ოზურგეთის მუნიციპალიტეტის დაბა ნასაკირალში მცხოვრებ ჯუმბერ გორგაძის მიწის ნაკვეთისთვის დავა, ოზურგეთის მუნიციპალიტეტის გამგეობასა და მესაკუთრეს შორის, რამდენიმე წელია მიმდინარეობს. როგორც გორგაძე აცხადებს, კუთვნილი მიწა ოზურგეთის მუნიციპალიტეტის გამგეობამ, მისთვის შეუტყობინებლად, გაიტანა აუქციონზე. როგორც იგი “გურია ნიუსთან” საუბარში აცხადებს, ნაკვეთს ისე მიანიჭეს არასასოფლო-სამეურნეო დანიშნულების მიწის სტატუსი და ჩამოართვეს, რომ მისმა ოჯახმა ამის შესახებ არაფერი იცოდა.
ოზურგეთის მუნიციპალიტეტის დაბა ნასაკირალში მცხოვრები დაზარალებული 64 წლის ჯუმბერ გორგაძე “გურია ნიუსთან” დაწვრილებით საუბრობს იმ პრობლემებზე, რომელიც მის ოჯახს, როგორც თავად ამბობს, განზრახ შეუქმნეს:
_ დავა ოზურგეთის რაიონულ სასამართლოში გრძელდება _ მე ბოლომდე ვიბრძოლებ ჩემი შელახული უფლების აღსადგენად. ისედაც ბევრი მაწვალეს _ დანიშნავდნენ სასამართლოს, გადადებდნენ იმ მიზეზით, რომ ხან მოწმე არ არის, ხან დოკუმენტი მზად არ გვაქვსო, ამბობდნენ. გულის ინფარქტი გადავიტანე. მაინტერესებს, როგორ მსჯელობენ, როგორ გამოაქვთ დასკვნა, თუ ჩემს საწინააღმდეგოდ გადაწყვეტენ საქმეს, აუცილებლად მივმართავ სხვა ინსტანციებს. თქვენც შეგიძლიათ ნახოთ ადგილზე _ მთლიანად ეს ნაკვეთი არის 4200 კვ.მ. მე მაქვს საკუთრების დამადასტურებელი მოწმობა. ჩემს კუთვნილ ტერიტორიაზე, რომელიც იყო სასოფლო-სამეურნეო დანიშნულების მიწა, დადგეს მაგთიკომის ანძა. როცა დგამდნენ, ჩქარობდნენ, უნდოდათ საახალწლოდ გაეშვათ ტელევიზია. ამის შემდეგ წლებია გასული. მე ხელი არ შევუშალე მათ, მშენებლობა ჩემთან შეთანხმების გარეშე მიმდინარეობდა, ეს მიწა ჩემი შვილის, ნუგზარის სახელზე არის გაფორმებული. ვერანაირად ვერ შევთანხმდით ჩვენ და მაგთიკომის წარმომადგენლები. ადგნენ და გაგვაფორმეს იმ ადგილზე დარაჯად. რადგან მე ვიყავი მიწის მეპატრონე, ვთხოვდი, რომ მიწის გადასახადი ამინაზღაურეთ,-მეთქი. ჯერ მითხრეს, 150 ლარს გადაგიხდით დარაჯის ხელფასსო, კიდევ ზედმეტად 50 ლარი ჩემი შვილისთვის უნდა მიეცათ და 50 _ ჩემთვის. მერე ჩამოგვიყვანეს 100 ლარზე. ვერ შევთანხმდით _ მინდოდა ნაღდი ქირა ამეღო, მიწის გადასახადის სახით. ასე გადიოდა დრო.
_ შემდეგ რა მოხდა?
_ შემდეგ, თურმე, მუნიციპალიტეტის გამგეობამ ჩვენთვის დაუკითხავად გაიტანა ეს მიწა აუქციონზე. ჯერ მიწა გადაიყვანეს არასასოფლო-სამეურნეო სტატუსზე, რაც მიწის გაუფასურებას ნიშნავს. ჩვენ ყველაფერი კანონიერად გაფორმებული და ნოტარიუსით დამტკიცებული გვაქვს. ამის მერე ოჯახზე ხორციელდებოდა ზეწოლა _ ხან დოკუმენტებით გვაშინებდნენ, არ გაგიკეთებთო, ხან ვიღაცეებს გვიგზავნიდნენ, მოგვცეს ეს მიწაო.
_ ვინ ახორციელებდა ზეწოლას?
_ ასე ვერ დავასახელებთ. თუმცა, ამის მოწმე მთელი სოფელი და მეზობლებია. სხვათა შორის, ჩვენი სოფლის გამგეობიდანაც ხორციელდებოდა ზეწოლა ჩვენზე.
_ რას ითხოვდნენ?
_ გაეცით ეს მიწა, თუ არა, მაინც წაგართმევთო. მერე რამდენიმე ხანი გავჩერდით. დაიდგა მეორე ანძა, ჯეოსელის. კიდევ კარგი, რომ ასე მოხდა, რადგან ჩვენს მიწას ისედაც გვართმევდნენ თურმე და ჩვენ ამის შესახებ არაფერი ვიცოდით. აუქციონზე გაიტანეს ჩვენი მიწა და გადაიფორმეს. ჩვენ კი გვითხრეს, თქვენი მიწა გადაფარულიაო. რომ მივედით გამგეობაში, ჩვენი ნაკვეთის არსებობაც აღარ ჩანდა, საჯარო რეესტრში დარეგისტრირებული არ იყო, მერე შევაწრიალეთ ყველაფერი, ჩემმა შვილმა ირბინა ბევრი და მერე კი აღმოაჩინეს საჯარო რეესტრშიც. ვეღარ დაგვიმალეს, რადგან კანონიერი და ნოტარიუსით გაფორმებული იყო. თუმცა, ისე ჩამოუყვანიათ 150 კვ.მ.-ზე, რომ არც ვიცოდით. გაიტანეს მიწა აუქციონზე უჩვენოდ, თან ჩამოაფასეს. ფაქტობრივად, ყველაფერი ყალბად გააკეთეს მათთვის სასარგებლოდ, ჩვენთან შეუთანხმებლად. ჩვენ არ ვიცოდით, თუ დოკუმენტები ასე ყალბად კეთდებოდა.
_ ვინ იყო მაშინ ნასაკირალის რწმუნებული და თუ მიმართეთ დასახმარებლად?
_ ის გვატყუებდა, თქვენი საქმე კეთდება და ხვალ იქნება, ერთ თვეში იქნებაო. მაგ დაპირებაში გადიოდა დრო. თვითონაც დაგვყვებოდა გამგეობაში და გვახვედრებდა წარმომადგენლებს. არ არსებობს დოკუმენტი, სადაც არის დაფიქსირებული, რომ ჩვენ და გამგეობა რაიმეზე შევთანხმდით.
_ რამდენი წელია, რაც დავა მიმდინარეობს ამ მიწაზე?
_ ალბათ, ხუთი. სასამართლოში შევიტანეთ სარჩელი. დაზარალებული ჩვენ ვართ _ თავხედურად წაგვართვეს მიწის ნაკვეთი და ვაცხადებ, რომ არანაირ შეთანხმებაში არ ვართ. აღარც სამოსახლოდ ვარგა. ანძა რადიაციასაც გამოჰყოფს და იქ აღარც ცხოვრება შეიძლება. ნაჩვენებია დოკუმენტებში ყველაფერი, მოგვატყუეს. სრული პასუხისმგებლობით ვაცხადებ, რომ ეს მიწა ჩუმად წაგვართვეს. გვეშინოდა ყველაფრის ხმამაღლა თქმა. მერე მიშა რომ მოვიდა, შეებრძოლა კორუფციას და ვიფიქრეთ, სამართალს ვიპოვიდით, მაგრამ სადაა სამართალი? მაგრამ მე ამით არ გავჩერდები.
“ვინაიდან საქმეს იხილავს რაიონული სასამართლო, მიზანშეწონილად არ მიგვაჩნია კომენტარის გაკეთება გადაწყვეტილების გამოტანამდე”, _ ამ კომენტარის მომზადებას ოზურგეთის მუნიციპალიტეტის გამგეობამ სამი დღე მოანდომა.
ოზურგეთის რაიონული სასამართლო აღნიშნულ საქმეზე გადაწყვეტილებას, სავარაუდოდ, ამ კვირაში გამოიტანს.
