ჰიბრიდული სიმინდის ავკარგიანობაზე საუბარი არ წყდება. სახელმწიფო პროგრამას, რომელიც ამერიკიდან შემოტანილი თესლით ფერმერებისა და გლეხების სათესლე მასალით მომარაგებას ითვალისწინებდა, ჰყავს როგორც მომხრეები, ისე მოწინააღმდეგეებიც.
საქართველოს მთავრობა კმაყოფილებას გამოთქვამს ამერიკის შეერთებული შტატებიდან შემოტანილი ჰიბრიდული სიმინდის დათესვის გამო და, ხელისუფლების წარმომადგენლები და მხარდამჭერები მოწეულ ტაროებს სადემონსტრაციოდ ხან პარლამენტში ატრიალებენ და ხანაც მთავრობის სხდომებზე. დადებით მხარეს ბოლომდე რომ მივყვეთ, ოფიციალური მონაცემებით, “პიონერის” სიმინდმა მნიშვნელოვნად გააუმჯობესა, როგორც მოსავლის რაოდენობა, ასევე მიღებული მარცვლის ხარისხობრივი მაჩვენებელი. თუმცა, ეს “იდეალური სურათი”, 27 სექტემბერს პარლამენტში გაკეთებული განცხადებების შემდგომ, როგორც ჩვენი პრეზიდენტი იტყოდა, “ჩამოიშალა”.
იმავე სხდომაზე, ოპოზიციური ფრაქციის დეპუტატებმა, უმრავლესობისგან განსხვავებით, ცუდი მოსავლის სადემონსტრაციოდ, მეჩხერმარცვლიანი და ფაქტობრივად “განუვითარებელი” ტაროები ატრიალეს. სიმინდის ტაროებით “ხანჯლაობა” დიდხანს გაგრძელდებოდა, რომ არა ერთი ფაქტორი _ ინფორმაციის შემოდინება დაიწყო თავად ხეირმიღებული და დაზარალებული ადამიანებისგან. დეპუტატთა მტკიცებით, მწირი მოსავლის გამო, ბევრი ფერმერი ვერ ანაზღაურებს გაწეულ ხარჯს და ვერ ფარავს სახელმწიფო პროგრამის ფარგლებში აღებულ შეღავათიან კრედიტს.
იგივე სურათი იხატება სამეგრელოს სოფლებშიც. როგორც ხობელი მოგელი სოსელია გვეუბნება, აგროვადების დაცვის მიუხედავად, ჰიბრიდულმა სიმინდმა, იმედები გაუცრუა. არადა, ეს რაიონი, ყოველთვის გამოირჩეოდა სიმინდის მაღალმოსავლიანობით: “დავთესე აგროვადებისა და ყველა წესის დაცვით. დათესვა, თავიანთი ახალი ტექნიკით მოხდა, თუმცა, ამოსვლით, მხოლოდ 30% ამოვიდა. არც სასუქის შეტანა არ დამიგვიანებია და არაფერი,” _ ამბობს მოგელი სოსელია, რომელიც ბანკის კრედიტის გადახდაში სახელმწიფოს დახმარებას თხოვს, წინააღმდეგ შემთხვევაში, მისივე თქმით, სოფლის მეურნეობაზე ხელის აღება მოუწევს.
იგივე პრობლემის წინაშე აღმოჩნდა, ხობის მუნიციპალიტეტის სოფელ შუა ხორგის მკვიდრი, ლილი გვალია: “ერთ ჰექტარზე დავთესეთ 22 კილოგრამი და არანაირი შედეგი არ არის. ტყუილად მოგვიწია ტექნიკის დაქირავება, ხარჯის გაღება,” _ ამბობს ლილი გვალია.
მათგან განსხვავებით, იგივე სოფლის მკვიდრი, როლანდ ჯიქია ამბობს, რომ ადგილობრივისგან განსხვავებით, ორჯერ მეტი მოსავალი მიიღო იმ მიწის ფართზე, რომელიც მის საკუთრებაშია და მისივე თქმით, მწირმოსავლიანიცაა. ჯიქია, ამერიკული თესლის დათესვას, მომავალ წელსაც აპირებს.
ხობის მუნიციპალიტეტის გამგეობამ, სათესლედ, 750 კილოგრამი წითელი და ერთი ტონა თეთრი მასალა შეიტანა, რომელიც წინასწარ დარეგისტრირებულ 131 მოქალაქეს გაუნაწილეს. ხობის მუნიციპალიტეტის გამგეობის ადმინისტრაციის უფროსი, ბესიკ ნაჭყებია, რომელიც კარგი მოსავლის ვერმიღების მიზეზად, ზოგიერთი გლეხის სიზარმაცეს ასახელებს: “ის გლეხები, რომლებმაც ეს სიმინდი დათესეს და მოსავალი ვერ მიიღეს, მიზეზი საკუთარ თავში ეძებონ. უხეშად რომ ვთქვათ, ეს სიმინდი არ არის ზარმაცების სიმინდი. მას ჭირდება, გარკვეული აგროტექნიკა, სასუქები და ვადების დაცვა. აქედან გამომდინარე, ეს სიმინდი მინდორში დავყაროთ და მერე მოსავალი მივიღოთ, ასე ნამდვილად არ არის. ვინც გაისარჯა, მოსავალი ყველამ მიიღო,” _ აცხადებს ნაჭყებია.
სოფლის მეურნეობისა და სურსათის სამინისტრომ, სიმინდის წარმოების ხელშეწყობის პროგრამის ფარგლებში, 2011 წელს, 30 ათასი ჰექტარის შესაბამისი სათესლე მასალა შეიძინა. როგორც ამ პროგრამისთვის სპეციალურად შექმნილი ვებ-გვერდიდან _ სიმინდი.გე ვკითხულობთ, სათესლედ, გლეხების მიერ მოწეული სიმინდის გამოყენება არ არის რეკომენდირებული, შესაბამისად, მომავალი წლისთვის, გლეხებს მისი შეძენა ისევ მოუწევთ.
“ჰიბრიდული სიმინდის თესლის შემდეგ წელს დათესვა არ არის რეკომენდირებული, რადგან იგი მაღალმოსავლიანობის უნარს ავლენს მხოლოდ დათესვის წელს, ე.ი. პირველ თაობაში, შემდგომ თაობაში მაღალმოსავლიანობის უნარი მკვეთრად ქვეითდება, ამიტომ, მიღებული მოსავლის თესლად გამოყენება არ არის სასურველი,” _ ვკითხულობთ სიმინდი.გე-ზე.
ამავე ვებ-გვერდზე ისიცაა განმარტებული, ფიტავს თუ არა მიწას ჰიბრიდული სიმინდი, რაზეც საუბარი მუდმივად მიმდინარეობს:
“სიმინდი მაღალპროდუქტიული და მაღალმოსავლიანი კულტურაა. ამის გამო, ნიადაგიდან გამოაქვს დიდი რაოდენობით ნიადაგში არსებული საკვები ნივთიერებები, ამიტომ მისი ზედიზედ, დიდი ხნის განმავლობაში, ერთსა და იმავე ნაკვეთზე თესვით, რომ არ მოხდეს ნიადაგის გაღარიბება-გამოფიტვა, საჭიროა საკვები ნივთიერებების ხელოვნურად შეტანა. გარდა ამისა, გამოვიყენოთ კულტურათა მონაცვლეობა _ თესლბრუნვა. სიმინდი ძალიან “თავმდაბალი” კულტურაა და “წუნია” კულტურა არ არის _ ის ძალიან კარგად იტანს მის წინამორბედ თითქმის ყველა კულტურასა და ნიადაგს”.
ჰიბრიდული სიმინდისგან განსხვავებით, იგივე ნიადაგზე, სხვა კულტურების მოყვანა რეკომენდირებულია: “სიმიდი ყველაზე კარგი “მასპინძელი” კულტურაა. მისი ბიოლოგიიდან გამომდინარე ითვლება ნებისმიერი სასოფლო-სამეურნეო კულტურის კარგ წინამორბედ კულტურად. ამიტომ, სიმინდის შემდეგ, შესაძლებელია სხვა კულტურის მოსავლის მიღება,” _ აღნიშნულია სპეციალური ვებგვერდზე სიმინდი.გე.
