ახლახან, ოზურგეთში, “მრგვალი მაგიდის” ფორმატის ფარგლებში, “ახალგაზრდა იურისტთა ასოციაციის” ოზურგეთის ოფისის ხელმძღვანელი თამაზ ტრაპაიძე საზოგადოების წარმომადგენლებს შეხვდა. შეხვედრაზე ისაუბრეს რადიაციული საფრთხის არსებობის შესახებ დაბა ანასეულის ტერიტორიაზე.
ამის შემდეგ, ქალაქ ოზურგეთის მერმა ბეგლარ სიორიძემ საქართველოს გარემოს დაცვისა და ბუნებრივი რესურსების სამინისტროს რადიაციული უსაფრთხოების დეპარტამენტს მიმართა. აღნიშნული დეპარტამენტი სინსპექტირების და რეაგირების სამმართველოს უფროსი ჯუმბერ მამასახლისი და მთავარი სპეციალისტი გიორგი მასპინძელაშვილი ოზურგეთს ესტუმრნენ და დაბა ანასეულის ტერიტორიაზე, ჟურნალისტების თანდასწრებით, სპეციალური ხელსაწყოს მეშვეობით შეამოწმეს რადიაციული ფონი.
ჯანმრთელობისთვის ზიანის მომტანი რადიაციული ფონის დონე, მათი განმარტებით, არის 500 მილიზივერტი. ანასეულში აპარატურა 0,03 ზივერტს აფიქსირებს, ბეტონის საფართან კი, სადაც დაბინძურებული ნიადაგია განთავსებული და მავთულხლართითაა შემოღობილი, ეს ფონი 1,0 მილიზივერტს შეადგენს, რაც იმის დასტურია, რომ ფონი აბსოლუტურად უსაფრთხოა.
_ მოსახლეობამ უნდა იცოდეს სრული სიმართლე, რათა მერე არ გაუჩნდეს შიში და უსაფუძვლო პანიკამ არ მოიცვას. აქ ნამდვილად არსებობდა 25 წერტილოვანი ლაქა და სამი წერტილოვანი წყარო. ლაქების მომცველი მიწა მოიჭრა, აქვე ბეტონის საფარში განთავსდა და მავთულხლართით შემოიღობა. სამი წყარო კი მაშინვე გავიტანეთ აქედან. ეს არის დაპაუზებული პრობლემა, მაგრამ არა ჩვენს მიერ. ყველა ობიექტს ჰყავს პატრონი. ანასეულის ჩაისა და სუბტროპიკული მეურნეობის ინსტიტუტი გადაეცა აგრარულ უნივერსიტეტს. ვიდრე გარდაბნის რაიონში, სოფელ სააკაძესთან შვიდ კილომეტრში მშენებარე ნარჩენების სამარხს ოფიციალურ სტატუსს არ მიანიჭებენ, გადატანა არ მოხდება. მერე კი აღნიშნული მიწა იქ განთავსდება, _ თქვა ჯუმბერ მამასახლისმა.
მან ასევე ისაუბრა ამერიკის ენერგეტიკის დეპარტამენტის პროექტის ფარგლებში, ამერიკელთა დახმარებაზე, რომლებმაც 2013 წელს, აუცილებელი აპარატურითა და 30-კაციანი პროფესიონალთა ჯგუფის მეშვეობით შეისწავლეს ანასეულის აღნიშნული ტერიტორია: “სწორედ მაშინ დაადგინეს აქ, ნიადაგის 25 წერტილზე არსებული რადიაციული ლაქები. აღსანიშნავია, რომ მავთულხლართით შემოღობილ ბეტონის საფარს, რომელშიც ჩაიყარა დაბინძურებული მიწა, მაშინ სპეციალური ამკრძალავი ნიშანიც გაუკეთდა, თუმცა, მოსახლეობის წარმომადგენლებმა შემდეგ ის მოიპარეს და ჯართში ჩააბარეს. უფრო მეტიც, ადგილზე მისულთ უცნაური სურათი დაგვხვდა _ ვიღაცას სახელდახელოდ გაკეთებული ხის პრიმიტიული კიბე შეუჭედვს და მავთულხლართის ბოძზე მიუყუდებია! ეტყობა, შემოღობილში გადაძვრა, მაგრამ რას ეძებდა იქ, ვერავინ მიხვდა!”
“გურია ნიუსის” კითხვაზე, თუ როდის მოხდება ანასეულიდან დაბინძურებული ნიადაგის გატანა სპეციალურ სამარხში, ჯუმბერ მამასახლისმა განმარტა, რომ გარდაბნის მუნიციპალიტეტში ახლა ხდება იმ სამარხის აღდგენა და თითქმის თავიდან აშენება. სამუშაოები მიზანმიმართულად და უსაფრთხოების სრული დაცვით სრულდება:
_ ზუსტ დროს, თუ როდის დასრულდება ეს სამუშაო, ვერ გეტყვით, დაახლოებით, ორი-სამი წელი მაინც დასჭირდება სრულ მზადყოფნას. მანამდე კი ის შემიძლია გითხრათ, რომ ანასეულის ტერიტორიაზე, როგორც თავად ნახეთ, რადიაციული საფრთხე არ არსებობს. მიუხედავად ამისა, ჩვენ ვალდებული ვართ, აბსოლუტური სიმართლე ვუთხრათ მოსახლეობას, იცოდნენ, რაშია საქმე, რა იყო აქ, რა მოხდა და როგორ ვზრუნავთ საფრთხის თავიდან ასაცილებლად. ამიტომ თავიდან ავიცილებთ ყველანაირ უსაფუძვლო ჭორს და ხალხსაც არარსებული საფრთხის შიშიც გაუქრება, _ თქვა მან.
ქალაქ ოზურგეთის მერიის უსაფრთხოების სამსახურის წარმომადგენლებმა აღნიშნეს, რომ რაკი ბეტონის საფართან დადგმული ამკრძალავი ნიშანი მოიპარეს, ახლა გააკეთებენ მუყაოს ან ხისგან დამზადებულ ნიშანს მითითებით, რომ საფართან მიახლოება სასურველი არ არის.
ამავე თემაზე:
შეხვედრა ეკოლოგიურ პრობლემებთან დაკავშირებით;
მოსახლეობა რადიაციის კერებთან ახლოს, სპეციალისტების მოლოდინში ცხოვრობს;
ოზურგეთში საბჭოური სამხედრო ბაზების ტერიტორიების შესწავლას ითხოვენ;
