საქართველოს პარლამენტის წევრი, ოზურგეთის მაჟორიტარი ზვიად კვაჭანტირაძე სოციალურ ქსელში განცხადებას აქვეყნებს და საზოგადოებას “მთის კანონის“ მხარდაჭერისკენ მოუწოდებს:
“საქართველოს ტერიტორიის 2/3 მთიანი რეგიონია და უპირველესად ეს სასაზღვრო ზონებია. მთა კი ათწლეულებია იცლება მოსახლეობისგან. მთა პრაქტიკულად დაცლილია. მთავრობამ პარლამენტში განსახილველად შემოიტანა ე.წ. " მთის კანონი", რომელიც ძალიან ბევრ შეღავათს ითვალისწინებს მთის მოსახლეობისთვის და ნებისმიერი იმ ადამიანისთვის, ვინც მოისურვებს ბიზნესის წამოწყებას მთიან რეგიონებში. სერიოზული შეღავათები დაწესდება ექიმებისთვის, მასწავლებლებისთვის და ყველა იმ გამქრალი სპეციალობების წარმომადგენლებისთვის, რომელთაგან დღეს მთა დაცლილია. ამ კანონის მიზანია დავაბრუნოთ სიცოცხლე და განვითარება მთაში. საქართველო მარტო თბილისი, ქუთაისი და ბათუმი არ არის. მთას, სჭირდება როგორც ჯანდაცვის უზრუნველყოფა, ასევე კულტურა, განათლება, სოფლის მეურნეობა, ენერგეტიკა. ეს კანონი კანონად დარჩება და ვერ შესრულდება, თუ ამას ქვეყნის აღმასრულებელ ხელისუფლებაში არ ეყოლება სპეციალურად დანიშნული პიროვნება. საპარლამენტო უმრავლესობის აზრით, ასეთი სტრუქტურის შექმნა მთიანი რეგიონების განვითარების სახელმწიფო მინისტრის მცირერიცხოვანი აპარატის სახით მიზანშეწონილი იქნებოდა.
იმედია, ამ ინიციატივას უპირველესად ხალხი და მთავრობაც მხარს დაუჭერს. ასეთი ინიციატივის ერთ-ერთი მთავარი მოტივაცია ისიც არის, რომ დაგეგმილი ცვლილებების ფონზე, როდესაც საკონსტიტუციო სასამართლოს გადაწყვეტილებით, 2016 წლის საპარლამენტო არჩევნების შეცვლილი წესის შედეგად, ფაქტიურად მაჟორიტარი დეპუტატების გარეშე რჩებიან მთის სასაზღვრო რეგიონები, სახელმწიფო მინისტრი იქნება მთის სპეციფიკური პრობლემების გადაწყვეტის და მთის მოსახლეობის პირდაპირი ლობისტი მთავრობაში. სახელმწიფო ბიუჯეტისთვის ეს იქნება მინიმალური ხარჯი, რომელიც ამ ინსტიტუტის ამოქმედების შედეგად მოსალოდნელი შედეგების ფონზე მართლაც უმნიშვნელო იქნება.
მინდა მოგიწოდოთ ყველას, რომ გულით გაიაზროთ ამ ინიციატივის შინაარსი და არ აყვეთ ფუჭ და ხელისუფლების საწინააღმდეგო პროპაგანდას. ჩვენ ვართ დარწმუნებულები, რომ ყველა გვერდში დაგვიდგებით და მხარს დაგვიჭერთ ამ საჭირო საქმეში. ჩვენ უნდა დავუბრუნოთ სიცოცხლე და განვითარების პერსპექტივები საქართველოს მთას.“
