დღეს, ფოთისა და ხობის ეპარქიის სამდივნომ, გუშინ, ინტერნეტით გავრცელებული სპეციალური განცხადება საჯაროდ, წმიდა ნიკოლოზის ტაძართან, ჟურნალისტებსა და საზოგადოებას გააცნეს. ბრიფინგის დაწყებამდე, რამდენიმე დღის წინ, ტაძართან მისასვლელ გზასთან დამონტაჟებული შლაგბაუმი და სპეციალური საყარაულო ჯიხური, პორტის თანამშრომლებმა დაჩქარებული წესით აიღეს.
გუშინ, ინტერნეტის საშუალებით გავრცელდა ფოთისა და ხობის ეპარქიის სპეციალური განცხადება, რომლის მიხედვითაც, 18 იანვარს, წმიდა ნიკოლოზის ტაძრის მოძღვარს, ეკლესიის მრევლს და მიტროპოლიტის სამდივნოს თანამშრომლებს ტაძრისკენ მიმავალ გზაზე, სადაც სპეციალური შლაგბაუმი დამონტაჟდა, ავტოტრანსპორტით გადაადგილება აუკრძალეს.
როგორც დღეს გამართული ბრიფინგის შემდეგ, სამღვდელო პირებმა განაცხადეს, პორტის გენერალური დირექტორის ჯოზეფ ქროულისა და ფოთისა და ხობის მიტროპოლიტ გრიგოლის შეხვედრამდე, გარკვეული არაფერი იქნება. საზოგადოებისთვის ახალი ინფორმაცია სწორედ ამ შეხვედრის შემდეგ გახდება ცნობილი.
როგორც ეპარქიის სამდივნო განმარტავს, 2011 წლის 16 თებერვლის N98-46-21 წერილით, კორპორაცია "ფოთის საზღვაო ნავსადგურმა" მიმართა საქართველოს ეკონომიკისა და მდგრადი განვითარების სამინისტროს, რომელშიც დასმული იყო ნავსადგურის საკუთრებაში არსებული ქონების _ წმ. ნიკოლოზის ეკლესიის, საეკლესიო დანიშნულების შენობისა და მათზე დამაგრებული მიწის ნაკვეთების სახელმწიფოსთვის გადაცემის საკითხი, შემდგომში საქართველოს სამოციქულო ეკლესიისთვის გადაცემის მიზნით. ფოთის პორტის ყოფილმა მფლობელმა კომპანია "რაკიამ" ქონება სახელმწიფოს დაუბრუნა და ეკონომიკისა და მდგრადი განვითარების სამინისტრომ 2011 წლის 30 მარტს აღნიშნული ქონება საჯარო რეესტრში სახელმწიფო საკუთრებად დაარეგისტრირა.
"თუმცა, როგორც აღმოჩნდა, ეს ასე არ ყოფილა. ეკლესია, საეკლესიო დანიშნულების შენობა და მათზე დამაგრებული მიწის ნაკვეთები კი დარეგისტრირდა სახელმწიფოს საკუთრებად, მაგრამ, სამწუხაროდ, საქართველოს ეკლესიაზე მისი გადაცემა ჯერაც არ მომხდარა. ამან, როგორც ჩანს, ნავსადგურის უკვე ახალ მფლობელებს კვლავ აღუძრა წმ. ნიკოლოზის ეკლესიის დანგრევის სურვილი, რის შესახებაც დაუფარავად საუბრობენ და დაჯერებულად აცხადებენ, რომ ამ საკითხზე სრულიად საქართველოს კათალიკოს-პატრიარქთან "შეთანხმდებიან". როგორც ვითარებას ეტყობა, ნავსადგურის ამჟამინდელ მფლობელებს გეგმაც გააჩნიათ და მოქმედებასაც შეუდგნენ", _ ნათქვამი იყო ეპარქიის სამდივნოს წერილობით განცხადებაში.
ფოთის პორტის გადაწყვეტილებას სამართლებრივად არასწორი ნაბიჯი უწოდა ფოთის მერმა ვახტანგ ლემონჯავამაც.
დღის ბოლოს, პორტის დირექტორთან გამართული კონსულტაციების შემდეგ, ფოთის მაჟორიტარმა დეპუტატმა, თემურ წურწუმიამ განაცხადა, რომ ფოთის ნავსადგურის ხელმძღვანელობა პირობას დებს და წმინდა ნიკოლოზის ტაძრამდე მისასვლელ გზაზე შეზღუდვები მოიხსნება. შეხვედრას ფოთის მერი ვახტანგ ლემონჯავაც ესწრებოდა.
"ნავსადგურს ხელმძღვანელმა, ჯოზეფ ქროულიმ გარკვეულწილად აღიარა, რომ შეცდომა იყო დაშვებული და გადაწყვეტილება ნაჩქარევად მიიღეს. მან პირობა დადო, რომ მოშლის დაბრკოლებებს, რომელიც დღეს არის, შეხვდება ფოთისა და ხობის მიტროპოლიტ გრიგოლს. შემდგომში კი, თუ ნავსადგური ამ ტერიტორიასთან დაკავშირებით რამეს გადაწყვეტს, აუცილებლად შეუთანხმებს ქალაქის ხელმძღვანელობას, ეკლესიის ნაწილში კი _ მეუფე გროგოლს", _ აღნიშნა წურწუმიამ.
მისივე თქმით, ფოთის პორტის ახალი ხელმძღვანელობა იმ ტერიტორიას, რომელიც არაბულმა "რაკიამ" სახელმწიფოს დაუბრუნა, აღიარებს სახელმწიფოს კუთვნილად.
"ჯოზეფ ქროული ამბობს, რომ მოხდა აჩქარება და მისი დავალება არასწორად შესრულდა", _ განაცხადა ფოთის მაჟორიტარმა დეპუტატმა.
ფოთის პორტს არაბულმა კომპანია "რაკიამ" 2011 წლის გაზაფხულზე გაასხვისა. ნავსადგურის ახალი მფლობელია APM Terminals, რომელიც დანიური მაერსკ-ის შვილობილი კომპანიაა. APM Terminals მსოფლიოს პორტების ერთ-ერთი ყველაზე მსხვილი ოპერატორია, მსოფლიოს 33 ქვეყანაში 44 პორტს ფლობს.
