დღეს, ლანჩხუთის საკრებულოს დეპუტატებს რიგგარეშე მოუწიათ შეკრება, რაზეც სხდომის დასაწყისშივე დეპუტატმა გია გოგუაძემ გარკვეული შენიშვნები გამოთქვა. მან საკრებულო რეგლამენტის იგნორირებაში და გამგეობის დაკვეთით მუშაობაში დაადანაშაულა.
"ერთი წელია, ამ დარბაზში ირღვევა რეგლამენტი, ამ საკრებულოს ღირებული არაფერი გაუკეთებია; ისე გამოდის, გამგეობის დაკვეთით ვმუშაობთ. როცა გამგეობას დასჭირდება, საკრებულოს სხდომები მაშინ იმართება. არადა, რეგლამენტით გათვალისწინებული გვაქვს, რომ საკრებულო ორშაბათ დღეს შეიკრიბოს, 22-ე სხდომას ვატარებთ და არც ერთი დღე არ ყოფილა ორშაბათი! ძალიან მალე გავაჟღერებთ იმ ფაქტსაც, რომ საკრებულოში უკანონოდაა ერთ-ერთი ფრაქცია შექმნილი. კარგად შევისწავლით და მოვიკვლევთ ამ დარღვევით ბიუჯეტმა რა ოდენობის თანხა იზარალა. ვინ არის ყველაფერ ამაზე პასუხისმგებელი?!. ბატონო გოგი, თქვენგან მიკვირს, ეტყობა ეს თქვენი ასაკის ან დიდი კომფორტის შედეგია, რომ ჩვენ ასეთ დღეში ვართ. პირველი სხდომიდან მოყოლებული ამ საკითხს ვაყენებთ, მაგრამ დღემდე არ გაგიზიარებიათ", – განაცხადა გოგუაძემ.
გოგუაძის თანაპარტიელმა კახა ასკურავამ კენჭისყრის დაწყებამდე განაცხადა, რომ იგი წარმოდგენილ დღის წესრიგს მხარს ვერ დაუჭერდა: _ პირველ საკითხთან დაკავშირებით წარმოდგენილ პაკეტს თან „საქართველოს მთავრობის განკარგულება" ერთვის, რომელიც არასრულყოფილად არის მოწოდებული, შუაზეა გაწყვეტილი, რა უნდა გავიგო?! და კიდევ, ინფრასტრუქტურის სამსახურის უფროსი, ლევან ჩხაიძე წარმოგვიდგენს საკითხს „ლანჩხუთის მუნიციპალიტეტში 2015 წელს გასახორციელებლი ინფრასტრუქტურული პროექტის მოწონების შესახებ"; მაინტერესებს ამ შემთხვევაშიც რა უნდა მოვიწონო, ის რაც ქაღალდზეა დაწერილი?!
ოპოზიციის მხრიდან შენიშვნების გამოთქმის შემდეგ, საკრებულოს თავმჯდომარემ გოგი ხელაძემ განმარტება გააკეთა, რომ საკრებულოს სხდომები უმეტესად პარასკეობით იმართება და რეგლამენტითაც, სავარაუდოდ, ეს დღე დაწესდება სასესიოდ. ამის შემდეგ დღის წესრიგს კენჭი ეყარა და მომხსენებლებსაც რიგითობის მიხედვით უფლება მიეცათ წარმოსადგენი საკითხები სამსჯავროზე გამოეტანათ.
საფინანსო სამსახურის უფროსმა როლანდ ლაშხიამ მუნიციპალური შესყიდვების გეგმაში ცვლილების შეტანასთან დაკავშირებით საკრებულოს განკარგულება წარმოადგინა. შესყიდვების გეგმაში აისახა საქართველოს მთავრობის 2015 წლის 20 იანვრის #39 განკარგულებით, ლანჩხუთის მუნიციპალიტეტისთვის გამოყოფილი თანხები. აღნიშნული პროგრამის ფარგლებში ლანჩხუთის მუნიციპალიტეტისთვის დამატებით 900 000 ლარი გამოიყო, რომლითაც დაფინანსდება სუფსა-გულიანი-ჩოჩხათის გზის რეაბილიტაციის სამუშაოები.
დეპუტატი ნონა მურვანიძე დაინტერესდა, თუ რატომ არის ცალკე გამოყოფილი ეს 900 000 ლარი, როცა ის იმ 4 მილიონ 387 ათასი ლარის შემადგენელია, რომლითაც უნდა გაკეთდეს ჩოჩხათში გზა, რატომ კეთდება ამ თანხაზე ასე გამოკვეთილად აქცენტი, თითქოს ხელისუფლებამ ის დამატებით მოიძია და ამ თანხაში გაწერილია თუ არა, რა უნდა გაკეთდეს.
გამგებლის ზაზა ურუშაძის განმარტებით, მთლიანად ამ გზის მონაკვეთზე სამუშაოების გასახორციელებლად 4 მილიონ 387 ათასი ლარია საჭირო. სწორედ ამ თანხაზე გამოცხადდება ტენდერი და მასში გამარჯვებული ორგანიზაცია გარდამავალ ეტაპზე შეასრულებს 900 ათასი ლარის სამუშაოებს.
_ სად არის მერე ეს ნაჩვენები, სიტყვაზე გენდოთ?! ტელეფონზე მაინც მომასმენინეთ, რომ ნამდვილად სრულად გამოიყოფა ეს თანხა. მსგავსი ტიპის შესყიდვა ჯერ არ მსმენია, _ გაცხარდა დეპუტატი ნაციონალური მოძრაობიდან კახა ასკურავა.
_ რაა გაუგებარი, ახლა რა სამუშაოც შესრულდება, იმაზე გამოიყოფა თანხა. აგერაა ფინანსთა სამინისტროსადმი მიწერილი წერილი. ისე, ზოგიერთებს კი გეგონათ, რომ ეს გზა არ გაკეთდებოდა!- გამოეპასუხა მას გამგებელი.
_ ჩვენც გვანახეთ ბატონო, ეს წერილი, ოღონდ თქვენი მიწერილი კი არა, იმათგან მიღებული,_ არ თმობდა ასკურავა, _ ეს ჩემთვის ძალიან გაურკვეველი საქმეა და მხარს ვერ დავუჭერ. აგერ რეგიონალური განვითარების ფონდიდან გასახორციელებელი სამუშაოების სიას რომ გადავხედე, ნიგოითის თემის მხოლოდ ერთი სოფელია ნახსენები, დანარჩენმა ოთხმა რა დააშავა?!! დიდი მადლობა, რომ ქვიანში ბაღი გვაქვს, მაგრამ სხვა რაღაცეებიც არის გასაკეთებელი, თუნდაც გაზიფიცირება. თქვენ ბატონო ზაზა, საკუთარ აქტივში ნუ მიიწერთ, რომ გრიგოლეთის გაზიფიცირება თქვენი დამსახურებაა, ყველამ კარგად ვიცით ბიძინასა და მისი ძმის ინტერესები ურეკში, ამას მიება გრიგოლეთიც. "ნაციონალური მოძრაობა" რომ დარჩენილიყო ქვეყნის სათავეში, ახლა, დამერწმუნეთ, მუნიციპალიტეტის აღმოსავლეთ ზონა გაზიფიცირებული იქნებოდა, პროექტი უკვე შედგენილი იყო, თუმცა, ახალმა ხელისუფლებამ შეცვალა. ხელწერილები შეგროვებული გვაქვს, მოვითხოვთ ნიგოითის ზონის გაზიფიცირებას; წინააღმდეგ შემთხვევაში, გადავკეტავთ გაზის ცენტრალურ მაგისტრალს, ნახეთ მერე ოზურგეთი როგორ მიიღებს გაზს, ადექით მერე და დამიჭირეთ!
ასკურავას სიცხარეს დარბაზში უმრავლესობის წევრ დეპუტატთა გაღიზიანება მოჰყვა. გამგებლის ძმამ _ სოფელ მამათის მაჟორიტარმა, კახა ურუშაძემ უკმაყოფილება კიდევ ერთხელ გამოთქვა, დღის წესრიგით არ უნდა რეგულირდებოდეს, ვინ, რამდენ ხანს დაჰყოფს მიკროფონთანო. ასკურავას გამოსვლამ ასევე სუფსის მაჟორიტარი ჯუმბერ ბლაგიძეც გააღიზიანა და ასკურავას ტყუილში დასდო ბრალი. ბლაგიძე ადგილიდან საკმაოდ აქტიურობდა ხელისუფლების ინტერესების დასაცავად და ოპონენტებს ხშირადაც ეპასუხებოდა.
სიტუაცია საბოლოოდ გია გოგუაძემ განმუხტა:_ მოდით, არ ვიკამათოთ; თანხა, რომელიც ჩოჩხათში გამოიყო საპროექტო სამუშაოებისთვის, იყო 80 ათასი ლარი. სამუშაოები მთლინობაში ჯდება 4 მილიონ 387 ათასი ლარი; აქედან, 900 ათასი გამოიყოფა პირველადი სამუშაოების ჩასატარებლად, მაგრამ ამ და მთლიან სამუშაოებს ერთიდაიგივე კომპანია თუ შეასრულებს, ეს განმარტება მიეცით ხალხს და გაუგებრობაც აღარ იქნება…
შემდეგ ლაშხიამ ბიუჯეტში ცვლილების შეტანის თაობაზე საკრებულოს დადგენილების მისაღებად ადმინისტრაციული წარმოების დაწყების შესახებ ისაუბრა. გია გოგუაძემ განაცხადა, რომ ლანჩხუთში თავისუფლების ქუჩაზე ეკონომიკის სამინისტროს მიერ, ადგილობრივი ხელისუფლების ნებართვით გაიყიდა არასასოფლო მიწის ფართი; არადა, კარგი იქნებოდა მიღებული თანხა ადგილობრივ ბიუჯეტში ასახულიყოო.
როგორც აღმოჩნდა, გამგებელს ამ ფაქტის შესახებ ინფორმაცია არ ჰქონდა.
გამგეობის ინფრასტრუქტურისა და არქიტექტურის სამსახურის უფროსის, ლევან ჩხაიძის მოხსენებით, 2015 წელს ლანჩხუთში ახალი სპორტული ცენტრის მშენებლობაა დაგეგმილი და წინასწარი მონაცემებით, პროექტის სავარაუდო ღირებულება 2 500 000 ლარს შეადგენს. ნონა მურვანიძის აზრით, აუცილებელია, დეპუტატებს მიეწოდოს ინფორმაცია სად რა შენდება:_ საკრებულოში უფრო სრულყოფილი პროექტი უნდა შემოვიდეს, რომ სრული წარმოდგენა შეგვექმნას რაზეა საუბარი და სათანადოდ მოხდეს მისი შეფასება, _ თქვა მურვანიძემ. ს დეპუტატი რომან ბიწაძე დაეთანხმა: _ როცა რაღაცის გაკეთება გვინდა მუნიციპალიტეტში, ჯობია დავჯდეთ, ჩვენ მოვითათბიროთ, ადგილზე გადავწყვიტოთ რა, როგორ უნდა გაკეთდეს და იმის მიხედვით მივცეთ შემდეგ პროექტის დაკვეთა. ამდენი სალაპარაკო და სადაოც არაფერი იქნება. პროექტი რომ გაკეთდება, ფულს რომ გადავიხდით, მერე გინდა მოვიწონოთ და გინდ დავიწუნოთ, მას აღარავინ შეგვიცვლის, – განაცხადა ბიწაძემ.
