23-26 მაისს საქართველოს საგარეო საქმეთა სამინისტრო „დიპლომატიურ ტურს" უმასპინძლებს, რომელშიც მონაწილეობას მიიღებენ საქართველოში აკრედიტებული რეზიდენტი და არარეზიდენტი ელჩები.
მიმდინარე წელს „დიპლომატიური ტური" აჭარის რეგიონს დაეთმობა. დიპლომატები, მოინახულებენ საოკუპაციო ხაზს.
ღონისძიების ფარგლებში წელს საქართველოს 22 არარეზიდენტი ელჩი ეწვევა, შემდეგი ქვეყნებიდან: ეგვიპტე, მოლდოვა, კუბა, ინდონეზია, ბელგია, განა, ვიეტნამი, ავსტრალია, ქუვეითი, ახალი ზელანდია, პაკისტანი, პერუ, სამხრეთ აფრიკა, ურუგვაი, ავსტრია, საუდის არაბეთი, იორდანია, კვიპროსი, ეთიოპია, ესპანეთი, კონგო, კოდ დიუარი, კანადა და მონღოლეთი. არარეზიდენტ ელჩებს საშუალება ექნებათ უკეთ გაიცნონ საქართველო, მისი ერთ-ერთი თვალწარმტაცი რეგიონი, ასევე იხილონ საოკუპაციო ხაზი და ადგილზე გაეცნონ იქ შექმნილ რთულ ჰუმანიტარულ ვითარებას.
„დიპლომატიური ტური-2015" დღეს თბილისის საკრებულოს შენობაში გაიხსნება, სადაც 20.00 საათზე გაიმართება სადღესასწაულო მიღება ტურის მონაწილეებისათვის. მოწვეულ სტუმრებს საქართველოს საგარეო საქმეთა მინისტრი და დიპლომატიური კორპუსის დუაიენი მიმართავენ.
24 მაისს დიპლომატები გაემგზავრებიან საოკუპაციო ხაზზე და მოინახულებენ სოფელ ხურვალეთს. შემდგომ გორის რკინიგზის სადგურიდან ტურის მონაწილეები მატარებლით ბათუმში გაემგზავრებიან. უცხოელი სტუმრები მოინახულებენ აჭარის რეგიონის ისტორიულ და ინფრასტრუქტურულ ნაწილს.
24 მაისს გაიმართება „ბათუმის კონფერენცია" აჭარის ავტონომიური რესპუბლიკის მთავრობის, საქართველოს ეკონომიკური და მდგრადი განვითარების სამინისტროს, საქართველოს კულტურისა და ძეგლთა დაცვის სამინისტროს, ასევე ტურიზმის ეროვნული ადმინისტრაციის ორგანიზებით. უცხოელ დიპლომატებს აჭარის ავტონომიური რესპუბლიკის მთავრობის თავმჯდომარე მიესალმება, რის შემდეგაც საქართველოს ეკონომიკური, აგრარული და ტურისტული პოტენციალის შესახებ შესაბამისი უწყებები პრეზენტაციებს წარმოადგენენ. ღონისძიების მონაწილეებისათვის გაიმართება პრეზენტაცია თბილისში მიმდინარე ევროპის ოლიმპიური ფესტივალი 2015-ის შესახებ.
კონფერენციის დასრულების შემდგომ დიპლომატები მოინახულებენ სარფის საბაჟო გამშვებ პუნქტს და გაეცნობიან მის ფუნქციონირებას.
ბათუმში სტუმრობის ფარგლებში დიპლომატები გაეცნობიან აჭარის კულტურულ და ისტორიულ ღირშესანიშნაობებს. მოინახულებენ გონიოს ციხეს, პიაცას მოედანს, ბათუმის ბოტანიკურ ბაღს.
„დიპლომატიური ტური-2015"-ის მონაწილეები იმგზავრებენ საქართველოს რკინიგზით, რაც მათ საშუალებას მისცემთ უკეთ გაეცნონ საქართველოს სარკინიგზო ინფრასტრუქტურას.
„დიპლომატიურ ტურს" საქართველოს საგარეო საქმეთა სამინისტრო უკვე მეოთხედ უწევს ორგანიზებას. პირველად იგი 2013 წელს ჩატარდა და მას შემდეგ ერთგვარ ტრადიციად იქვა. ღონისძიების მიზანია საქართველოში აკრედიტებულ დიპლომატებს უკეთ გავაცნოთ საქართველოს სხვადასხვა რეგიონები და მათი კულტურული მახასიათებლები, ისტორია, ტრადიციები; ასევე მივაწოდოთ ინფორმაცია და გავაცნოთ ქვეყანაში განხორციელებული პროგრესი, რეფორმები და მიღწევები.
„დიპლომატიური ტურის" თანაორგანიზატორები არიან საქართველოს ტურიზმის ეროვნული ადმინისტრაცია, აჭარის ავტონომიური რესპუბლიკის მთავრობა და საქართველოს რკინიგზა.
