გურიის სამხარეო ადმინისტრაციაში 50 თანამშრომელია დასაქმებული. აქედან ხუთი _ ხელშეკრულებით არის აყვანილი. მხოლოდ მათი ხელფასებით უზრუნველყოფა სახელმწიფო ბიუჯეტს წლის განმავლობაში ნახევარ მილიონ ლარზე მეტი უჯდება.
გურიის სამხარეო ადმინისტრაცია, საქართველოს დანარჩენი 8 რეგიონის სამხარეო ადმინისტრაციისგან მხოლოდ იმით გამოირჩევა, რომ ხუთი ათეული საშტატო ერთეულიდან, საზოგადოებასთან ურთიერთობის სამსახურს ვერც ერთი მოქალაქე არ მოერგო, გარდა, ვიცე-გუბერნატორ ლელა თავართქილაძისა, რომელიც ითავსებს ზემოთ ხსენებულ თანამდებობას, ოფიციალურად კი გუბერნატორის მოადგილეა.
ამ დრომდე პასუხგაუცემელია, რატომ არ უნდა ჰყავდეს გურიის სამხარეო ადმინისტრაციას პირი, რომელიც საზოგადოებასთან ურთიერთობის სამსახურში იქნება, მაშინ, როცა მხოლოდ ოზურგეთის მაგალითზე რომ ვისაუბროთ, მუზეუმიდან დაწყებული, დასუფთავების სამსახურით დასრულებული, ყველა საბიუჯეტო ორგანიზაციაში, ეს შტატი ბოლო წლებია, ჟურნალისტების დასაქმების მიზნით, აქტიურად ინერგება. სხვა საქმეა, რა მისიით შეიქმნა ახალი სამუშაო, ფაქტობრივად, უფუნქციო ადგილები, მაგრამ ფაქტია, რომ ამ მიმართულებით, ოზურგეთის მუნიციპალიტეტის ბიუჯეტიდან საკმაოდ სოლიდური თანხები იხარჯება.
თუ სამხარეო ადმინისტრაციის საკადრო პოლიტიკით ვიხელმძღვანელებთ, სოკოებივით მომრავლებულ, შტატებგადავსებულ აიპ-ებში, კიდევ უფრო უფუნქციო _ პრესამსახურის შტატები არ უნდა გვხვდებოდეს. პარადოქსული ყოფის ერთ-ერთი თვალნათელი გამოვლენაა პრეს-სამსახურების არსებობა ორგანიზაციებში და ამავე პრეს-სამსახურების მედია საშუალებებთან ურთიერთობების აკრძალვა, უკიდურეს შემთხვევაში, მხოლოდ “საჭირო” გამოცემების გამოწერის დავალება.
სამხარეო ადმინისტრაციის პრესსამსახურის ფუნქციას, ვიცე-გუბერნატორი ლელა თავართქილაძე შიგადაშიგ ასრულებს, ხან ოზურგეთის რაიონული პროკურატურის პრესსამსახურად გვევლინება, ხანაც კი რეგიონში ჩამოსული სხვადასხვა მაღალი რანგის ჩინოსნების ჩამოსვლის გაპიარებით არის დაკავებული. თუმცა, როცა კომენტარის მოპოვებას ვცდილობთ, გურიის სამხარეო ადმინისტრაციაში ხშირად გვეუბნებიან, რომ ადმინისტრაციის უფროსს უნდა მივმართოთ, ამ სამსახურის უფროსი კი საჯარო ინფორმაციის გაცემაზე პასუხისმგებელი პირია და არა პრესასთან და მედიასთან ურთიერთობის სპეციალისტი.
როგორც, სხვა, დანარჩენ რეგიონებში მომუშავე ჩვენი კოლეგები ამბობენ, მათ სამხარეო ადმინისტრაციებში მედიასთან ურთიერთობის სპეციალისტები მუშაობენ.
როგორც “გურია ნიუსთან” საუბარში გურიის გუბერნატორის მოადგილე, ლელა თავართქილაძე ამბობს, საქართველოს პრეზიდენტის #406 ბრძანებულებით, ადმინისტრაციის შემადგენლობაში 6 სამსახურია გათვალისწინებული, როგორც სტრუქტურული ერთეული, სადაც საზოგადოებასთან ურთიერთობის სამსახური ცალკე ერთეულად არ მოიაზრება. მაგრამ, ამ ექვსიდან ერთ-ერთის, კერძოდ, ადმინისტრაციული სამსახურის ფუნქციებს მიეკუთვნება მასობრივი ინფორმაციის საშუალებებთან, არასამთავრობო და სხვა საზოგადოებრივ ორგანიზაციებთან, გუბერნატორისა და ადმინისტრაციის ურთიერთობის უზრუნველყოფა. შესაბამისად, ამავე სამსახურში, ასევე დამტკიცებულია საჯარო ინფორმაციის გაცემაზე პასუხისმგებელი პირი.
როგორც ჩანს, გურიას იმდენად უჭირს, რომ პრესსამსახურის შტატის არქონის ხარჯზე მიღებული დანაზოგით, ხელისუფლება უამრავ “კეთილშობილურ” პროექტებს ახორციელებს ან სხვა გუბერნატორები არღვევენ პრეზიდენტის ბრძანებულებას.
