"პოლიტიკის და სამართლის ცენტრის თავმჯდომარე", უკრაინაში საქართველოს თავდაცვის სამინისტროს ყოფილ წარმომადგენელი, ამირან გიგუაშვილი "გურია ნიუსთან" საუბრისას ამბობს, რომ მიხეილ სააკაშვილი შესაძლოა, მალე უკრაინის პრემიერ-მინისტრად ვიხილოთ; ოდესის ოლქის გუბერნატორად მისი დანიშვნა კი, წინგადადგმული ნაბიჯია.
მისივე თქმით, სააკაშვილი აღარ არის საქართველოს მოქალაქე და "ეს არის ცალსახა და ყველა დანარჩენი მოსაზრება არის ან სპეკულაცია, ან კონსტიტუციის და კანონების უცოდინრობა".
_ მიხეილ სააკაშვილი აღარ არის საქართველოს მოქალაქე. მან სხვა ქვეყნის მოქალაქეობის მიღებისთანავე კანონის საქართველოს მოქალაქეობის შესახებ 21-ე მუხლის თანახმად ავტომატურად დაკარგა საქართველოს მოქალაქეობა. ეს არის ცალსახა და ყველა დანარჩენი მოსაზრება არის ან სპეკულაცია, ან კონსტიტუციის და კანონების უცოდინრობა. რაც შეეხება ორმაგ მოქალაქეობას. ეს საქართველოს პრეზიდენტის კონსტიტუციური დისკრეციაა, რომელიც მხოლოდ იმ შემთხვევაში ამოქმედდება, თუ რომელიმე უცხო ქვეყნის მოქალაქე, ამ შემთხვევაში კი მიხეილ სააკაშვილი ამის შესახებ თხოვნით მიმართავს საქართველოს პრეზიდენტს.
ასე, რომ აქ ყველაფერი ნათელია. თუმცა მთელს ამ ისტორიაში ალბათ ეს საკითხი ყველაზე ნაკლებად მნიშვნელოვანია, როგორც უკრაინელი ხალხისთვის, ისე ჩვენი ქვეყნისთვის. ჩვენ ყველანი ვაკვირდებით დეტალებს და ამასობაში ვერ ვხედავთ მთელ პოლიტიკურ პანორამას, რომელიც ახლა, ჩვენს თვალწინ ვითარდება და ამ მოვლენების მთავარი პერსონაჟი, სწორედ მიხეილ სააკაშვილია _ ამბობს გიგუაშვილი "გურია ნიუსთან" საუბრისას.
_ ბატონო ამირან, უკრაინელი ხალხისთვის მიხეილ სააკაშვილის ოდესის ოლქის გუბერნატორობა შეიძლება მართლაც მნიშვნელოვანია, მაგრამ რა შუაშია აქ ჩვენი ქვეყანა, მით უმეტეს, თქვენ თავად აცხადებთ, რომ მან საქართველოს მოქალაქეობაც კი დაკარგა და შესაბამისად იგი პოლიტიკური პროცესებში მონაწილეობას უკვე ვეღარ მიიღებს…
_ნუ ვიმსჯელებთ იმ უვიცი მეზობელივით, რომელსაც ორღობის გადაღმა გადახედვა არ შეუძლია და არც აინტერესებს რა ხდება. საკითხს უფრო გლობალურად, ერთიან პოლიტიკურ ჭრილში უნდა შევხედოთ. მიხეილ სააკაშვილის ოდესის ოლქის გუბერნატორად დანიშვნა მრავალშრიანი, მრავალწახნაგოვანი პოლიტიკური პროცესია. უმთავრესი ფაქტორი ოდესის რეგიონის იგორ კალამოისკის გავლენისგან გასუფთავებაა, რომელიც ფაქტობრივად საბოტაჟს უწყობდა პრეზიდენტ პოროშენკოს.
ოლიგარქი კალამოისკი მოიშორეს დნეპროპეტროვსკიდან, მაგრამ მას ასევე ძლიერი დასაყრდენი ჰქონდა ოდესის ოლქში, მისი პროტეჟე გუბერნატორი იგორ პალიცას სახით.
ასევე პირველი ხარისხის საკითხია, პრორუსული განწყობებით სავსე რეგიონში, პუტინისათვის ძლიერი პროდასავლური მესიჯების გაგზავნა და ამ კონტექსტში ცხადია, რომ მიხეილ სააკაშვილი საუკეთესო ვარიანტი იყო. ასევე მნიშვნელოვანია, ოდესაში მოხდეს მოდელირებული საქართველოს შექმნა მიხეილ სააკაშვილის მონაწილეობით.
დღემდე ის პრეზიდენტის მრჩეველი იყო, მაგრამ რეალური ძალაუფლება მას არ გააჩნდა. ცხადია, რომ მიხეილ სააკაშვილისთვის, რომელიც თავისი ბუნებით არის აღმასრულებელი ტიპის პოლიტიკოსი, მიუღებელი იყო სტატისტის როლში ყოფნა. შესაბამისად მას ეხლა მიეცემა საშუალება თავისი იდეები და რეფორმები რეალურად განახორციელოს, რისთვისაც პრეზიდენტ პოროშენკოსგან სრული კარტბლანში ექნება.
თუმცა ესეც ვფიქრობ მხოლოდ აისბერგის ზედაპირია და ამ გადაწყვეტილების სამომავლო პერსპექტივებს ჯერ კარგად ვერც ვხედავთ.
_ გულისხმობთ, რომ მიხეილ სააკაშვილი კიდევ უფრო დაწინაურდება უკრაინის პოლიტიკურ სარბიელზე, როგორც ამას ზოგიერთი უკრაინელი და უცხოელი ანალიტიკოსი აცხადებს?
_ მიხეილ სააკაშვილმა საქართველოს მოქალაქეობის დათმობით პრეზიდენტ პოროშენკოს პრაქტიკულად უპრეცედენტო მხარდაჭერა გამოუცხადა. მოდით ნუ მოვიტყუებთ თავს. მიხეილ სააკაშვილი არ იყო საქართველოს ჩვეულებრივი მოქალაქე.
მიუხედავად იმისა, რომ ჩვენ ვაკრიტიკებთ მას იმ წითელი ხაზების გადაკვეთისა და ადამიანების უფლებების მასიურად დარღვევებისათვის, რაც მისი მმართველობის პერიოდს ახასიათებდა, იგი ბოლო დრომდე ბიძინა ივანიშვილის ერთადერთ რეალურ საპირწონე ცენტრს წარმოადგენდა. საქართველოს პოლიტიკური ველიდან გასვლით, იგი პრაქტიკულად ვა-ბანკზე წავიდა. პოლიტიკაში კი რომანტიკის ადგილი არ არის და არც მიხეილ სააკაშვილია ამ სენით დაავადებული, რომ მხოლოდ პოროშენკოსადმი მეგობრობის და უკრაინელი ხალხის სიყვარულით გადაედგა ასეთი უმნიშვნელოვანესი ნაბიჯი.
აშკარაა, რომ არსებობს შეთანხმება მომავალ პოლიტიკურ თანამშრომლობაზე პოროშენკოს და სააკაშვილს შორის და ეს დიდწილად იქნება დამოკიდებული იმაზე, თუ როგორ წარმატებით ჩააბარებს მიხეილ სააკაშვილი ოდესურ გამოცდას. ეს პროცესი ერთგვრად უკრაინელი საზოგადოების შემზადებაც არის მიხეილ სააკაშვილის აღმასრულებელ ხელისუფლებაში აქტიურად შესაყვანად.
პრემიერ იაცენიუკის მთავრობის პოპულარობის მკვეთრად შემცირების ფონზე უახლოეს მომავალში შესაძლოა მთავრობის შეცვლის საჭიროება დადგეს და ამ პროცესში მიხეილ სააკაშვილი უკრაინის პრემერადაც ვიხილოთ, მით უფრო ამაზე ღიად საუბრობენ უკრაინელ ექსპერტთა წრეებში. ეს ცხადია, უმნიშვნელოვანესი მოვლენა იქნება არა მხოლოდ უკრაინისათვის, არამედ საქართველოსათვისაც, ვინაიდან ჩვენ ქვეყანას რუსეთთან უმძიმესი სავაჭრო და პოლიტიკური ურთიერთობების ფონზე, უკრაინასთან პარტნიორობის გარეშე, უბრალოდ არსებობა არ შეუძლია.
_ თქვენ მიხეილ სააკაშვილის თამაშიდან გასვლა ახსენეთ და ვინ დაიკავებს მის ადგილს. ვინ გახდება, როგორც თქვენ ამბობთ ბიძინა ივანიშვილის საპირწონე ქართული პოლიტიკურ სივრცეში?
_ ყველაზე რეალური შანსები ირაკლი ალასანიას და თავისუფალ დემოკრატებს აქვთ. ყველა კვლევებით ჩანს, რომ ეს პროცესი ისედაც მიდიოდა და ვფიქრობ ნაციონალური მოძრაობის დაშლა-დასუსტების ფონზე თავისუფალი დემოკრატები კიდევ უფრო გაძლიერდებიან.
თუმცა 2016 წლის საპარლამენტო არჩევნებში ცალკე აღებულ ერთ რომელიმე პოლიტიკურ ძალას გადამწყვეტი უმრავლესობის მოპოვება მაინც გაუჭირდება, რაც შესაძლოა სულაც არ იყოს ისეთი ცუდი, როგორც ჩვენ გვგონია. მეტი პლურალიზმი და კონკურენცია ქმნის ჯანსაღ პოლიტიკურ გარემოს.
