საქართველოს უზენაესი სასამართლოს ყოფილ თავმჯდომარეს, რომელმაც თანამდებობა 2015 წლის 23 თებერვალს დატოვა, ქონებრივი დეკლარაციის შევსების ორთვიანი ვადა უკვე ამოეწურა.
ახალი დეკლარაციის მიხედვით, მას ქონებრივი მდგომარეობა დიდად არ შეცვლია, თუმცა, ოჯახს 2015 წლის თებერვალში, კონსტანტინე კუბლაშვილის თანამდებობის დატოვებამდე რამდენიმე დღით ადრე, 16 000-დოლარიანი შენაძენი აქვს გაკეთებული.
უზენაესი სასამართლოს თავმჯდომარეს, კონსტანტინე კუბლაშვილს 2000 წლიდან დღემდე 18 დეკლარაცია აქვს შევსებული. მისი ფინანსური მდგომარეობა ამ 15 წლის განმავლობაში საგრძნობლად შეიცვალა.
კუბლაშვილების ოჯახმა გარდა საცხოვრებელი სახლისა, მცხეთადა და ოზურგეთში მიწის ნაკვეთები და საცხოვრებელი სახლებიც შეიძინა.
ამ საკითხთან დაკავშირებით „გურია ნიუსი“ ცოტა ხნის წინ წერდა სტატიაში – რა ქონებით ტოვებს უზენაეს სასამართლოს კონსტანტინე კუბლაშვილი.
ამჟამად, კუბლაშვილის ოჯახის საკუთრებაშია ორი ბინა თბილისში, ერთი – ვაჟა-ფშაველას გამზირზე, რომლის ფართობიც 55.00 კვ.მ-ია 100%-ით კონსტანტინე კუბლაშვილს ეკუთვნის, მეორე ბინა – პეკინის ქუჩაზე, რომლის ფართობის 190 კვ.მ-ია, მისი მეუღლის, მარინა მესხის საკუთრებაშია.
ასევე, მესხის საკუთრებაშია მიწის ნაკვეთი თბილისში, ზღვის მიმდებარე ტერიტორიაზე, რომლის ფართობიც 1500.00 კვ.მ-ია.
გარდა ამისა, მარინა მესხს ეკუთვნის მიწის ნაკვეთი ოზურგეთის რაიონის სოფელ შრომაში (ფართობი – 160.00 კვ.მ); მიწის ნაკვეთი მცხეთის რაიონის სოფელ წოდორეთში (ფართობი – 1400.00 კვ.მ) და საცხოვრებელი სახლი ამავე სოფელში (ფართობი – 110.00 კვ.მ).
მარინა მესხის საკუთრებაშია მსუბუქი ავტომობილი 2008 წელს გამოშვებული mercedes-benz, რომელიც ოჯახმა 2015 წლის 17 თებერვალს, კონსტანტინე კუბლაშვილის თანამდებობის დატოვებამდე 5 დღით ადრე შეიძინა. ავტომობილის საფასური დეკლარაციის მიხედვით, 16 ათასი დოლარია.
რაც შეეხება ოჯახის შემოსავლებს, 2014 წლის განმავლობაში, მათი ფინანსური შემოსავალი საერთო ჯამში 210 088 ლარია.
აქედან, კონსტანტინე კუბლაშვილის შემოსავალი საქართველოს უზენაესი სასამართლოს თავმჯდომარის თანამდებობიდან 136 895 ლარი იყო, ილიას სახელმწიფო უნივერსიტეტის პროფესორის თანამდებობიდან კი, 19 743 ლარი. გარდა ამისა, კონსტანტინე კუბლაშვილს იურიდიული სახელმძღვანელოს რეალიზაციიდან 1887 ლარიც აქვს მიღებული.
რაც შეეხება მისი მეუღლის, მარინა მესხის შემოსავლებს, დეკლარაციის მიხედვით ასე გამოიყურება – სსიპ „ადამიანით ვაჭრობის (ტრეფიკინგის) მსხვერპლთა, დაზარალებულთა დაცვისა და დახმარების სახელმწიფო ფონდის“ დირექტორის თანამდებობიდან მას 47 063.64 ლარი, ხოლო თსუ იურიდიული ფაკულტეტი სისხლის სამართლის მიმართულების პედაგოგის თანამდებობიდან 4 500 ლარი ერგო.
დეკლარაციის შევსების მომენტში, კონსტანტინე კუბლაშვილის სახელფასო ანგარიშზე „რესპუბლიკა ბანკში“ 14 200 ლარი ირიცხებოდა.
მისი მეუღლის საბანო ანგარიშზე ამაბე ბანკში კი, 1045.00 ლარი, მიმდინარე 23 224.28 დოლარი და 766.00 ევრო; თი–ბი–სი ბანკის მიმდინარე ანგარიშზე კი, 30.00 ლარი.
რაც შეეხება კონსტანტინე კუბლაშვილის შვილს, ანა მარიამ კუბლაშვილს, მის ანგარიშზე ,,თი–ბი–სი“ ბანკში სადეპოზიტო თანხა 20 575 დოლარი იყო.
გარდა ამისა, კონსტანტინე კუბლაშვილს, დეკლარაციის შევსების მომენტში, ნაღდი ფულის სახით 5000 ლარი, მის მეუღლეს კი, 4500 ლარი ჰქონდა.
რაც შეეხება ოჯახის მიერ დადებულ ხელშეკრულებებს, დეკლარაციის მიხედვით ირკვევა, რომ კონსტანტინე კუბლაშვილს 2015 წლის 22 ივნისამდე ილიას სახელმწიფო უნივერსიტეტთან შრომითი ხელშეკრულება აქვს გაფორმებული, რომლის ღირებულებაც 4000 ლარია, თუმცა, მას შემოსავალი ამ თანამდებობიდან ჯერჯერობით არ აუღია.
რაც შეეხება მისი მეუღლის, მარინა მესხის მიერ დადებულ ხელშეკრულებას, დეკლარაციის მიხედვით ირკვევა, რომ მას შრომითი ხელშეკრულება, ააიპ ამერიკული სამართლის სკოლის პროგრამული განვითარების მენეჯერის თანამდებობაზე აქვს დადებული, რომლის ღირებულებაც 3 500.00 ლარია (ხელშეკრულების მოქმედების ვადა 17/02/2015, 17/02/2015 – 17/07/2015). ამ თანამდებობიდან შემოსავალი ჯერჯერობით არც მარინა მესხს აქვს მიღებული.
დეკლარაციის მიხედვით, ოჯახი არ ფლობს ფასიან ქაღალდებსა და ძვირადღირებულ ნივთებს.
