უსაფრთხოებისა და კრიზისების მართვის საბჭოს მდივნის მინდია ჯანელიძის ინფორმაციით, სტიქიის შედეგად, თბილისისთვის მიყენებული ზარალი, სავარაუდოდ, რამდენიმე ათეულ მილიონ ლარს გადააჭარბებს.
ამის შესახებ ჯენელიძემ საზოგადოებრივ მაუწყებელთან პირდაპირი ჩართვისას განაცხადა.
მისი თქმით, ამ დროისთვის დადასტურებული ინფორმაციით, გარდაცვლილია 8 ადამიანი. ასევე, არსებობს ინფორმაცია უგზო-უკვლოდ დაკარგულების შესახებ.
"კრიზისების მართვის საბჭოში შექმილია საგანგებო შტაბი, რომელსაც ხელმძღვანელობს პრემიერ-მინისტრი. ჩართულია ყველა უწყება, რომელიც საჭიროა კრიზისული ვითარების განმუხტვისთვის. თითოეულ სამინისტროს გააჩნია თავისი სამოქმედო გეგმა და ახორციელებენ კონკრეტულ სამუშაოებს. უწყვეტ რეჟიმში მიმდინარეობს სამაშველო სამუშაოები, ასევე თბილისში ყველა კრიტიკულ უბანზე ტარდება გაწმენდითი სამუშაობი და პარალელურად ხორციელდება ზარალის დათვლა. ასევე ხდება იმ ოჯახების თავშესაფრებში გადაყვანა, რომლებსაც საცხოვრებელი სახლები დაუზიანდათ. რაც შეეხება ზარალს, ზუსტ რიცხვზე საუბარი ამ ეტაპზე ნაადრევია, რადგან მისი დათვლა ახლა მიმდინაროებს, მაგრამ წინასწარი ინფორმაციით, ზარალი რამდენიმე ათეულ მილიონ ლარს გადააჭარბებს", _ განაცხადა ჯანელიძემ და დასძინა, რომ ამის მიუხედავად პანიკის საფუძველი არ არსებობს.
"ყველა ის ღონისძიება ტარდება, რაც საჭიროა კრიზისული ვითარების დასარეგულირებლად. დღის განმავლობაში საგანგებო შტაბი ისევ შეიკრიბება და დამატებით ინფორმაციას ამის შემდეგ მოგაწვდით", _ აღნიშნა ჯანელიძემ.
