“ათასი პრობლემა გვაქვს!” _ მოქალაქეები გუბერნატორთან შეხვედრაზე

ეკონომიკური სიდუხჭირე, ხელისუფლების დაპირების იმედად დარჩენილი სტიქიით დაზარალებული ოჯახები, ახალგაზრდების დასაქმება, _ ეს იმ პრობლემათა მცირე ჩამონათვალია, რომლის გადაჭრის მოთხოვნითაც მოქალაქეები, დღეს, 10 საათიდან  გურიის გუბერნატორთან შესახვედრად შეიკრიბნენ. 

ქალაქ ოზურგეთში, ჯავახიშვილის ქუჩა # 58-ში მცხოვრები პაშა ჩხაიძე გუბერნატორთან ხელისუფლების მიერ მის მიმართ უყურადღებობაზე სასაუბროდ მივიდა: 

"პირველი ჯგუფის შეზღუდული შესაძლებლობების მქონე შვილი მყავს _ შრომისუუნაროა, მე 85 წლის ვარ. უკვე რამდენი წელია ვითხოვ დახმარებას _ მატყუებენ, ყველას გადაუხურეს სახლი და მე დამტოვეს! რა დავაშავეთ ასეთი, რომ არც ერთმა მთავრობამ ყურადღება არ მომაქცია? სახლში საშინელი მდგომარეობაა _ თავზე მაწვიმს. სირცხვილი არაა ჩემისთანა გაჭირვებულის მოტყუება? ქალაქის მერიას მივმართე, ვიყავი კიდეც მიღებაზე. ახლა შვილი მშიერი მყავს დატოვებული  სახლში, გამოკეტილი. დამეხმარეთ!" _ გვთხოვდა პაშა ჩხაიძე.

იამზე ნიჟარაძე 3 მცირეწლოვანი შვილის დედაა. როგორც თავად ამბობს, სახლ-კარი არ გააჩნია:

"თავშესაფარს ვითხოვ. სოფელ მერიაში რომ კეთდება ყოფილი "გარადოკი", სადაც უსახლკაროებს ასახლებენ, იქ მინდა რამდენიმე ოთახი. არ გვაქვს სახლი, კარი, არც მიწა, სამი მცირეწლოვანი შვილით ქუჩაში ვარ!"

80 წლის გაბრიელ გაბრიელიანი  ოზურგეთის მუნიციპალიტეტის სოფელ ძიმითში ცხოვრობს. მისი თქმით, რვასულიანი ოჯახი ავარიულ სახლში ცხოვრობს, რომელიც,  შეიძლება, მალე ჩამოინგრეს:

"რვასულიანი ოჯახი ვართ. რამდენიმე წელია ვითხოვ სახლის შეკეთებას, რომელიც ავარიულ მდგომარეობაშია _ სახურავი გადამძვრალი აქვს, ბოძები, რაზეც სახლი დგას,  გამოთხრილია. მენგრევა სახლი _ ძალიან გვიჭირს!"

"მე გაგარინის ქუჩაზე ბინებში პირველ სართულზე ვცხოვრობ. კანალიზაცია ისე გაფუჭებული, ყარს იქაურობა. ყურადღებას არავინ არ გვაქცევს. სიღარიბის ზღვარს ქვემოთ რახან ვართ, იმიტომ გვჩაგრავენ?!" _ ამბობს გაგარინის ქუჩის ერთერთი მცხოვრები.

ქალაქ ოზურგეთში, ბათუმის ქუჩაზე მცხოვრები კლიმენტი ღლონტი გუბერნატორთან შვილის დასაქმების თხოვნით მივიდა:

"პრობლემა ძალიან ბევრია, მაგრამ რაც ძალიან გვაწუხებს, ახალგაზრდა შვილის უმუშევრობაა. ხანდაზმულები მუშაობენ და ახალგაზრდები სახლში ზიან. ახალგაზრდა კაცია, მასაც უნდა თვითონ იშოვოს ლუკმაპურის ფული."

ნანა ორაგველიძე გუბერნატორთან შესახვედრად ლანჩხუთიდან ჩამოვიდა: "ოპერაცია მაქვს გასაკეთებელი, რომელიც საყოველთაო დაზღვევის პროგრამაში არ ჯდება. ლანჩხუთის მუნიციპალიტეტი კი დამეხმარა, მაგრამ ის ზღვაში წვეთია. ახლა გუბერნატორს უნდა ვთხოვო, რაიმე სახის დახმარება გამიწიოს."

76 წლის ვალენტინა ზურაბაშვილი, რომელიც ქალაქ ოზურგეთში ნინოშვილის ქუჩაზე ცხოვრობს, ამბობს, რომ მძიმე მდგომარეობაშია: "ათასი პრობლემა მაქვს _ უქონლობის, უჭმელობის, ჯანმრთელობის… რომელი ერთი გითხრათ?! ონკოლოგიური ავადმყოფი ვარ. მოვედი გუბერნატორთან _ ვნახოთ, იქნება დამეხმაროს!"

იასონ მიშველიანი ქალაქ ოზურგეთში, ლომთათიძის ქუჩაზე  ცხოვრობს. მისი თქმით, იგი სტიქიით დაზარალებულია, ხელისუფლებამ კი დახმარება არ გაუწია:

"სტიქიით დაზარალებული ვარ, მაგრამ ყურადღებას არავინ მაქცევს. კომისია რომ იყო მოსული, მითხრა, შენი სახლის სახურავის გასაკეთებლად თანხაა გამოყოფილიო, მაგრამ სადაა ის თანხა?  გააქრეს, ააორთქლეს! ახალი ხელისუფლება  წინას აბრალებს! ათჯერ მაინც ვიყავი ქალაქის მერიაში. მეუბნებიან, სახლიდან ვერ მოგიტანთ და თუ დარიგდება რამე, მოგცემთო. სახურავი სულ დამპალია აქვს სახლს _ იქ ღამის გათევა არ შეიძლება!"

სოფელ ბოხვაურის მცხოვრები თინა გურგენიძე შვილისთვის სამსახურის ითხოვს:

"უმაღლესი განათლება აქვს ჩემს შვილს _ ლია მოლარიშვილს. 7 ნოემბერს, აქციის დარბევის დროს მომიწამლეს. სამსახურს ვითხოვ მისთვის. არჩვენებზე ბევრი ვიბრძოლე "ქართული ოცნებისთვის" _ 640 კომლის ხმები მოვუგროვე. ჯოხით მოვიარე ეს ოჯახები. სახლში შტაბი მქონდა, "ნაციონალებმა" კიდეც მომწამლეს, მაგრამ ახალ ხელისუფლებას ხელფასიც არ მოუცია. შეჭამეს ბიძინას ფულები მაშინ,  გამოტენეს შტატები ნათესავებით. ვნახოთ, რა იქნება _  გუბერნატორის იმედი მაქვს," _ ამბობს თინა გურგენიძე.

კითხვაზე, როგორ და რა სახის დახმარების გაწევას აპირებს გუბერნატორი მოქალაქეებისთვის,  პრესსამსახური გვპასუხობს:

 "გუბერნატორმა მოისმინა თითოეული მოქალაქის პრობლემის შესახებ და ის თავისი კომპეტენციის ფარგლებში ყველანაირად ეცდება, ყველას გაუწიოს დახმარება."