კანის კინოფესტივალზე მიწვეული ქართველი რეჟისორი გია კაჭარავა დაფინანსების არქონის გამო ვერ წავიდა, თუმცა, ეროვნული კინოცენტრის ხელმძღვანელი ნანა ჯანელიძე და მისი მოადგილე, ასევე რამდენიმე ქართველი კინორეჟისორი უკვე კანში იმყოფებიან.
ამის შესახებ "გურია ნიუსს" ინფორმაცია კინოცენტრის პრესსამსახურში დაუდასტურეს და აღნიშნეს, რომ ნანა ჯანელიძე ფესტივალზე გუშინ გაემგზავრა.
რეჟისორ გია კაჭარავა, რომლის ფილმიც – "ჩაო ჯორდანო" კანის კინოფესტივალის მოკლე ფილმების კუთხეში მოხვდა, დაფინანსების არქონის გამო კინოფესიტივალზე ვერ გაემგზავრა, რის გასაპროტესტებლადაც ის უკვე მესამე დღეა კულტურის სამინისტროსთან შიმშილობს.
დახმარების თხოვნით გია კაჭარავამ საქართველოს კულტურისა და ძეგლთა დაცვის სამინისტროს ფესტივალამდე დაახლოებით ერთი კვირით ადრე მიმართა, თუმცა, სამინისტროში განუცხადეს, რომ დროის სიმცირის გამო, მისთვის დაფინანსების მიცემა ვეღარ მოესწრებოდა.
საკუთარი სახსრებით კი, კაჭარავამ კანში გამგზავრება ვერ შეძლო.
როგორც კაჭარავა "გურია ნიუსთან" საუბრისას აცხადებს, კანის კინოფესტივალის ორგანიზატორებმა მას კულტურის სამინისტროსთან შუამდგომლობა სთხოვეს, რადგან სამინისტროს ოფიციალურ მეილზე ისინი მოწვევის შესახებ ინფორმაციას ვერ აგზავნიდნენ.
"დამიკავშირდნენ კანის კინოფესტივალის ორგანიზატორები და მითხრეს, რომ წერილს ვაგზავნით კულტურის სამინისტროში და არ იგზავნებაო. ამის შემდეგ, მივედი სამინისტროში ვაცნობე ამის შესახებ. დამაკავშირეს მინისტრის თანაშემწე სალომე ღუდუშაურთან, რომელსაც ეს წერილები გადავუგზავე. რამდენიმე დღის შემდეგ დამირეკა და მითხრა, რომ წერილებს განიხილავდნენ და პასუხს შემატყობინებდა, თუმცა, შემდეგ მითხრეს, რომ 2 თვით ადრე უნდა შემოგეტანათ განაცხადი, ახლა დაფინანსება ვეღარ მოესწრებაო. ეს ფაქტობრივად უარი იყო, რადგანაც 2 თვის წინ არც კი ვიცოდი მიმიწვევდნენ თუ არა", _ განაცხადა კაჭარავამ "გურია ნიუსთან" საუბრისას.
სამინისტროში კი აცხადებენ, რომ პროექტების დასაფინანსებლად 2-თვიანი პერიოდი საჭირო არ არის.
"გია კაჭარავამ ღონისძიებამდე 5 დღით ადრე თხოვნით და არა ოფიციალური წერილით მოგვმართა. არც ბიუჯეტი იყო გათვლილი და არც პროექტი გაწერილი. კინოფესტაველის ორგანიზატორებსაც არ მოუმართავთ ჩვენთვის ოფიციალურად. როგორც ჩანს რეჟისორმა მიწვევა პირადად მიიღო. დროის სიმცირის გამო ვერ მოხერხდა დაფინანსება. განცხადების განსახილველად 2-თვიანი პერიოდი არ არის საჭირო. სწრაფად დაფინანსებადი პროექტებიც არის ხოლმე, თუმცა ამ შემთხვევაში სამინისტროს პროექტი და გაწერილი ხარჯთაღრიცხვა მაინც უნდა მიეღო", _ აღნიშნავენ სამინისტროში.
რეჟისორი ვარაუდობს, რომ, შესაძლოა, კანის კინოფესტივალის ორგანიზატორების წერილის შესახებ კულტურის მინისტრს ინფორმაცია საერთოდ არ ჰქონდა, რადგან მინისტრმა მიხეილ გიორგაძემ აღნიშნულთან დაკავშირებით გუშინ განაცხადა, რომ რეჟოსორს არა კანის კინოფესტივალების ორგანიზატორებისგან, არამედ კერძო საპროდიუსერო კომპანიის მიწვევა ჰქონდა, რაც კონკურსში მონაწილეობას არ ნიშნავს.
"ჩვენ მივიღეთ წერილი, ერთ-ერთი სადისტრიბუციო კომპანიის წარმომადგენლის მხრიდან, სადაც აღნიშნულია, რომ გია კაჭარავას ფილმი კანის კინოფესტივალის მოკლე ფილმების კუთხეში მოხვდა, რაც არ არის კინოფესტივალის საკონკურსო პროგრამა", _ აცხადებს გიორგაძე.
რეჟისორი კაჭარავა კი აცხადებს, რომ ეროვნული კინოცენტრი და კულტურის სამინისტრო გარკვეული რეჟისორების მიმართ დისკრიმინაციას ეწევა. რადგან მას ეროვნულმა კინოცენტრმა ჯერ ამ ფილმის სცენარი დაუწუნა, შემდეგ კი, ფილმის კონკურსზე გასაგზავნადაც არ აღმოუჩინა დაფინანსება.
თუმცა, რეჟისორის ბრალდებებს კატეგორიულად უარყოფენ ეროვნულ კინოცენტრში სადაც კულტურის სამინისტროს მსგავსად აცხადებენ, რომ რეჟისორმა მიწვევა არა კანის კინოფესტივალის ორგანიზატორებისგან, არამედ ერთ-ერთი სადისტრიბუციო კომპანიის აღმასრულებელი დირექტორის მხრიდან მიიღო.
რეჟისორი კი აცხადებს, რომ კულტურის სამინისტროსთან გაშლილ კარავში დარჩენას პრობლემების მოგვარებამდე აპირებს.
რაც შეეხება ეროვნული კინოცენტრს, როგორც "გურია ნიუსს" აცნობეს, ბაზრობაზე კინოცენტრის შეხვედრები, ტრადიციულად, რამდენიმე მიმართულებით გაიმართება.
კერძოდ, კინოცენტრი გეგმავს სხვა ქვეყნების კინოფონდებთან საქმიანი ურთიერთობების დამყარებას, სამომავლო ერთობლივი პროექტების დაგეგმარებას და ქართული პროექტებისათვის ალტერნატიული დაფინანსების წყაროების იდენტიფიცირებას; ევროპულ რეგიონალურ კინოფონდებთან გამოცდილების გაზიარების მიზნით საქმიანი ურთიერთობების გაღრმავებას; ახალი ქართული ფილმების შეთავაზებას სხვადასხვა საერთაშორისო კინოფესტივალებისათვის; წლის განმავლობაში დაგეგმილი სხვადასხვა ღონისძიებების მოსამზადებელი შეხვედრების გამართვას, მათ შორის:
-ანსის ანიმაციური ფილმების ფესტივალზე უკვე შერჩეული ქართული პროექტის წარდგენას.
-ტალინის ბნელი ღამეების ფესტივალზე საქართველო, როგორც ფოკუს ქვეყნა – პროგრამის შედგენას, ღონისძიებების დაგეგმვას.
-სანდენსის საერთაშორისო კინოფესტივალის რეჟისორთა და სცენარისტთა ლაბში მარიამ ხაჭვანის პროექტის "დედე" მონაწილეობას.
-ჩინეთის კინოინდუსტრიის წამომადგენლებთან შეხვედრას.
-ინდოელ პროდიუსერებთან შეხვედრას, რომლებიც საქართველოში გადაღებით არიან დაინტერესებულნი, ასევე ინდოეთის ყველაზე მნიშვნელოვანი კინობაზრობის – Film Bazaar, წარმომადგენლებთან შეხვედრას.
16 მაისს, 16 : 00 საათზე, საქართველოს პავილიონში გაიმართება მიღება (Happy Hour) უცხოელი სტუმრებისთვის საქართველოს და ქართული კინოს პოპულარიზაციის მიზნით.
კანის კინობაზრობაზე სხვადასხვა მიზნით ასევე მიემგზავრებიან ქართველი რეჟისორები და პროდიუსერები: რუსუდან ჭყონია, ვლადიმერ კაჭარავა, თინათინ ყაჯრიშილი, ლაშა ხალვაში.
კანის ფესტივალზე "მსოფლიო პავილიონში” (Cinema du Monde) რუსუდან ჭყონია და ვლადიმერ კაჭარავა მონაწილეობენ პროექტით "ვენეცია".
ყოველწლიური კინოფესტივალი კანში უკვე 68-ედ იმართება და 13-დან 24-მაისამდე გაგრძელდება.
