის ზედამხედველობის დეპარტამენტის ბიომრავალფეროვნების კონტროლის სამსახურის უფროსი, მაია ჩხობაძე, ჩვენთან საუბრის დროს ამბობს, რომ ირაო არ არის სანადირო ფრინველი.
"მისი მოპოვება აკრძალულია და როდესაც მისი მოკვლა მოხდება, არის ჯარიმა და ამას ემატება გარემოზე მიყენებული ზიანი. თუ ზიანი არის 2000 ლარზე მეტი, ამ შემთხვევაში ეს არის მნიშვნელოვანი ზიანი და მიდის სისხლის სამართალზე", – გვითხრა მაია ჩხობაძემ.
ჩვენ ასევე დავინტერესდით, დაჯარიმდებიან თუ არა მგლის ან ტურის მოკვლის შემთხვევაში ადამიანები.
"რაც შეეხება მგლის და ტურის მოკვლას, არც მათი განადგურება შეიძლება. მხოლოდ დაშვებულია სამონადირეო მეურნეობაში, ისიც იმ შემთხვევაში, თუ მათ დამტკიცებული აქვთ კვოტა. ამ ბოლო დროს გახშირებულია მგლის და ტურის თავდასხმა მოსახლეობაზე. თავდასხმის მომენტში, მოგერიების მიზნით, ადამიანს შეუძლია მოკლას ცხოველი, ოღონდ აუცილებლად უნდა აცნობოს გარემოს დაცვის ზედამხედველობის დეპარტამენტს, რომელიც უშუალოდ შეადგენს აქტს და მოხდება ცხოველის დამარხვა, რომ არ მოხდეს მისი გამოყენება რაიმე მიზნით. დანარჩენ მომენტში თუ აწუხებს გარეული ცხოველი, აუცილებლად უნდა მიაწოდონ ინფორმაცია ადგილობრივ თვითმმართველობას და შემდეგ სამინისტრომ გასცეს ნებართვა, ამ შემთხვევაში მგლის მოპოვებაზე.
საჯარიმო სანქციები სხვადასხვაა, გააჩნია, სად და რით ხდება ნადირობა. 500 ლარიდან 1000 ლარამდეა საჯარიმო სანქციები, ჯარიმასთან ერთად, ასევე ემატება გარემოსთვის მიყენებული ზარალის ანაზღაურების ვალდებულება", – გვიპასუხა მაია ჩხობაძემ.
