“თუ ვინმეს არ მოსწონს ქაღალდომანია, შეუძლია, უარი თქვას ხარჯების თანხაზე”

ოზურგეთის მუნიციპალიტეტის საკრებულოს სადეპუტატო უფლებამოსილების გახორციელებასთან დაკავშირებული ხარჯების ანაზღაურება 500 ლარს შეადგენს. ეს იმ შემთხვევაში, თუ დეპუტატები საკრებულოს და კომისიების სხდომას, ამომრჩეველთან და ფრაქციის შეხვედრას დაესწრებიან.

"გურია ნიუსი" დაინტერესდა, 2014 წლის ოქტომბრიდან დღემდე, რომელმა დეპუტატმა მიიღო საკრებულოს წევრის მოვალეობების შესრულებასთან დაკავშირებული ხარჯის თანხა 500 ლარზე ნაკლები.

2014 წლის ოქტომბერი: ვლადიმერ ვადაჭკორია _ 200 ლარი; პაატა მანჯგალაძე _ 350 ლარი; შალვა დოლიძე _ 150 ლარი; პაატა კიღურაძე _ 450 ლარი; დავით სიხარულიძე _ 400 ლარი; ტიტე მგელაძე _ 350 ლარი; დავით მჟავანაძე _ 450 ლარი; 2014 წლის ნოემბერი; პაატა მანჯგალაძე _ 350 ლარი; ნიკა დობორჯგინიძე _ 400 ლარი; ირაკლი ჩხაიძე _ 450 ლარი; ხვიჩა წულაძე _ 450 ლარი; ტიტე მგელაძე _ 450 ლარი.

2014 წლის დეკემბერი: პაატა მანჯგალაძე _ 350 ლარი; ბიძინა გობრონიძე _ 450 ლარი; დავით სიხარულიძე _ 400 ლარი; ტიტე მგელაძე _ 450 ლარი.

2015 წლის იანვარი: ინგა დუმბაძე _ 450 ლარი; პაატა მანჯგალაძე _ 450 ლარი; ბიძინა ინაიშვილი _ 450 ლარი; ვახტანგ ნიჟარაძე _ 450 ლარი; დავით სიხარულიძე _ 450 ლარი; ტიტე მგელაძე _ 450 ლარი;

თებერვალი: პაატა მანჯგალაძე _ 450 ლარი; დავით სიხარულიძე _ 400.

მარტი: პაატა მანჯგალაძე _ 450 ლარი; ნიკა დობორჯგინიძე _ 450 ლარი.

ეს ინფორმაცია "გურია ნიუსს" ოზურგეთის მუნიციპალიტეტის საკრებულომ მიაწოდა.

"ერთიანი ნაციონალური მოძრაობის" დეპუტატ პაატა მანჯგალაძეს, 500 ლარი ჯერ არ მიუღია.

პაატა მანჯგალაძე: _ ჩემთვის ოზურგეთის მუნიციპალიტეტის საკრებულოს დეპუტატობა არის დიდი პატივი. მინდა გითხრათ, რომ განსაკუთრებული დამოკიდებულება მაქვს ოზურგეთთან. მიმაჩნია, რომ ფორმა, რომელიც თვითმმართველობის არჩევნების შემდეგ დამკვიდრდა, არასწორია. ადამიანმა ამომრჩეველთან შეხვედრაში, საკრებულოს სხდომაზე დასწრებაში, უფლებამოსილების გახორციელებაში ფული აიღოს, ეს არ მიმაჩნია სწორად. ეს არის ერთგვარი ფურცელომანიაა, როცა მიდიხარ და დგება ოქმები. ჩემზე  დაკისრებულ უფლებამოსილებას, რა თქმა უნდა, ვასრულებ, მაგრამ ამ ფურცლების და საბუთების გარეშე.

_  კონკრეტულად როგორ ასრულებთ თქვენს უფლებამოსილებას?

_ ვხვდები ახალგაზრდებს, სოფლის წარმომადგენლებს. უბრალოდ, ამ შეხვედრის დოკუმენტალირება და გაფორმება არ ხდება იმ ფორმით, როგორც  საკრებულო ითხოვს.

_ ახალგაზრდები ახსენეთ… ეს შეხვედრები არასამთავრობო ორგანიზაციის სახელით ხომ არ ხდება?

_ არა, ამ შეხვედრებს არასამთავრობო ორგანიზაციასთან არანაირი შეხება არ აქვს. ყველა შეხვედრას თავისი სახელი ჰქვია.

_ თქვენ თქვით, რომ მოსახლეობას ხვდებით. რა საკითხებზე მსჯელობთ?

_ უფრო მეტად მათ აწუხებთ სოციალური საკითხები. ასევე, ვსაუბრობთ ყველა იმ პრობლემაზე, რაც ამ ბოლო პერიოდში არის მუნიციპალიტეტში. მოსახლეობა დროულად ითხოვს ლაითურში ჩანგრეული ხიდის აღდგენას და ა .შ. 

ოზურგეთის მუნიციპალიტეტის საკრებულოს თავმჯდომარის მოადგილე დიმიტრი კვერღელიძე ამბობს, რომ ვისაც არ მოსწონს ქაღალდომანია, შეუძლია უარი თქვას ხარჯების თანხის აღებაზე:

_ თვითონ ქარტია ითვალისწინებს, რომ დეპუტატმა თავისი უფლებამოსილება განახორციელოს იდეაში უსასყიდლოდ, მაგრამ შეიძლება, ანაზღაურებული იქნას _ ესეც ქარტიაში დევს. ჩვენ ყველა კანონის დაცვით გავაკეთეთ, რომ ანაზღაურებადი ყოფილიყო დეპუტატის საქმიანობა. ახლა, რაც შეეხება ზოგიერთების პრეტენზიას, რომ ეს ქაღალდომანიაა _ ეს არის ხარჯი და არა ხელფასი. ჩვენ რეგლამენტში ჩავწერეთ, რა არის დეპუტატის საქმიანობა: პირველი და აუცილებელი _ მოვიდნენ სხდომებზე, მიიღონ მონაწილეობა კომისიის სხდომებში, შეხვდნენ თავიანთ ამომრჩევლებს თვეში ერთხელ მაინც და მიიღონ მონაწილეობა ფრაქციების სხდომებში. დეპუტატს, ასევე, შეუძლია, რამდენჯერმე შეხვდეს ამომრჩეველს, ამას არავინ უკრძალავს. თუ ვინმეს არ მოსწონს ქაღალდომანია, შეუძლია, უარი თქვას ხარჯების თანხის აღებაზე და თავისი უფლებამოსილება განახორციელოს ანაზღაურების გარეშე, _ გვითხრა დიმიტრი კვერღელიძემ.