გელ ბურია! – ასე ეხმიანებიან ქართველები და რეპატრიანტი მესხები სოფელ ნასაკირალში ერთმანეთს.
დაბა ნასაკირალის პირველ რაიონში, როგორც ადგილობრივი მკვიდრები ამბობენ, ათამდე ოჯახი ცხოვრობს. ხოლო ნასაკირალიდან დაახლოებით 6 კილომეტრში ე.წ. კუნძულზე, უფრო მეტი – 20 – მდე რეპატრიანტი ოჯახი.
რეპატრიანტი მესხების უმრავლესობა კარგად ფლობს ქართულ ენას,- "ბაღნები ქართულ სკოლაში დაიარებიან", _ გვეუბნება ჯამილა იორდანიძე.
ნასაკირალში ქართველებთან 30-წლიან ურთიერთთანაცხოვრებას, მეზობლობას კარგად იგონებს საბილა ბექაძე.
"რამდენი წელია აქ ვცხოვრობთ, მაგრამ ერთი ცუდიც არ მახსენდება", _ ამბობს ბექაძე.
რეპატრიანტი ოჯახების უმრავლესობა ახალციხიდანაა, 1940-იან წლებში სხვადასხვა ქვეყნებში გადაასახლეს – უზბეკეთში, რუსეთში, აზერბაიჯანში, 1980- იან წლებში კი ისევ საქართველოს დაუბრუნდნენ.
მორიგი შეხვედრა ოზურგეთში, ნასაკირალის უბნის პირველ რაიონში შედგა. ფონდი "სოხუმის" წარმომადგენელი სოფლის მოსახლეობას – ქართველებს და ეთნიკური უმცირესობის წარმომადგენლებს (რეპატრიანტ მესხებს) შეხვდა და მათ პრობლემებს გაეცნო.
45 წლის ნაილი ბიწაძე, რომელიც ლოგინად მყოფ 87 წლის პაშა ბიწაძეს უვლის, ოჯახთან ერთად ავარიულ შენობაში ცხოვრობს – დანგრეულია შენობის კიბეები და დერეფნის ფანჯრები, ჩამონგრეულია ჭერიც.
ის აღნიშნავს, რომ სახელმწიფომ სოციალური დახმარება შეუწყვიტა და არც პენსია დაუნიშნეს. პრობლემის მოგვარებაში ხელისუფლების დახმარებას ითხოვს.
რეპატრიანტი მესხები აღნიშნავენ, რომ სოფელში ბევრი პრობლემაა – უმუშევრობა ერთ-ერთია.
"მამაკაცები სეზონურად დადიან თურქეთში სამუშაოდ, ხოლო ქალები ოჯახში ვართ, ვდიასახლისობთ – ქათამი, ძროხა, ბოსტანი…", _ ამბობენ ისინი.
რეპატრიანტი მესხები წეს-ჩვეულებებს მკაცრად იცავენ და ამბობენ, რომ მესხი გოგონა აუცილებლად მისივე რწმენის ბიჭზე უნდა დაქორწინდეს, ხოლო ქართველი, ანუ, ქრისტიანი სარძლოს შერთვა მისაღებია!
გაღმა დვაბზუში მცხოვრები თამარ ცაცანიძე ამბობე, რომ ქალები თავზე მხოლოდ გათხოვების შემდეგ იხურავენ თავშალს.
კითხვაზე, რომ შეუყვარდეს ქრისტიანი გაყვება თუ არა ცოლად, მუსლიმი გოგონა გვპაუსხობს: "რა ვიცი, ალბათ უფრო არა!"
აღსანიშნავია, რომ გოგონები ძირითადად 18 წლის შემდეგ თხოვდებიან. აუცილებელი პირობაა, რომ თავისი სარწმუნოების მამაკაცზე უნდა დაქორწინდეს.
ნასაკირალის პირველ რაიონში მხოლოდ ერთი ბაგა-ბაღია, სადაც ორი ჯგუფი ფუნქციონირებს. მოსახლეობა აღნიშნავს, რომ სოფელში მხოლოდ ერთი სკოლაა, რომელიც მათგან მოშორებითაა, ამიტომ სკოლაში ბავშვებს სახელმწიფოს მიერ გამოყოფილი ტრანსპორტით უწევს გადაადგილება, ახლო სოფლის – დვაბზუს სკოლამდე, შემდეგ ფეხით მიდიან.
დაბა ნასაკირალის მაჟორიტარი დეპუტატის შოთა ართმელაძის განცხადებით, ნასაკირალის პირველ რაიონში სკოლის გახსნის აუცილებლობა არ არის.
"სოფელში სულ 35-40 ოჯახი ცხოვრობს. სოფელს აქვს 1 სკოლა. ნასაკირალის ბავშვები იმიტომ დადიან დვაბზუს სკოლაში რომ ტერიტორიულად უფრო ახლოა. ვფიქრობ ნასაკირალის პირველ რაიონში სკოლის გახსნის აუცილეობლობა არ არის ბავშვთა მცირე კონტინგენტის გამო", _ უთხრა "გურია ნიუსს" ართმელიძემ.
