FactCheck.ge პოლიტიკოსების განცხადებებში ფაქტობრივი სიზუსტის დადგენის ყოველკვირეულ მიმოხილვას აქვეყნებს. 19-დან 25 მაისამდე ფაქტ-მეტრმა სხვადასხვა გადამოწმებულ ფაქტზე რამდენიმე კვლევა მოამზადა.
ერთ-ერთი ყველაზე პოპულარული სტატია იუსტიციის მინისტრის, თეა წულუკიანის განცხადებას ეხებოდა. მისი შეფასებით, არცერთი დასკვნით, სავიზო რეგულაციებს ეკონომიკასა და ტურიზმზე უარყოფითად არ უმოქმედია. იუსტიციის მინისტრმა ასევე აღნიშნა, რომ გიორგი კვირიკაშვილს ეკონომიკური რისკებიდან გამომდინარე უფრო მეტად ლიბერალური კანონპროექტის შემუშავება სურდა, თუმცა მთავრობამ არჩევანი რეგულაციების სასარგებლოდ გააკეთა. თეა წულუკიანმა ასევე ხაზი გაუსვა იმას, რომ სავიზო რეგულაციებს ევროკავშირი ითხოვდა.
სავიზო რეგულაციების ძალაში შესვლის შემდეგ, იმ ქვეყნებიდან, რომელთანაც სავიზო რეჟიმი დაწესდა, ვიზიტორთა ნაკადი შემცირდა. თუმცა, აქვე უნდა აღინიშნოს, რომ ასევე შემცირდა ვიზიტორთა შემოსვლა იმ ქვეყნებიდან, რომლებთანაც უვიზო რეჟიმი შენარჩუნდა.
ახალმა რეგულაციებმა უარყოფითად იმოქმედა ქვეყნის საინვესტიციო პოტენციალზე. ამას ადასტურებს როგორც მინისტრთა კაბინეტის წევრების, ისე სხვადასხვა ექსპერტებისა და კვლევების შეფასებები. უკანასკნელ პერიოდში გაუარესებული ეკონომიკური მდგომარეობის გამო, საქართველოს პარლამენტმა იუსტიციის სამინისტროს მიერ შემუშავებულ კანონპროექტში ცვლილება ორჯერ შეიტანა. აღსანიშნავია, რომ ეკონომიკის სამინისტროს კანონპროექტის ამოქმედების შემდეგ მოსალოდნელი უარყოფითი ეკონომიკური შედეგების შესახებ შენიშვნები ჰქონდა, რომლებიც თეა წულუკიანმა არ გაითვალისწინა.
როგორც ევროკავშირთან ვიზა-ლიბერალიზაციის სამოქმედო გეგმის ანალიზიდან ირკვევა, საიმიგრაციო პოლიტიკის ამ ფორმით გამკაცრება, სხვადასხვა ქვეყნებთან უვიზო რეჟიმის გაუქმება, შემცირებული ვადების ან ვიზის აღების წესების ცვლილება, ევროკავშირის მოთხოვნას არ წარმოადგენდა. სამოქმედო გეგმის თანახმად, მნიშვნელოვანი ერთიანი პოლიტიკის შემუშავება და არალეგალურ მიგრაციასთან ბრძოლა იყო და არა რეგულაციების კონკრეტულად ამ ფორმით მიღება.
ამ ფაქტორების გათვალისწინებით, ფაქტ-მეტრმა დაასკვნა, რომ თეა წულუკიანის განცხადება მცდარია.
გასულ კვირას ფაქტ-მეტრმა თავდაცვის მინისტრის, თინა ხიდაშელის განცხადებაც გადაამოწმა. ხიდაშელის თქმით, თავდაცვის სამინისტროს ბიუჯეტის ერთ-ერთი მთავარი პრობლემა ე.წ. სოციალური ხარჯებია. მთლიანი ბიუჯეტის დაახლოებით 80% სწორედ სოციალურ ხარჯებს მოიცავს და სახელფასო ფონდებზე იხარჯება.
კვლევის შედეგად ფაქტ-მეტრმა დაადგინა, რომ თავდაცვის სამინისტროს 2015 წელს 640 მლნ ლარი გამოეყო. სამინისტრომ 614 მლნ ლარის ხარჯები 5 პრიორიტეტულ მიმართულებაზე გაანაწილა, საიდანაც 65% შრომის ანაზღაურებისთვისაა გათვალისწინებული. შესაბამისად, ხარჯების დიდი ნაწილი მართლაც სახელფასო ფონდზეა გაწერილი, როგორც ამას მინისტრი ამბობს, თუმცა სახელფასო ფონდზე გამოყოფილი თანხა, ნაცვლად თინა ხიდაშელის მიერ დასახელებული 80%-ისა, 65%-ს შეადგენს. 2013 წელს ეს მაჩვენებელი 60% იყო, ხოლო 2014 წელს – 67%.
ფაქტ-მეტრმა თინა ხიდაშელის განცხადება მეტწილას სიმართლედ შეაფასა.
ფაქტ-მეტრის მიერ გადამოწმებული კიდევ ერთი ფაქტი საპარლამენტო უმრავლესობის წევრის, სოსო ვახტანგაშვილის განცხადებას ეხებოდა. ვახტანგაშვილის თქმით, „ათზე მეტმა პატიმარმა ვადაზე ადრე გათავისუფლებაზე უარი იმ მოტივით განაცხადა, რომ სასჯელაღსრულების დაწესებულებებში C ჰეპატიტზე მკურნალობა უფასოა“.
საქართველოს სასჯელაღსრულების და პრობაციის სამინისტროს ინფორმაციით, 2014-2015 წლებში პირობით ვადამდე გათავისუფლებაზე უარი თავისუფლების აღკვეთის დაწესებულებებში მყოფმა დაახლოებით 338 მსჯავრდებულემა განაცხადა. ისინი სხვადასხვა დაავადებებზე მკურნალობდნენ. ამ მსჯავრდებულთა უმრავლესობა სწორედ ვირუსული C ჰეპატიტის დიაგნოსტიკისა და მკურნალობის პროგრამაში იყო ჩართული.
პატიმრების სხვა მოტივაციის დადგენა (გარდა C ჰეპატიტის უფასო მკურნალობის), თუ რატომ განაცხადეს უარი ვადაზე ადრე გათავისუფლებაზე, რთულია. ფაქტია, რომ პატიმართა დიდი ნაწილი სწორედ ამ მოტივით დარჩა სასჯელაღსრულების დაწესებულებებში.
შესაბამისად, სოსო ვახტანაგაშვილის განცხადება სიმართლეა.
ფაქტ-მეტრმა საპარლამენტო უმრავლესობის კიდევ ერთი წევრის, გიგა ბუკიას განცხადებაც გადაამოწმა. ბუკიას თქმით, 2015 წლის მარტში საქართველოს ეკონომიკის ზრდის ტემპი 4.3% იყო, ხოლო ამავე წლის პირველი კვარტალის მონაცემმა 3.2% შეადგინა, რაც ყველაზე ძლიერი ეკონომიკური ზრდაა არა მარტო რეგიონში, არამედ, ფაქტიურად, მსოფლიოში.
დსთ-ის სივრცეში შემავალი ქვეყნებიდან, 2015 წლის პირველ კვარტალში ეკონომიკური ზრდით საქართველოზე წინ დგანან ყირგიზეთი, ტაჯიკეთი, აზერბაიჯანი და სომხეთი. რაც შეეხება ევროპის განვითარებად ქვეყნებს, მშპ-ის ზრდის პროგნოზით, პირველ კვარტალში საქართველოზე მაღალი ეკონომიკის ზრდის ტემპი მაკედონიას, ალბანეთს, უნგრეთს და რუმინეთს აქვთ.
შესაბამისად, გიგა ბუკიას განცხადება იმის შესახებ, რომ 2015 წლის პირველ კვარტალში, რეგიონსა და მსოფლიოში საქართველოს ყველაზე მაღალი ეკონომიკური ზრდა აქვს, მცდარია.
ცნობისთვის, FactCheck.ge მიზნად ისახავს საზოგადოებისათვის საინტერესო საკითხებზე პოლიტიკოსთა მიერ გაკეთებულ განცხადებებში ფაქტობრივი სიზუსტის, თუ უზუსტობების დადგენას. ფაქტ-მეტრის მიერ ფაქტის სიზუსტის შეფასების გრადაციებია: სიმართლე, მეტწილად სიმართლე, ნახევრად სიმართლე, მეტწილად მცდარი, მცდარი, ტყუილი.
