23 წლის შეზღუდული შესაძლებლობების მქონე ღვთისომ, წარმატებით დაამთავრა სკოლა, ჩააბარა ერთიანი ეროვნული გამოცდები და სტუდენტიც გახდა, თუმცა იმის გამო, რომ უმაღლეს სასწავლებელს სპეციალური საგანმანათლებლო საჭიროების მქონე პირისთვის შესაბამისი გარემო არ ჰქონდა, მას სტატუსი შეჩერებული აქვს.
"12 წელი იარა სკოლაში. გამოცდებიც წარმატებით ჩააბარა და ანდრია პირველწოდებულის სახელობის საპატრიარქოს უნივერსიტეტში, ფილოლოგიის ფაკულტეტზე ჩაირიცხა. მას გადაადგილების, მეტყელების პრობლემა არ აქვს. კითხულობს ბევრს. მისი პრობლემა მხოლოდ ისაა, რომ ასოციალურია – არ უყვარს მანქანების ხმაური, განათება, პირდაპირ შეუძლია ვიღაცასთან მივიდეს და შენიშნვა მისცეს თუ ის მისთვის მიუღებელ რაიმეს აკეთებს, ან ამბობს. უნივერსიტეტში რომ მივიყვანე, გვითხრეს რომ ხელ შეგვიწყობდნენ. ვინაიდან, იმ პერიოდსი ფეხი მქონდა მოტეხილი, ღვთისოს კი მარტო ვერ გავუშვებდი, რამდენჯერმე მოგვიწია ლექციის გაცდენამ, თუმცა ღვთისო გაცდენილ მასალებს სწავლობდა და ლექტორებსაც აბარებდა. თუმცა, სამწუხაროდ გაცდენილი საათების გამო პრობლემა შეგვიქმნეს დეკანათში და როცა მათ ვთხოვე, რომ ხელი შეეწყოთ, მითხრეს – განსაკუთრებით ხომ არ გადავუსვამთ თავზე ხელსო… ახლა, ღვთისოს სტუდენტის სტატუსი შეჩერებული აქვს", _ ჰყვება "გურია ნიუსთან" ღვთისოს დედა.
ღვთისო, დღის ცენტრი "ბავშვი, ოჯახი, საზოგადოება" აღსაზრდელი იყო და ახლა, სავარაუდოდ, ისევ აქაურობას დაუბრუნდება.
დღის ცენტრში სულ 2 ჯგუფი ფუნქციონირებს – 18 წლამდე და 18 წელს მაღლა.
ჯგუფებში აღსაზრდელების ლიმიტია დაწესებული. 18-წლამდე ჯგუფში 22 ბავშვია, მაქსიმუმი კი 23-ა. დიდების ჯგუფში დღის ცენტრს მაქსიმუმ 29 ბავშვის მიღება შეუძლია.
როგორც აქ განმარტავენ, ხშირია შემთხვევები, როცა მსურველები მეტია, ვიდრე ცენტრში ადგილები.
"ბავშვი, ოჯახი, საზოგადოება"-ს აღსაზრდელები შშმ პირები არიან, რომლებიც აქ ფერების გარჩევას, კითხვას, მათემატიკას, სწავლობენ. მათ ასევე ჰყავთ მუსიკის მასწავლებელი, დრამთერაპევტი და სპორტულ-გამაჟანსაღებელი აქტივობების ინსტრუქტორი. უფროს ჯგუფში ძირითადად ხელსაქმის შესწავლით არიან დაკავებულები.
აქ თითოეული ბავშვისთვის სპეციალური ერთ წლიანი სასწავლო გეგმა დგება და სწორედ ამის მიხედვით ხელმძღვანელობენ შემდგომში პედაგოგები.
ახლა, დღის ცენტრში "ბავშვი, ოჯახი, საზოადგოება" სპექტაკლს დგამენ, თუმცა პრობლემა შეექმნათ – რამდენიმე მსახიობს ვაუჩერი შეუჩერდა და ისინი ცენტრში სიარულს გარკვეული პერიოდის განმავლობაში ვეღარ შეძლებენ.
როგორც ცენტრის დირექტორი მაია ბიბილეიშვილი ამბობს, ამ დროისთვის ვაუჩერი 3 აღსაზრდელს შეუჩერდა, აქედან 2 ბავშვთა სახლის მკვიდრია.
"3 ბავშვს შეუჩერეს ვაუჩერი და მიზეზი ასე განგვიმარტეს – ახალი ვაუჩერების პროგრამა მარტში დამტკიცდა. ამ აღსაზრდელებს ვაუჩერი გასული წლის მაისში ჰქონდათ აღებული და 1 წლიანი ვადა ჰქონდათ, ხოლო დანარჩენების ვადა 1 თვიანი იყო. ახლა როცა ახალი პროგრამა დამტკიცდა მათ უთხრეს, რომ რადგან ერთი წლის განმავლობაში ისარგებლეს, ახლა მომლოდინეებში უნდა გადასულიყვნენ. ეს ნიშნავს, რომ თვეები მოუწევთ მოცდა, სანამ ადგილი გათავისუფლდება.
ერთ-ერთი ასეთი ვაუჩერშეჩერებული აღსაზრდელი, დღეს, თავისი ფეხით მოვიდა (მას გადაადგილების პრობლემა არ აქვს) და როგორ ავუხსნა, რომ ვაუჩერი არ აქვს და წავიდეს?
გარდა ამისა, თითოეული მათგანისთვის ჩვენთან ერთწლიანი სასწავლო გეგმა დგება, ისინი რომ თვეების განმავლობაში ვეღარ ივლიან ჩვენთან გამოდის, რომ ყველა წინსვლა რაც კი გვქონდა და ამისთვის გაწეული შრომა, წყალშია გადაყრილი. თანაც სპექტაკლზე ვმუშაობთ და ჩვენ ასე მსახიობებს ვკარგავთ…", _ ამბობს "გურია ნიუსთა" ბიბილეიშვილი.
იმაზე, რომ დღის ცენტრში ბავშვები პროგრესს განიცდიან და ვითარდებიან, აღსაზრდელების მშობლებიც საუბრობენ.
"მშვიდად ვარ, როცა ვიცი, რომ დღის ცენტრში, საოცრად გამოცდილი და კარგი პედაგოგების ხელშია. საღამოს დაწყნარებული, დამშვიდებული და გაწონასწორებული მოჰყავთ სახლში. ძალიან ბევრი რამ ისწავლა, რასაც მე მიუხედავად ბევრი მცდელობისა, ვერ ვახერხებდი. იცის თვლა, ცნობს ასოებს, ფერებს და მელოდიასაც უკრავს", _ ამბობს "გურია ნიუსთან" ერთ-ერთი აღსაზრდელის დედა, მზია ქაჯაია.
ნათელი ფერები, მომღიმარი სახეები და საქმიანი გარემო – დღის ცენტრი "ბავშვი, ოჯახი, საზოგადოება" როგორც აღსაზრდელების მშობლები აღნიშნავენ ის ადგილია, სადაც მათ შვილს კომუნიკაციისა და თვითრეალიზაციის საშუალება ეძლევათ.
