“მთავარია, მოქალაქე აღარაა დათრგუნული უსამართლობის შიშით!”

საქართველოში 2016 წლის საპარლამენტო არჩევნების მოახლოებასთან დაკავშირებით, პარტიული ცხოვრება კიდევ უფრო აქტიურდება.

შესაბამისად, "გურია ნიუსი" იწყებს გურიაში მოქმედი პოლიტიკური პარტიების, ჯგუფების რეგიონული ხელმძღვანელების პროფილების შექმნას.

ასევე, გაგაცნობთ ადგილობრივი პარტიული ლიდერების მოსაზრებებს ცენტრალურ ოფისთან კომუნიკაციისა და პარტიის მთავარი მიღწევების შესახებ.

გოჩა მეგრელიშვილი, კოალიცია "ქართული ოცნების" ცენტრალური საარჩევნო შტაბის გურიის კურატორი:

პარტიული დოსიე _ ჯერ კიდევ  ეროვნული მოძრაობის დროს, 90-იან წლებში, ჩემს მეგობრებთან ერთად, გავწევრიანდი პარტია "ქართველ ტრადიციონალისტთა კავშირში."  1995 წელს, როცა დავიწყე პროფესიული საქმიანობა, როგორც აპოლიტიკური ორგანოს თანამშრომელმა, პარტია დავტოვე. მოგვიანებით, 2006-07 წლებში, როცა ცხადი გახდა, რომ  პოლიტიკაზე მაღლა მდგომი სტრუქტურებიც კი პოლიტიზებული ხდებოდა, რაც ქვეყნის ინტერესებს აზარალებდა, პირადი პატაკის საფუძველზე დავტოვე შს ორგანოები და აქტიურად ჩავერთე ოპოზიციურ მოძრაობაში, როგორც უპარტიო.

ბიძინა ივანიშვილის ქართულ პოლიტიკაში მოსვლის შემდეგ, დავინახე რა, რომ გაჩნდა რეალურად ახალი პოლიტიკური ძალა, რომელსაც შეეძლო ჩემი ქვეყნის ბედის სასიკეთოდ შემობრუნება, გადავწყვიტე, ჩემი მოკრძალებული წვლილი მეც შემეტანა ამ საქმეში და  მოქალაქეთა პოლიტიკური  გაერთიანება "ქართულ ოცნების" წევრი გავხდი.

_ 2  წელი და 6 თვეა "ქართული ოცნება" მმართველი პარტიაა. პარტიული თვალსაზრისით, ყველაზე მნიშვნელოვანი რა იყო გურიისთვის?

_ მოგეხსენებათ, გურულები პოლიტიკურად აქტიურები, ზომიერად ამაყები და ამბიციურები არიან. მიუხედავად რაოდენობრივი სიმცირისა, ისინი ერთგვარი ლაკმუსის როლს ასრულებენ  ქართულ პოლიტიკაში, რაც ყოველთვის ისახება კიდეც პოლიტიკურ ცხოვრებაზე, კრიტიკულ აზროვნებაზე, ამომრჩეველთა აქტივობაზე და შემდგომ _ შედეგებზე.

პირველ რიგში, მიმაჩნია, რომ გაჩნდა თავისუფლების შეგრძნება, გაქრა ოჯახის წევრების, ახლობლების  ცემა-დაჭერა-დაშინების, სამსახურიდან დათხოვნის შიში, შეიქმნა მშვიდი საარჩევნო გარემო, რაც ქვეყნის ხვალინდელი წარმატების აუცილებელი პირობაა.

ბოლო ორ არჩევნებში გურია გამორჩეული იყო ქვეყანაში ყველაზე მაღალი აქტივობით და "ქართული ოცნების" მაღალი მხარდაჭერით. მიუხედავად იმ დროისთვის არსებული აზრთა სხვადასხვაობისა, გარკვეული ჯგუფების პოლიტიკური ინტერესების და ამბიციებისა, გურულებმა მოვახერხეთ პოლიტიკური კულტურის გამოვლენა და ყოველგვარი ექსცესების, შეხლა-შემოხლის  გარეშე მივაღწიეთ სათანადო შედეგს, რაც ცენტრალური, რეგიონული და ადგილობრივი შტაბების შეთანხმებული, კოორდინირებული მუშაობის შედეგი იყო. რაც მთავარია, წინა წლების არჩევნებისგან განსხვავებით, ამომრჩეველს ჰქონდა თავისუფალი არჩევნის შესაძლებლობა.

_ მმართველი პარტიის პასუხისმგებლობა მარტო არჩევნებში გამარჯვება არაა. რა გაკეთდა ან კეთდება, რომ საზოგადოებამ ქვეყნის წინსვლა იგრძნოს?

_ თავიდანვე შევთანხმდეთ, რომ ქვეყანა 2 ან 3 წელიწადში არ შენდება. წინა ხელისუფლების ლანძღვით დღევანდელი ნაკლის გადაფარვა, ვფიქრობ, არასწორია, მაგრამ მხოლოდ დაპირებებით, პიარით, დროებითი _ არჩევნებიდან არჩევნებამდე დახმარებით, პრობლემების ფერადი სათვალეებიდან დანახვით შორს რომ ვერ წავედით, ფაქტია. შედეგად, მძიმე პოლიტიკური და ეკონომიკური ვითარება მივიღეთ, რასაც უმძიმესი მსოფლიო კრიზისი დაემატა. იმ მოლოდინსაც უნდა დავემშვიდობოთ, რომ "მესია მოგვევლინება" და "კანფეტებს" დაგვირიგებს… ყველაფერი საკუთარი შრომით, ცოდნით და გამოცდილებით უნდა შევქმნათ. აშკარაა, კადრების დეფიციტი _ სოფლად ძალიან ძნელად მოინახება კვალიფიციური აგრონომი, ვეტერინარი, მექანიზატორიც კი… ტექნოლოგიური პროგრესის პირობებში მოთხოვნები შეიცვალა, რაც გარკვეულწილად, სოციალურად ნაკლებად დაცულ საზოგადოებაში იმედგაცრუებას და უკმაყოფილებას  იწვევს, და ეს ბუნებრივია, უმუშევრობის ჯერ კიდევ მაღალი მაჩვენებლის, სავალუტო პრობლემების ფონზე.

მიუხედავად ასეთი ვითარებისა, არ შეიძლება მხედველობიდან გამოგვრჩეს, რომ სახელმწიფო ახორციელებს ბევრ მნიშვნელოვან პროექტს, პირველ რიგში, სწორედ სოციალურად ნაკლებადდაცული მოსახლეობის მდგომარეობის შესამსუბუქებლად. ქვეყანაში მოქალაქეების ჯანმრთელობაა მთავარი, რასაც საყოველთაო უფასო დაზღვევა, C ჰეპატიტის, უფასო მშობიარობის და სხვა მსგავსი პროგრამები უზრუნველყოფს.  მნიშვნელოვანია, რომ 1 აპრილიდან შეიცვალა სოციალური დახმარების გაცემის წესი, რაც იმედია, ნეგატიურ მიდგომებს გამორიცხავს. მნიშვნელოვანია სოფლის მეურნეობის მიმართულებით გახორციელებული და დაგეგმილი პროგრამები, ასევე, უფასო სახელმძღვანელოები მოსწავლეებისთვის, სოფლის და ინფრასტრუქტურული პროგრამები; ბიზნესის ხელშემწყობი პროექტები, რომლებიც ნელ-ნელა იკრეფს ძალას…  და მაინც, ყველაზე მნიშვნელოვნად მიმაჩნია, რომ პიროვნება, მოქალაქე აღარაა დათრგუნული უსამართლობის შიშით და მას აქვს სახელმწიფო ინსტიტუტების იმედი, რომლებიც მის მიმართ "ნულოვანი ტოლერანტობით" არაა განწყობილი!

გოგი ხელაძე, კოალიცია "ქართული ოცნების" ლანჩხუთის რაიონული ორგანიზაციის თავმჯდომარე:                            

 _ ძალიან ხშირად ვხვდებით ერთმანეთს და სამომავლო გეგმებზე ვსაუბრობთ. პარტიის მიღწევებზე თუ ვილაპარაკებთ, მნიშვნელოვანია, რომ პარტიის ყველა წევრი აქტიურად მონაწილეობს კონკრეტული საკითხების გადაწყვეტაში, რაც მუნიციპალიტეტს ეხება. ამ ეტაპზე ახალი წევრების მიღება მიმდინარეობს, რაც ნიშნავს, რომ პარტია წარმატებულია და ძლიერდება.

 დავით დარჩია, კოალიცია "ქართული ოცნების" ოზურგეთის რაიონული ორგანიზაციის თავმჯდომარე:    

 _ რეგიონულ კურატორთან _ გოჩა მეგრელიშვილთან და შესაბამისად, ცენტრთან, ისევე, როგორც ერთმანეთთან,  ინტენსიური კომუნიკაცია გვაქვს და ხშირად ვმსჯელობთ გარკვეული საკითხების ირგვლივ. "ქართული ოცნება" მნიშვნელოვან რეორგანიზაციას გეგმავს და ფართო საზოგადოება ამის შესახებ ამ დღეებში მიიღებს ინფორმაციას.

პარტიის მთავარ მიღწევად ვთვლი, რომ ქვეყანა გავათავისუფლეთ სისხლიანი რეჟიმისგან, რომელიც ცხრა წელი ტერორს ნერგავდა. თავისუფლება იგრძნო ყველა მოქალაქემ. იმედი მაქვს, უკეთესი სიტუაცია იქნება და აღარასდროს დავუბრუნდებით სააკაშვილის ეპოქას.

ირაკლი კუჭავა, კოალიცია "ქართული ოცნების" ჩოხატაურის რაიონული ორგანიზაციის თავმჯდომარე:

_ ცენტრალურ ოფისთან გურიის კურატორის მეშვეობით, ყოველდღიური კომუნიკაცია გვაქვს. ადგილებზე ინტენსიურ კომუნიკაციას ისიც განაპირობებს, რომ ფაქტობრივად, "ქართული ოცნების" რაიონული ორგანიზაციების ბირთვი, ადგილობრივი თვითმმართველობის არჩევნების შედეგად, თვითმმართველობებშია დასაქმებული. რაიონული ორგანიზაციები, მათ შორის გურიაშიც, კონფერენციების ჩასატარებლად ემზადებიან. რაც შეეხება მიღწევებს, მხოლოდ კონცეპტუალურ მიდგომებზე გავამახვილებ ყურადღებას; მაგალითად, გაერო-ს პროგნოზით, დემოგრაფიული კატასტროფის წინაშე ვდგავართ და 2050 წლისთვის, ჩვენს ქვეყანაში უმცირესობაში დარჩენა გვემუქრება. სწორედ კონცეპტუალურად სწორმა მიდგომამ განაპირობა, რომ დღეს შობადობამ აჯობა სიკვდილიანობის მაჩვენებელს. ერთი მხრივ, ჯანდაცვის პრევენციამ _ საყოველთაო ჯანდაცვამ და მეორე მხრივ, შობადობის წახალისებამ (ყოველ მესამე ახალშობილზე სახელმწიფო, ასევე, ადგილობრივი თვითმმართველობების ერთჯერადმა დახმარებებმა) შედეგი გამოიღო.