გარემოსდაცვითი პოლიტიკა და სტრატეგია გააცნო გარემოსა და ბუნებრივი რესურსების დაცვის მინისტრმა გიგლა აგულაშვილმა კანონმდებლებს გარემოს დაცვისა და ბუნებრივი რესურსების კომიტეტის სხდომაზე.
როგორც მომხსენებელმა აღნიშნა, გარემოს დაცვა და ბუნებრივი რესურსების რაციონალური გამოყენება ქვეყნის მთავრობის საქმიანობის ერთ-ერთ პრიორიტეტულ მიმართულებად პარლამენტის 2012 წლის არჩევნების შემდეგ იქცა და სწორედ მაშინ აღდგა კიდეც პრაქტიკულად გაუქმებული სამინისტრო თავისივე უმნიშვნელოვანესი ფუნქციებით, როგორიცაა ბუნებრივი რესურსების მართვა, გარემოსდაცვითი ზედამხედველობა.
მართალია, წლიდან წლამდე იზრდება სამინისტროს დაფინანასებაც, თუმცა იგი მძიმე, რთული და მრავალ მასშტაბიანი ამოცანების წინაშე დგას და მინისტრის განცხადებით, სამინისტროს ფუნქციური მნიშვნელობის სათანადო გააზრება და ადეკვატური სახელმწიფო მხარდაჭერა ესაჭიროება.
გიგლა აგულაშვილმა კანონმდებლებს სამინისტროს წინაშე დასახული მიზნებისა და მათი შესრულებისთვის აუცილებლად განსახორციელებელ გეგმებზე მიაწოდა ინფორმაცია და აღნიშნა, რომ გარემოს დაცვისა და ეკონომიკური განვითარების ურთიერთკავშირის შესაბამისად, რასაც დღევანდელ მსოფლიოში ექცევა უდიდესი ყურადღება, ჩამოყალიბდა სამინისტროს მთავარი მიზნები: ქვეყანაში მდგრადი განვითარების წინაპირობების შექმნა და გარემოს დეგრადაციის შემცირება. ამ მიზნების მისაღწევად სამინისტროში რამდენიმე მიმართულება დაისახა, მათ შორის: ევროინტეგრაციის გაღრმავება, მწვანე ეკონომიკის ხელშეწყობა და გარემოსდაცითი მართვის გაუმჯობესება საზოგადოების ფართო მასების აქტიური ჩართულობით.
მინისტრმა კომიტეტის წევრების ყურადღება მიაპყრო სამინისტროს ხედვებს, რომლის მიხედვითაც სფეროში არსებული მდგომარეობის გაუმჯობესებას აპირებენ და რომელთაგანაც ერთ-ერთი მნიშვნელოვანი მიმართულებაა საკანონმდებლო ჰარმონიზაცია ევროპულ და საერთაშორისო ნორმებთან. მან ასევე დეტალურად ისაუბრა ბოლოდროინდელ მიღწევებსა და საერთაშორისო თანამშრომლობაზე, უპასუხა კომიტეტის წევრების კითხვებს.
როგორც კომიტეტის თავმჯდომარემ გია ჟორჟოლიანმა აღნიშნა, გარემოს დაცვის კონცეფცია მდგრად განვითარებას უნდა დაეფუძნოს და ამ ვითარებაში სახელმწიფომ, მუნიციპალიტეტებმა, ბიზნესმა აუცილებლად უნდა ითანამშრომლონ, ვინაიდან მხოლოდ აკძალვებისა და ჯარიმების გზით გარემოსდაცვით პოლიტიკას ვერ მოევლება.
„გარემოს დაცვა, ეკონომიკა, რეგიონული და ადგილობრივი პოლიტიკა ერთმანეთს თუ მჭიდროდ არ დავუკავშირეთ, ვერც ეკონომიკას განვავითარებთ და ვერც გარემოს დავიცავთ“, – განაცხადა გია ჟორჟოლიანმა და იმედი გამოთქვა, რომ კომპლექსური მიდგომები ყველა მხრიდან გაზიარებული იქნება.
ამავე სხდომაზე გარემოს ეროვნული სააგენტოს უფროსმა თამარ ბაგრატიამ კანონმდებლებს სააგენტოში არსებული მდგომარეობისა და მის წინაშე მდგარი გამოწვევების შესახებ ინფორმაცია მიაწოდა.
აღნიშნული სააგენტოს საქმიანობის ძირითადი მიმართულებებია: გარემოს დაბინძურების მონიტორინგი – ჰაერის, წყლისა და ნიადაგის დაბინძურების მონიტორინგი და რადიაციული ფონის შეფასება; გეოლოგიური პროცესების მონიტორინგი, მინერალური რესურსების მართვა; ჰიდრომეტეოროლოგიური მონიტორინგი – ჰიდროლოგიური და მეტეოროლოგიური დაკვირვებები და პროგნოზები; ლიცენზიების გაცემა მინერალური რესურსებით სარგებლობაზე; შავი ზღვის მონიტორინგი.
სხდომაზე სამინისტროსა და კომიტეტის წარმომადგენლები სამომავლო თანამშრომლობის ცალკეულ ასპექტებზეც შეთანხმდნენ.
