ოზურგეთის მუნიციპალიტეტის საკრებულოს ინიციატით, ღია კარის დღე პირველად ჩატარდა. ადგილობრივი ხელისუფლების წარმომადგენლები, ორი საათის განმავლობაში ისმენდნენ მოსახლეობის პრობლემებს.
გურიანთელი, გური არობელიძის თქმით, სოფლის მეურნეობაში ბოლო სამ წელიწადში ბევრი სიახლე იყო, მაგრამ ბოლო დროს საყანე ფართობში თესვის პროცესი გაძვირდა და ამ საკითხის გადაჭრა ხელისუფლებას სთხოვა.
"გაზაფხულია ახლა და ყანები უნდა დაითესოს. აგრონომი კაცი ვარ და ყანას ყოველთვის ვთესავდი. 5 მაისისთვის ინფორმაცია უნდა მიგვეწოდებინა გამგეობისთვის, რომ ეს პროცესი დამთავრებულია, მაგრამ დახნული არ არის ერთი ფართობი, ტრაქტორები არის "გაბარბარებულია" ჩაივლით მერიის გზაზე და ნახავთ. კაცმა არ იცის რა აკეთებენ. ვაუჩერები დაარიგეს ყანების დასახნავად, მაგრამ დათესვა ხომ უნდა? ამის საშუალება კი ხალხს არ აქვს. დახნულ ფართობზე ითხოვენ, რომ 20 ლარი მოგვეცითო, რით მივცეთ?, ვიცი, მთავრობა აკეთებს და კარგი პროექტებია სოფლის მეურნეობაში, მაგრამ ისინი ვინ არის, ვინც 20 ლარს ითხოვენ დათესვაში? გასულ წელს 8-9-10 ლარად ვთესავდით". _ თქვა გური არობელიძემ.
ადგილობრივი ხელისუფლების თქმით, ამ საკითხით ისინი დაინტერესდებიან. ასევე ითქვა ის, რომ პროექტის ფარგლებში მხოლოდ საყანე ფართობის ხვნის საკითხი არის გადაჭრილი.
მანანა ღაჟონია, სოფელი დვაბზუში ცხოვრობს: პრობლემები ძალიან ბევრია სოფელში, მაგრამ ყველაზე მეტად, რაც გულისტკივილით მინდა გითხრათ და მოგმართოთ, ეს არის დასუფთავების პრობლემა. მე ვცხოვრობ ცენტრალურ ქუჩაზე, საყოფაცხოვრებო ნარჩენების პრობლემა გვაქვს, ყოფილი პროფილაქტიკა, რომ იყო იმ ტერიტორიაზე, სხვა უბნებიდან მოაქვთ კიდევ ნარჩენები და ძალიან მძიმე სიტუაციაა. ყოფილი საბურავეების ქარხანის ტერიტორიაზეც მსგავსი სიტუაციაა, ჩვენ თხოვნა არის დაგვეხმაროთ სანაგვე ურნების დადგმაში.
ნათია ნინიძე მარტოხელა დედაა და მხოლოდ ერთი საკითხის გადაჭრა სურს.
"ვზრდი ერთ შვილს, ოთხი წლის არის. ვცხოვრობ მშობლების პენსიაზე. როგორც კი გაწვიმდება სახლში ჩამოდის წყალი და არანაირი რესურსი არ გვაქვს იმისთვის, რომ ეს პრობლემა მოვაგვაროთ. პირველად ვარ და არავისთვის არ მითქვამს ჩემი პრობლემისთვის".
ლენა კაცაძე, სოფელი ნაგომარი: სახლში ექვსი სული ვცხოვრობთ, არ მყავს მეუღლე, შვილს კი ჯანმრთელობის კუთხით პრობლემები აქვს, წამლის ფული ჩვენ არ გვაქვს და პროდუქტებს ძლივს ვყიდულობთ. ორ ოთახში ვცხოვრობთ ექვსი სული… მხოლოდ სოციალური დახმარების იმედზე ვართ. როგორ სახითაც შეგიძლიათ იმ სახით დამეხმარეთ. დღეს მოვედი და ვთქვი ჩემი პრობლემის შესახებ. სახლი გაბზარულია, ყოველთვის მეშინია არ დაინგრეს.
ქეთევან დარჩია, სოფელი ოზურგეთი: სოფელ ოზურგეთში ვცხოვრობ, ცენტრში. ექვსი ოჯახი არის გაზის გარეშე დარჩენილი, გეგმაში ვერ მოვხვდით. ერთი წლის წინ, "სოკარში" მოგვილოცეს, რომ გეგმაში მოგხვდითო და მოგვარდება ეს პრობლემაო. ერთი წელი გავიდა და ამ დრომდე არ მოხერხდა ამ პრობლემის მოგვარება. ძალიან გთხოვთ მოგვაქციოთ ყურადღება, ვერ ვხვდებით რა ხდება და რატომ გვატყუბენ.
ღია კარის დღის დასასრულს "ლეიბორისტული პარტიის" წევრმა, ქალაქ ოზურგეთის წარმომადგენლობითი ორგანოს დეპუტატმა, ნათია შარაშენიძემ ოზურგეთის თემთა მუნიციპალიტეტის საკრებულოში გამართულ "ღია კარის დღეზე", საკრებულოსა და გამგეობის ხელმძღვანელობა უყურადღებობაში დაადანაშაულა.
ნათია შარაშნიძემ მუნიციპალიტეტი სოფელ მელექედურში მცხოვრები ფარეხაშვილების ოჯახის მიმართ უმოქმედობაში დაადანაშაულა. როგორც შარაშენიძემ აღნიშნა, მშენებელმა კომპანიამ, რომელმაც მელექერდურში გზა გაიყვანა, ფარეხაშვილების მიმდებარე ტერიტორიაზე არ გაჭრა წყლის გამტარი არხი, რის გამოც მათი ეზო უამინდობის დროს იტბორება, სახლში შედის წყალი და ეს პრობლემა არის მოსაგვარებელია.
"თქვენ აქ მადლობების მოსასმენად შეიკრიბეთ? კანონების და კოდექსის მოსასმენად მე არ მოვსულვარ და არ მაინტერესებს, მხოლოდ ის შემიძლია გითხრათ, რომ ფარეხაშვილების ოჯახის პრობლემა დროულად მოაგვაროთ. მე არ მომწონს თქვენი ინიციატივა. ნაცვლად იმისა, რომ თქვენ თითოეული მათგანი სოფელში წასულიყავით, ადამიანები გაზაფხულზე მოწყვიტეთ ხვნას, დათესვას და მოგყავთ ადმინისტრაციულ შენობაში. ასე გააგრძელეთ…"
როგორც ოზურგეთის მუნიციპალიტეტის გამგეობაში აცხადებენ, სამშენებლო კომპანია "მარგინმა" გზა მელექედურში გასულ წელს გაიყვანა. დღეს ეს კომპანია აღარ არსებობს, თუმცა თავის დროზე, გამგეობის ინფრასტრუქტურის თანამშრომლებმა ფარეხაშვილებს არხის გასაჭრელად ნებართვა სთხოვეს, რისი უფლებაც ოჯახმა მათ ყანის გაფუჭების მიზეზით არ მისცა. აღნიშნული პრობლემის მოგვარებას კი ოჯახი დღეს ითხოვს.
ოზურგეთის მუნიციპალიტეტის საკრებულოს თავმჯდომარის მოადგილე, დიმიტრი კვერღელიძე ნათია შარაშენიძეს "გურია ნიუსის" საშუალებით პასუხობს:
"ჩვენთვის მთავარი პრინციპია საჯაროობა, უშუალო და ღია კავშირი მოსახლეობასთან, რომლის დასტურიც "ღია კარის სხდომაც" გახლდათ. გულწრფელად ვწუხვარ, რომ დღეს კოლეგამ მეზობელი მუნიციპალიტეტიდან, ნათია შარაშენიძემ, რომელმაც პროცედურების დარღვევითა და ჩვენი კეთილგანწყობით ისარგებლა, ცხადად დაადასტურა, რომ იგი მოსახლეობის მნიშვნელოვან და ღირებულ ინტერესებს უგულვებელყოფს. ეს ქალბატონი, დღეს წარმოჩინდა, როგორც არაკომპეტენტურობის საფუძველზე შერჩეული დეპუტატი, რომელსაც ელემენტარული ცოდნა არ გააჩნია თვითმართველობის საკითხებზე, საკრებულოს რეგლამენტზე. ამ შეხვედრაზე პოლიტიკური დივიდენდების დაწერის სანაცვლოდ, მისი შეუსაბამო, კონტექსტიდან ამოვარდნილი განცხადებებით, საკუთარი თავის ლუსტრირება მოახდინა. ვურჩევ ხელშეშლის ნაცვლად, ოზურგეთის მუნიციპალიტეტის ამ წამოწყებას მხარდაჭერა გამოუცხადოს". – თქვა დიმიტრი კვერღელიძემ.
ოზურგეთის მუნიციპალიტეტის გამგებლის, მერაბ ჭანუყვაძის თქმით, ღია კარის დღე არის კარგი ინიციატივა.
"ჩვენ მოსახლეობასთან შეხვედრებს ვმართავთ ყოველ დღე, მაგრამ ამ ფორმატით ოზურგეთის მუნიციპალიტეტის საკრებულოს ინიციატივით პირველად შევხვდით. ვიმედოვნებ, რომ ეს პროექტი გაგრძელდება. ჩვენ მაქსიმალურად ვიქნებით ჩართულები იმ პრობლემების მოგვარებაში, რომელიც მოსახლეობას უდგას. არცერთი პრობლემა არ დარჩება გადაუჭრელი.
ჩვენი ვალდებულებაა ხალხთან მივიდეთ, მაგრამ კარგია, როდესაც ღია კარის დღის ფორმატით მოხდა მსგავსი ტიპის შეხვედრა. ნამდვილად ვერ დავენთახმები ნათია შარაშენიძის გამოსვლას. ჩვენთან მოვიდა მოსახლეობა, რომელსაც უნდოდა ჩვენთვის თავისი პრობლემების შესახებ ესაუბრა და ამ ყველაფერს ნამდვილად ექნება შედეგი. მასმედიის წარმომადგენლები ესწრებოდნენ შეხვედრას და მინდა გითხრათ, რომ ძალიან ბევრი პრობლემის შესახებ ისაუბრა მოსახლეობამ, რომელიც უნდა გამოვასწოროთ და აუცილებლად მოხდება ეს შეძლებისდაგვარად. იყო რამდენიმე ადამიანი, რომელმაც თქვა სამადლობელი ადგილობრივი ხელისუფლების მიმართ და ამაში რატომ დაინახა პრობლემა ნათია შარაშენიძემ ვერ ვხვდები", – გვითხრა მერაბ ჭანუყვაძემ.
