საქართველოსადმი ნდობის დადასტურება, _ ასე შეაფასა საქართველოს პრემიერ-მინისტრმა ირაკლი ღარიბაშვილმა მსოფლიოში ცნობილი ბრენდის "ჰილტონის" ხუთვარსკვლავიანი სასტუმროს გახსნა ბათუმში, რისთვისაც ინვესტორებს მადლობა გადაუხადა.
"ეს არის ნათელი დადასტურება იმისა, რომ ბათუმი არის ძალიან დიდი პოტენციალის მქონე ქალაქი და აქვს ყველა რესურსი იმისა, გახდეს ჩვენი ქვეყნის სავიზიტო ბარათი. ბათუმში წელს კიდევ რამდენიმე ხუთვარსკვლავიანი სასტუმროს გახსნა იგეგმება და ეს არის მნიშვნელოვანი რეგიონის განვითარებისთვის. აჭარა მდიდარია ასეთი მნიშვნელოვანი პროექტების წარმატებით განხორციელებისთვის საჭირო რესურსებით", _ აღნიშნა პრემიერ-მინისტრმა და დასძინა, რომ ბათუმში სასტუმრო "ჰილტონის" მშენებლობის პროექტი წლების განმავლობაში გაჩერებული იყო და მასზე აქტიური მუშაობა სწორედ ახალი ხელისუფლების მოსვლის შემდეგ დაიწყო.
"ეს არის ძალიან მნიშვნელოვანი შენაძენი, მნიშვნელოვანი, 130 მილიონ დოლარიანი პროექტი, რომელიც წარმატებით დასრულდა. დღეს სადაო გახადეს, თუ ვის დროს დაიწყო ეს პროექტი და სასტუმრო ვის დროს გაიხსნა. ამას მნიშვნელობა არ აქვს. მთავარია, რომ გაიხსნა და ყველას გილოცავთ, თუმცა ობიექტურობა მოითხოვს აღინიშნოს, რომ ეს პროექტი წლების განმავლობაში შეჩერებული იყო – უნდა დაწყებულიყო 2008 წელს. შემდეგ 4 წლის განმავლობაში გაჩერდა და აქტიური სამუშაოები დაიწყო მას მერე, რაც ახალი ხელისუფლება მოვიდა, ვინაიდან რაღაც პრობლემები იყო მოსაგვარებელი", _ განაცხადა ღარიბაშვილმა.
