საქართველოს რეგიონული განვითარებისა და ინფრასტრუქტურის სამინისტრომ, მსოფლიო ბანკთან ერთად, აღმოსავლეთ-დასავლეთის ჩქაროსნული მაგისტრალის რიკოთი-არგვეთის მონაკვეთის დაფინანსების შესახებ დონორთა საკოორდინაციო შეხვედრას უმასპინძლა.
სამინისტროს ინფორმაციით, შეხვედრაზე აღმოსავლეთ-დასავლეთის ჩქაროსნული ავტომაგისტრალის რიკოთისა და არგვეთის მონაკვეთების ტექნიკურ-ეკონომიკური დასაბუთების კვლევისა და ღირებულების შესაბამისობის ანალიზის შედეგების განხილვა გაიმართა. ღონისძიების მთავარ მიზანს წარმოადგენს საქართველოს სატრანსპორტო სექტორში მოქმედ დონორთა კოორდინაციის ხელშეწყობა, ამჟამად არსებული მდგომარეობისა და მოსაზრებების გაზიარება, ასევე შესაბამისი საკითხებისა და სტრატეგიების განხილვა.
უწყების ცნობით, აღმოსავლეთ-დასავლეთ ჩქაროსნულ მაგისტრალზე ხდება მთლიანი საგარეო ტვირთების 60%-ზე მეტის გადაზიდვა. აღნიშნული მაგისტრალის გაუმჯობესება უმნიშვნელოვანესია საქართველოს სატრანსპორტო და ლოჯისტიკურ ჰაბად გარდაქმნისთვის. აღნიშნული ხელს შეუწყობს სავაჭრო ურთიერთობების განვითარებას ერთის მხრივ, ცენტრალურ აზიასა და შორეულ აღმოსავლეთს შორის, ხოლო მეორეს მხრივ – თურქეთსა და ევროპას შორის. საქართველოს მთავრობისთვის ჩქაროსნული მაგისტრალის მშენებლობის დასრულება და მისი საერთაშორისო საავტომობილო გზების სტანდარტებთან ჰარმონიზაცია ერთ-ერთ პრიორიტეტულ საკითხს წარმოადგენს და სურს, რომ პროექტი 2020 წელს დაასრულოს.
სამინისტროს ინფორმაციით, დღევანდელ შეხვედრას საქართველოს რეგიონული განვითარებისა და ინფრასტრუქტურის მინისტრი ნოდარ ჯავახიშვილი, საქართველოს მდგრადი განვითარებისა და ეკონომიკის მინისტრი გიორგი კვირიკაშვილი, საქართველოს ფინანსთა მინისტრი ნოდარ ხადური, საქართველოს საავტომობილო გზების დეპარტამენტის თავმჯდომარის პირველი მოადგილე ნუგზარ გასვიანი, საავტომობილო გზების დეპარტამენტისა და დონორთა მისიის წარმომადგენლები დაესწრნენ.
შეგახსენებთ, რომ აღმოსავლეთ-დასავლეთის ჩქაროსნული მაგისტრალის არგვეთის მონაკვეთთან დაკავშირებით "გურია ნიუსი" ცოტა ხნის წინ წერდა.
ზედა და ქვედა არგვეთის, ასევე სვირის დასახლების სოფლები, სადაც ზესტაფონი-ქუთაისის დამაკავშირებელმა ავტობანმა უნდა გაიაროს ერთმანეთს მოკლე გზით ვეღარ დაუკავშირდება და მოსახლეობას დამატებით 5-6 კილომეტრის გავლა მოუწევს.
ავტობანის გასაკეთებლად, პირველადი სამუშაოები უკვე დაწყებულია, თუმცა, მოსახლეობა ამბობს, რომ მშენებელ კომპანიას უფლებას არ მისცემენ სამუშაოები გააგრძელოს.
საქმე იმაშია, რომ ახლა, ზედა და ქვედა არგვეთის მოსახლეობა, ასევე სვირის დასახლება ერთმანეთს მოკლე გზით უკავშირდება. მოსახლეობას მხოლოდ ცენტრალური ავტომაგისტრალის გადაჭრა უწევთ. თუმცა, ავტობანის გაკეთების შემთხვევაში, მოსახლეობას ერთმანეთთან დაკავშირება თერჯოლისა და ზესტაფონის ცენტრებამდე ჩასვლით და ზედმეტი 5 და 6 კილომენტრის გავლით მოუწევს.
მოსახლეობის პრობლემის შესახებ იციან როგორც ზესტაფონის მუნიციპალიტეტში, ასევე საავტომობილო გზების დეპარტამენტშიც. როგორც "გურია ნიუსს" საავტომობილო გზების დეპარტამენტში უთხრეს, მოსახლეობის მოთხოვნაზე მსჯელობა მიმდინარეობს და მათი გადაწყვეტილება უახლოეს დღეებში გახდებოდა ცნობილი, თუმცა, ამ დრომდე საავტომობილო გზების დეპარტამენტს გადაწყვეტილება არ მიუღია.
უფრო ვრცლად ამ საკითხზე შეგიძლიათ იხილოთ სტატიები:
ზესტაფონის რაიონის სამი სოფელი ავტობანის მშენებლობას აპროტესტებს
"მიცვალებულის სასაფლაომდე მიყვანა თერჯოლის გავლით მოგვიხდება“
მოსახლეობის პროტესტი: მოვითხოვთ დამაკავშირებელი ხიდის აგებას!
საგზაო დეპარტამენტმა მოსახლეობასთან შეხვედრა ჩაშალა
