გამგებლის ბრძანებაში მოადგილის გათავისუფლების მოტივი არ ჩანს

ლანჩხუთის მუნიციპალიტეტის გამგებელმა ზაზა ურუშაძემ თავისი პირველი მოადგილე ვახტანგ ზენაიშვილი საკუთარი ბრძანებით გაათავისუფლა, მაგრამ ბრძანებაში არაა მითითებული გათავისუფლების მოტივი. კერძოდ, წერია, რომ საქართველოს ორგანული კანონის "ადგილობრივი თვითმმართველობის კოდექსის" 54-ე მუხლის პირველი პუნქტის "ა.გ." ქვეპუნქტის,  57-ე მუხლის პირველი პუნქტისა და 61-ე მუხლის მე-3 პუნქტის "ა" ქვეპუნქტის შესაბამისად გათავისუფლდეს თანამდებობიდან გამგებლის პირველი მოადგილე ვახტანგ ზენაიშვილი 2015 წლის 21 მაისიდან.

"ადგილობრივი თვითმმართველობის კოდექსის" ზემოაღნიშნულ მუხლებში აღნიშნულია:

მუხლი 54. გამგებლის/მერის უფლებამოსილება

 1. გამგებელი/მერი:

ა. გ) თანამდებობაზე ნიშნავს და თანამდებობიდან ათავისუფლებს გამგეობის/მერიის თანამდებობის პირებს;

მუხლი 57. გამგებლის/მერის პირველი მოადგილე და მოადგილე (მოადგილეები)

1. გამგებელს/მერს ჰყავს პირველი მოადგილე და მოადგილე (მოადგილეები), რომელთაც თანამდებობაზე ნიშნავს და თანამდებობიდან ათავისუფლებს გამგებელი/მერი.

 მუხლი 61. მუნიციპალიტეტის ორგანოებისა და თანამდებობის პირების ადმინისტრაციულ–სამართლებრივი აქტები

3. მუნიციპალიტეტის თანამდებობის პირების ინდივიდუალური ადმინისტრაციულ-სამართლებრივი აქტებია:

 ა) გამგებლის/მერის ბრძანება;

ერთი შეხედვითაც ცხადია, რომ ჩამოთვლილ მუხლებში მხოლოდ გამგებლის უფლება-მოვალეობებზეა საუბარი და არა გათავისუფლების მოტივზე.

ზაზა ურუშაძის ბრძანების საფუძვლიანობის შესახებ კომენტარი ვთხოვეთ ექსპერტს ადგილობრივი თვითმმართველობის საკითხებში ლევან ხინთიბიძეს, რომლის თქმითაც, ბრძანებაში აუცილებლად უნდა იყოს მითითებული გათავისუფლების საფუძველი:

"თუ ბრძანებაში მითითებული არ არის, რა უდევს საფუძვლად პირის თანამდებობიდან გათავისუფლებას, მაშინ აღნიშნულ პიროვნებას შეუძლია მიმართოს სასამართლოს და მას პროცესის მოგების ძალიან დიდი შანსი აქვს," _ გვითხრა ლევან ხინთიბიძემ.

იგივეს ამბობს იურისტი ირაკლი პაპავაც: "ბრძანებაში, რომელიც ზენაიშვილს ჩაბარდა, მხოლოდ გამგებლის უფლებებზეა საუბარი და მასში არ ჩანს გათავისუფლების მოტივი, რაც ეჭვქვეშ აყენებს  ბრძანების ლეგიტიმურობას".