"ჩემს შემცვლელს დახვდება კორუფციისგან თავისუფალი, გამჭვირვალე სისტემა და დამოუკიდებლობის მაღალ საფეხურზე მდგომი სასამართლო", _ ეს განცხადება 2014 წლის 29 დეკემბერს უზენაესი სასამართლოს მაშინდელმა თავმჯდომარემ კონსტანტინე კუბლაშვილმა მედიასთან შემაჯამებელი პრესკონფერენციისას გააკეთა და დასძინა, რომ ის თავის შემცვლელს ასევე სასამართლოს გაზრდილ ბიუჯეტსაც უტოვებს.
თუმცა, სასამართლოს გამჭვირვალობასთან დაკავშირებით კითხვები არასამთავრობო სექტორს და ჟურნალისტებს, 2005 წლიდან, დღემდე აქვთ. ამ დრომდე უცნობი რჩებოდა, რა რაოდენობის პრემიები და დანამატები გაიცემოდა საერთო სასამართლოებში.
2015 წლის 26 მარტს, "გურია ნიუსთან" ინტერვიუში უზენაესი სასამართლოს ახალმა თავმჯდომარემ, ნინო გვენეტაძემ განაცხადა, რომ მისი მმართველობის პერიოდში საჯარო ინფორმაციის ხელმისაწვდომობა აბსოლუტურად უზრუნველყოფილი იქნება.
"ჩემი დამოკიდებულება მხოლოდ კანონისმიერია. საჯარო ინფორმაცის ხელმისაწვდომობა აბსოლუტურად იქნება უზრუნველყოფილი", _ აღნიშნა ნინო გვენეტაძემ "გურია ნიუსის" კითხვის საპასუხოდ – აპირებთ თუ არა საერთო სასამართლოებიდან წლების განმავლობაში გასაიდუმლოებული პრემიებისა და დანამატების შესახებ ინფორმაციის გასაჯაროებას.
ამ კომენტარიდან სამი დღის შემდეგ "გურია ნიუსმა" საერთო სასამართლოების დეპარტამენტს განცხადებით მიმართა, სადაც 2005 წლიდან 2015 წლის ჩათვლით საერთო სასამართლოებიდან გაცემული პრემიებისა და დანამატების შესახებ ინფორმაციას ვითხოვდით.
თუმცა, საერთო სასამართლოებიდან ჩვენ ინფორმაცია მხოლოდ მოსამართლეებზე გაცემული დანამატების შესახებ მივიღეთ, რაც შეეხება პრემიებს, ამის შესახებ გადმოგზავნილ დოკუმენტაციაში არაფერია ნათქვამი.
რაც შეეხება საერთო სასამართლოების აპარატის თანამშრომელთა პრემიებსა და დანამატებს, ინფორმაცია დაჯამებული სახით მოგვაწოდეს და ეს იმით ახსნეს, რომ პერსონალურ მონაცემის გაცემის უფლებას კანონი არ აძლევთ.
აღსანიშნავია ისიც, რომ სასამართლო სისტემიდან ყველაზე მეტი დანამატი მოსამართლეებმა 2013 წელს მიიღეს და ჯამში ამ თანხამ 130559 ლარი შეადგინა. ეს დანამატი კი 169 მოსამართლეზე გადანაწილდა.
"გურია ნიუსისთვის" მოწოდებული დოკუმენტიდან ირკვევა, რომ დანამატების ოდენობა 200 ლარიდან 5400-ლარამდე მერყეობს.
2013 წლის იანვარში ყველაზე დიდი დანამატი, 5400 ლარი, მოსამართლე მალხაზ გურულმა აიღო.
4000 ლარი აქვს აღებული თბილისის საქალაქო სასამართლოს თავმჯდომარე მამუკა ახვლედიანს, 3750 ლარი ერგო მოსამართლეებს – სერგო მეთოფიშვილს, მევლუდ ხათაშვილსა და ნიკოლოზ მარსაგიშვილს.
3850 ლარი მერაბ გაბინაშვილს, 2950 ლარი მაია თეთრაულს, ქეთევან კუშავასა და ბესარიონ ტაბაღუას. 2700 ლარი გიორგი მიქაუტაძეს, 2300 ლარი ლუიზა თოდუას, 1950 ლარი მამია ფხაკაძეს, 1800 ლარი შოთა გეწაძეს, 1726 ლარი ლევან მეშველიანს, 1666 ლარი ნატრული აკობიას, 1550 ლარი ლაშა კალანდაძეს;
1250 ლარიანი დანამატები მიიღეს მოსამართლეებმა – დავით ნარიმანიშვილმა, გიორგი დარახველიძემ, გოჩა ჯეირანაშვილმა, თემურ გოგოხიამ, ირაკლი ბონდარენკომ, თეიმურაზ სვანიძემ, ვლადიმერ ხუჭუამ, ლევან ნუცუბიძემ და დავით მამისეიშვილმა.
1100 ლარის დანამატი ერგო ილონა თოდუასა და გიორგი ებანოიძეს.
რაც შეეხება საერთო სასამართლოების აპარატის თანამშრომლებზე გაცემულ პრემიებსა და დანამატებს, "გურია ნიუსისთვის" მოწოდებული ინფორმაციის თანახმად, მათზე 5490 ლარის დანამატი და 41 720 ლარის პრემია გაიცა.
"გურია ნიუსი" მოსამართლეებსა და საერთო სასამართლოების აპარატის თანამშრომლებზე გაცემული პრემიებისა და დანამატების შესახებ ინფორმაციას ეტაპობრივად გამოაქვეყნებს.
