ოზურგეთის მუნიციპალიტეტის სოფელ შრომაში მცხოვრები ლალი მექოშვილი ადგილობრივი ხელისუფლებისგან დახმარებას ითხოვს.
_ სოფელ შრომაში არის მდინარე სეფა, რომელიც ყოველ ადიდებაზე პრობლემას გვიქმნის, დაახლოებით, 30 ოჯახს. მე, პირადად, სამი წელიწადია, მძიმე მდგომარეობაში ვარ. მეუღლე არ მყავს _ მაგ პრობლემების ჯავრს გადაჰყვა. მდინარე ისე დიდდება, რომ მოუახლოვდა ეზოს და საცხოვრებელ სახლს. ვინ მოთვლის, რამდენჯერმე ვიყავით ამ ხნის მანძილზე ადგილობრივ ხელისუფლებასთან. თითქმის, გადაწყვეტილი იყო ეს საკითხი, მაგრამ ბოლოს გვითხრეს, ძვირი ჯდება ამ პრობლემის მოგვარება, აქ არ იცხოვრება და სხვაგან უნდა გადასახლდეთო. თბილისიდანაც იყვნენ ჩამოსულები. გადის ეს დღეები და პრობლემა კვლავ პრობლემად რჩება. 2015 წელს აღარ მივსულვარ ადგილობრივ ხელისუფლებასთან, რადგან ორჯერ ავად ვიყავი. ახლა რომ ადიდდეს მდინარე, არ ვიცი, რა დაემართება ჩემს სახლს. ერთხელ და სამუდამოდ ხომ უნდა მოგვარდეს ეს პრობლემა, რომლის წინაშე 30 ოჯახი დგას?! _ გვითხრა ლალი მექოშვილმა.
ოზურგეთის მუნიციპალიტეტის გამგებლის მოადგილე გიორგი ღურჯუმელიძე ამბობს, რომ შრომის თემში მცხოვრები მექოშვილის ოჯახს მდინარე სეფა, მრავალი წელია, მათაც პრობლემებს უქმნის:
_ მუნიციპალიტეტის გამგეობის შესაბამისი სამსახურის თანამშრომლებმა, მოწვეულ კვალიფიციურ სპეციალისტებთან ერთად, აღნიშნული საკითხი ჯერ კიდევ 2013 წელს შეისწავლეს და შუამდგომლობით მიმართეს ინფრასტრუქტურის სამინისტროს პრევენციული ღონისძიებების გატარების თხოვნით. ოჯახი საცხოვრებელი სახლის გარშემო დამცავი ჯებირის ჩასხმას მოითხოვს, რაც დიდ თანხებთანაა დაკავშირებული _ საუბარია, დაახლოებით, ნახევარ მილიონ ლარზე. მუნიციპალიტეტის გამგეობა მექოშვილების ოჯახს სთავაზობდა ალტერნატივას _ საკარმიდამო ეზოს მიმდებარე ტერიტორიის გასწორხაზოვნებას, რაც უხვი ნალექისა და მეწყერული პროცესების შემთხვევაში, დაზიანების რისკს შეამცირებდა, თუმცა, მექოშვილებმა ფულადი ანაზღაურება მოითხოვეს, რის შემდეგაც საცხოვრებელი ადგილის შეცვლას შეძლებდნენ. ბოლო პერიოდში, ახალი მუნიციპალიტეტის ფორმირების შემდეგ, მექოშვილებს მუნიციპალიტეტისთვის განცხადებით არ მოუმართავთ, _ თქვა ჩვენთან საუბრისას გიორგი ღურჯუმელიძემ.
