ქალაქ ოზურგეთის მუნიციპალიტეტის საკრებულოს თავმჯდომარემ გელა კობალაძემ და დეპუტატებმა, 17 ივნისის საკრებულოს სხდომაზე თბილისში დატრიალებულ ტრაგედიის გამო მწუხარება გამოთქვეს და წუთიერი დუმილით პატივი მიაგეს დაღუპულებს.
საკრებულოს სხდომას ვიცე-მერი ალეკო ბურჭულაძე ესწრებოდა.
2015 წლის 16 ივნისის საქართველოს მთავრობის #123 განკარგულების თანახმად, ქალაქ ოზურგეთის მუნიციპალიტეტს გამოეყო 2 314,8 ათასი ლარი. აქედან გამომდინარე, საჭიროა, გახორციელდეს ცვლილებები _ ამის შესახებ სხდომაზე მერიის საფინანსო -საბიუჯეტო სამსახურის უფროსმა მარიკა ნაცვალაძემ ისაუბრა. მისი განმარტებით, "საგზაო ინფრასტრუქტურის დაფინანსება 1 062, 4 ათასი ლარით გაიზრდება, ბინათმშენებლობის _ 752, 8 ათასი ლარით, კეთილმოწყობის სამუშაოების _ 448,5 ათასი ლარით. საპროექტო დოკუმენტაციისა და საექსპერტო მომსახურების შესყიდვისთვის 2015 წლის 20 იანვრის #39 განკარგულებით გამოყოფილი თანხა იყო 221, 6 ათასი ლარი. აღნიშნულ განკარგულებაში 2015 წლის 16 ივნისის #1234 განკარგულების თანახმად, შევიდა ცვლილება და ეს თანხა შემცირდა 170,6 ათასი ლარით".
როგორც ნაცვალაძემ აღნიშნა, საპროექტო დოკუმენტაციისა და საექსპორტო მომსახურების შესყიდვისთვის გამოყოფილი თანხა 51,0 ათასი ლარით განისაზღვრა, კერძოდ: "საგზაო ინფრასტრუქტურა 23, 0 ათასი ლარით გაიზრდება, ასევე, ბინათმშენებლობა _ 8, 7 ათასი ლარით, კეთილმოწყობის სამუშაოები _ 19, 3 ათასი ლარით.
გატარებული ცვლილებების შედეგად, ინფრასტრუქტურის მშენებლობა, რეაბილიტაცია და ექსპლოატაცია, სახელმწიფო ბიუჯეტის ფონდებიდან გამოყოფილი ტრანსფერით _ 2 314, 8 ათასი ლარით განისაზღვრა: საგზაო ინფრასტრუქტურა _ 1085,4 ათასი ლარით, ბინათმშენებლობა _ 761, 5 ათასი ლარით, კეთილმოწყობის სამუშაოები _ 467, 9 ათასი ლარით.
ქალაქ ოზურგეთის საკრებულოს დაფინანსება შემცირდება 120, 000 ლარით, შრომის ანაზღაურება კი 70, 000 ლარით.
ქალაქ ოზურგეთის მერიის დაფინანსება შემცირდება 160,000 ლარით, შრომის ანაზღაურება _ 150 000 ლარით, სკოლამდელი განათლების დაფინანსება შემცირდება 70 000 ლარით, სუბსიდია შემცირდება 70, 000 ლარით, სპორტული ღონისძიებები _10, 0 ათასი ლარით, კულტურული ღონისძიებების დაფინანსება შემცირდება 10, 000 ლარით.
დამტკიცებულ ბიუჯეტში ცვლილებების შეტანის საკითხს დეპუტატების მხრიდან ხმაური მოჰყვა.
საკრებულოს დეპუტატმა გოჩა ძიმისტარაშვილმა განაცხადა, რომ ის რამდენიმე ხნის წინ ითხოვდა სახელფასო ფონდის შემცირებას, დააყენა კიდეც საკითხი, თუმცა, მას მხარი არ დაუჭირეს:
"რატომ მაშინ არ მოხდა სახელფასო ფონდის შემცირება, როცა მე დავაყენე ეს საკითხი?" _ იკითხა ძიმისტარაშვილმა, რაზეც საფინანსო-საბიუჯეტო სამსახურის უფროსმა უპასუხა, რომ ძიმისტარაშვილს მაშინ სწორად გათვლილი არ ჰქონდა.
ეკონომიკური განვითარების, ქონების მართვის, ინფრასტრუქტურის, ტრანსპორტისა და კეთილმოწყობის სამსახურის უფროსმა მერაბ წივწივაძემ ოზურგეთის მერის ბეგლარ სიორიძის სახელზე დაწერილი მოხსენებითი ბარათი წაიკითხა, რომელშიც აღნიშნულია:
"ქ. ოზურგეთში, მოსახლეობის მომსახურების დონის გაუმჯობესებისა და ტურისტული სეზონის დადგომასთან დაკავშირებით, მიზანშეწონილად მიმაჩნია, ქუჩებსა და საზოგადოებრივი თავშეყრის ადგილებში განთავსდეს 20 ერთეული მოსაცდელი და 100 ერთეული სანაგვე ურნა. სამუშაოების მთლიანი საორიენტაციო ღირებულება განისაზღვროს 118 000 ლარით" .
წივწივაძემ, საკრებულოს სხდომაზე, ასევე, ისაუბრა, ქალაქ ოზურგეთში, რუსთაველის ქუჩა #28-ში მდებარე სპორტკომპლექსის ექსპლუატაციაში გაშვების შესახებ. მისი თქმით, აღნიშნული შენობა საჭიროებს ინვენტარით აღჭურვას, რისთვისაც, სავარაუდოდ, უნდა გამოიყოს 37 110 ლარამდე თანხა.
აღნიშნულ საკითხებს დეპუტატების _ ლევან მგელაძის, თამარ ნადირიძის, გოჩა მგელაძისა და გოჩა ძიმისტარაშვილის პროტესტი მოჰყვა.
დეპუტატებს შორის ხმამაღალი საუბარი დაპირისპირებაში გადაიზარდა. მათ ეს ფაქტი წინა ხელისუფლების მიერ გაკეთებულ პროექტებს შეადარეს. როგორც დეპუტატები ამბობდნენ, ქალაქს არ ჰყავს მუნიციპალური ტრანსპორტი; ამიტომ, ჯერ უნდა შეიძინონ ტრანსპორტი და შემდეგ გაკეთდეს მოსაცდელები.
საკრებულოს თავმჯდომარე დეპუტატებს სიმშვიდისკენ მოუწოდებდა: "ნუ ხარჯავთ ამდენ ემოციას. ქალაქისთვის კეთდება, გათვლილია მაღალ სტანდარტებზე", _ ირწმუნებოდა გელა კობალაძე.
ხმაური მოჰყვა მეხუთე საკითხსაც, რომელიც შპს ქალაქ ოზურგეთის მუნიციპალიტეტის სავაჭრო ცენტრის 100 პროცენტის წილის მესაკუთრე სსიპ თვითმმართველი ქალაქის საკუთრებაში არსებული ქონების _ 5 982 კვ.მ. მიწის ფართობიდან 4 400 კვ.მ. ფართობის მიწის ნაკვეთის და მასზე განთავსებული შენობა-ნაგებობების, პირობებიანი საჯარო აუქციონის ფორმით, იჯარით, 25 წლის ვადით გაცემის შესახებ, ქალაქ ოზურგეთის მუნიციპალიტეტის მერისთვის თანხმობის მიცემის თაობაზე.
საკრებულოს სხდომის დასრულების შემდეგ, ფრაქცია "ოზურგეთის მომავლისთვის" ბრიფინგი გამართა.
ლევან მგელაძემ ისაუბრა ინფრასტრუქტურულ სამუშაოებთან დაკავშირებით გამოყოფილი თანხების შესახებ: "საუბარია 20 მოსაცდელის მოწყობაზე, თითოეულის ღირებულება 5 000 ლარია, მთლიანად 100 000 ლარი ჯდება. მიმაჩნია, რომ ამ ეტაპზე ეს არის არამიზნობრივი ხარჯვა. ჩვენ არ გვყავს მუნიციპალური ტრანსპორტი; ამიტომ, 100 000 ლარი ჯერ ტრანსპორტის შესაძენად უნდა მიმართულიყო და შემდეგ გაკეთებულიყო მოსაცდელები. თუ პრობლემა დგას, რომ აუცილებლად უნდა გაკეთდეს მოსაცდელი, მაშინ 5 ან 6 მოსაცდელიც საკმარისი იქნებოდა იმ რაიონთაშორისო ტრანსპორტისათვის, რომელიც ქალაქის ტერიტორიაზე მოძრაობს", _ აღნიშნა მგელაძემ. მან ყურადღება გაამახვილა სპორტული კომპლექსისთვის ინვენტარის შეძენაზეც.
"სპორტული კომპლექსი ქალაქის მერიის ბალანსზეა, მაგრამ მისი ფუნქცია ჯერ განსაზღვრული არ არის. არავინ იცის, რა ორგანიზაცია განთავსდება, ვის მოემსახურება და რა ფორმით იქნება. 37 110 ლარზეა საუბარი. მერიის ინიცირებული ბილიარდის შენობის გაკეთება არ მოხერხდა, მაგრამ მაინც მოიძებნა გზები _ ალბათ, ამ შენობას შესძენენ საბილიარდოს სახეს. საკრებულოს წევრებმა არ იციან, რა ფუნქცია ექნება შენობას, მაგრამ ინვენტარის შეძენაზე თანხმობას აძლევენ. ეს გაუგებარია," _ თქვა მგელაძემ.
საკრებულოს დეპუტატმა თამარ ნადირიძემ ბაზრის ტერიტორიის გასხვისებასთან დაკავშირებით ისაუბრა.
მისი თქმით, 4 400 კვ.მ. მიწის ფართობზე მერია ითხოვს პირდაპირი განკარგვის წესით, პირობითი აუქციონის ჩატარების წესზე თანხმობას:
"გაურკვეველია ჩემთვის ეს ფაქტი. დარწმუნებული ვარ, რომ მოვაჭრეებმა არ იციან ამის შესახებ. ფაქტობრივად, მერიას ევალება ამ პირობების განსაზღვრა, ჩვენ ვაძლევთ ხმას ისეთ რამეს, როცა გაურკვეველია, რა ელოდებათ ხვალ იმ ადამიანებს, ვინც ჩვენ გვერდში იბრძოდნენ და დღეს უმძიმეს სოციალურ მდგომარეობაში იმყოფებიან", _აღნიშნა ნადირიძემ.
ნადირიძე ამბობს, რომ დღევანდელმა ხელისუფლებამ მოსვლისთანავე ბაზრის ტერიტორიის გასხვისება დაიწყო: "პირველად, თავიან თმეგობრებზე გაასხვისეს, ახლა შენობა-ნაგებობების სასწრაფო წესით გაყიდვაზე ფიქრობენ. ამას 5-10 წლით კი არ აკეთებენ, არამედ 25-35-წლიანი იჯარით, ჩემი აზრით, ძალიან ცუდ მდგომარეობაშია ქალაქის მოსახლეობა. რა პირობებში აყენებენ შემდეგ მოვაჭრეებს, არც ამის შესახებ გვაქვს ინფორმაცია", _ აღნიშნა ნადირიძემ.
