არასამთავრობო ორგანიზაციის „ძლიერი ქალი-ძლიერი სახელმწიფოს“ დამფუძნებელი ლალი მორიშკინა, ოზურგეთის მუნიციპალიტეტის სოფელ ბახვში, 10 ივნისს ჩაის პლანტაციას ესტუმრა, ჩაის კულტურის აღორძინებისა და გურული ჩაის პოპულარიზაციის მიზნით ლალი მოროშკინამ და ორგანიზაციის წარმომადგენლებმა ერთი დღით მეჩაიეების როლიც მოირგეს.
თბილისელი სტუმრები ჩაის პლანტაციებში რამდენიმე საათით გურულებმა სიმღერით გაამხნევეს.
პლანტაციებში ჩაის საკრეფად შესულმა მოსახლეობამ მთავრობის მიმართ პრეტენზიები გამოთქვა და თავისი გულისტკივილი ჟურნალისტებთან გამოხატა.
სოფელ ბახვში მცხოვრები იზოლდა ჩანქსელიანი "გურია ნიუსთან" საუბარში ამბობს, რომ მისი ოჯახი მხოლოდ ჩაის კრეფით ირჩენს თავს.
“კომპენსაცია გაგვიუქმეს წელს, არაფერი არ მოგვცეს, 7000 მეტრი მიწის ფართობი შევღობე, ავჭერი, ვეპატრონე ყველანაირად, მაგრამ მოუვლელია მაინც, მარტო მე კი არ ვარ ასე, მთელი სოფელი ამ დღეშია, გაჭირვებაში ვართ, არ მოგვცეს სასუქები, არც შხამქიმიკატები, ვინც ჩაის ფართობების მეპატრონეა, ფულს ძლივს სესხულობენ, არანაირი შეღავათები არ აქვთ, მე დიაბეტიანი ქალი ვარ და ჩაის ნაკრეფით ვყიდულობ წამალს, დღეში ვკრეფ15 – 20 კილო ჩაის და ისიც გაძვირებულ წამლებს სიმწრით ვყიდულობ, პურის და შაქრის ფული ცალკე მაქვს საშოვნელი, ყველა უმუშევარი მყავს ოჯახში მარტო მე ვმუშაობ. ქალმა როგორ უნდა არჩინოს ოჯახი, ყურადღება არ უნდა მოგვაქციონ პატარა? ამ ჩაის ფართობების მეპატრონეებსაც სჭირდება თანხა, მისცენ კრედიტები, სოფლის მეურნეობის სესხი არსებობსო, რომ ამბობს ჩვენი მთავრობა, სადააა ? ამ მთავრობას გლეხისთვის არაფერი გაუკეთებია, ვერ ვხედავთ პერსპექტივებს, გაჭირვებულები ვართ, ყანებს ვერ ვხნავთ, აგერ ვაუჩერი ჰქონდა ქალს და სულ ვერ დახნა ყანა, ამ ჩაიზე ვართ დამოკიდებული, იმედი არც გვაქვს რომ მოგვხედავენ, ფართობებიც არაა ,რომ შეხვიდე და ჩაი მოკრიფო. რა დროს სიმღერით შემოსვლაა ფართობში, მაშინ როცა შიმშლით ვკვდები ქალი, რა მემღერება, როცა პურის ფული არ მაქვს, წამალს ვერ ვყიდულობ!“_ ამბობს ჩანქსელიანი.
“არ ვიცოდით ასეთი ფორმალობა და დადგმული სცენა თუ იქნებოდა ჩაიში, თორემ არ გამოვიდოდი დღეს ჩაის საკრეფად, ამისთვის დავუდექი ამ მთავრობას გვერდით, რომ ასე უნდა დაგვცინონ? ესენი რომ წავლენ, ახლა ნაციონალები ჩამახრჩობენ ამ ჩაიში, უარესი გეკუთვნისო, არაა გლეხის საშველი, არაა და არც იქნება, ამ გაჭირვებულებს მიეხმარონ, ამ ჩაის მეპატრონეებს, იმ ლარსაც რომ ვერ გვაძლევენ, ის ლარიც არ აქვთ“ _ ამბობდნენ ჩაის საკრეფად შესული ბახვის მცხოვრებლები.
სოფლის მეურნეობის განვითარების სამსახურის უფროსი გიგა ხარაბაძე მოსახლეობის პროტესტს არ დაეთანხმა და აღნიშნა, რომ სახელმწიფომ მის მიერ აღებული ვალდებულება მიწების დახვნასთან დაკავშირებით, პირნათლად შეასრულა.
“ძალიან დიდი პროექტი გაკეთდა, უფასოდ დაიხნა ოზურგეთში 4000 ჰექტრამდე ფართობი, სახელმწიფომ აიღო ვალდებულება, რომელიც ეხებოდა მიწის დამუშავებას და დახვნას, ეს პროგრამა სახელმწიფომ შეასრულა, დანარჩენი თქვენი კერძო ურთიერთობაა ტრაქტორისტთან. ბოდიში, მაგრამ სახელმწიფო მოსავალს ვერ აგიღებთ და ნალიაში ვერ შეგიტანთ.
რაც შეეხება ჩაის, ნამდვილად სწორი ბრძანდებით: სახელმწიფო უნდა დაეხმაროს ასეთ ხალხს, ჩვენ შევიმუშავეთ ჩაის რეაბილიტაციის პროგრამა და მივაწოდეთ სოფლის მეურნეობის სამინისტროს. პრემიერმაც განაცხადა ამის შესახებ, რომ ის მაქსიმალურ მხარდაჭერას გამოთქვამდა, ასე რომ მეჩაიეებს ჰქონდეთ სახელმწიფოს იმედი, მაგრამ ეს ყველაფერი უნდა მოხდეს კოოპერაციის საფუძველზე“ – განაცხადა ხარაბაძემ.
